32
Olwimbo lwa Mûsa
1 Mwe malunga murhege okurhwiri, nkola nashambâla,
w’igulu, yumva okûla naderha.
2 Ihano lyâni lihone nka nkuba, akanwa naderha karhoge nka lumè,
nka hishîshîrha oku hyâsi, nka cihonzi oku musihe.
3 Kulya kubà lyo nacîtakîra izîno lya Nyamubâho;
mwoyo mukuze Nyamuzinda wîrhu.
4 Yêne y’ibuye: obushanja bwâge buli bwimâna,
bulyâla enjira zâge zoshi ziri bushinganyanya.
Ye Nyamuzinda mutabesha na mudahemuka.
Ye Mushinganyanya ye na Mushongêza.
5 Bakozire amaligo n’obwo ababurhaga barhalikwo ishembo,
iburha lya ndyâlya na ncuku.
6 Ka gwo munkwa gwâwe emwa Nyamuzinda ogwo?
Lubaga lwa bingolo-ngolo n’orhutumbaguzi.
Kali ye sho ye wakuburhaga,
ye wakulemaga ye nakubika?
7 Kengêra ensiku zàli burhanzi,
singiriza emyâka, amâburhwa n’amâburhwa,
odôse sho akubwîriza; abakulûkulu bâwe bakuganîrira.
8 Amango ow’Enyanya agabiraga amashanja akashambala,
amango abêrulaga bene omuntu akubûlira amashanja olubibi
nk’oku omubalè gwa Bene Israheli gunali.
9 Nyamubâho yêhe, ogwâge mwanya, lunali olubaga lwâge,
na Yakôbo co câge cigabi.
10 Amushanga omu mpinga, omu nyama-wandya w’irungu
amuyababira amulengeza, amulanga nka mbonyi y’amasù gâge.
11 Nka kula ikozi linashîbirira olwôgo lwâlyo,
kula lirembêra enyanya z’ebyâna byâlyo,
naye ashanjûla ebyûbi byâge, amurhôla amuhêka omu mashala gâge. 12 Nyamubâho yêne wamuherhe,
ntà nyamuzinda w’emwa bene bâli bo naye.
13 Amugerana omu birhondo by’ecihugo,
amulîsa oku myâka y’omu ishwa,
amulumîsa oku bûci bw’omu ibuye,
oku rhuvurha rhw’omu ibâle lizibuzibu.
14 Oku mashanza g’omu nkâfu n’oku marhà g’ebibuzi,
bashushagiza ebyânabuzi n’engandabuzi za bene Bashani
n’empene, bahirakwo n’amashushi g’omulà gw’engano
basûza n’omukò gw’ecihadu c’omuzâbîbu gwabirira.
15 Yakôbo alya ayigurha. Yeshuruni*32, 15 Yushuruni ye Israheli (Rhulole omu Lush 33, 5.26; Iz 44, 2). atwêra ahimba.
(Watwezire, warhuma wacilugira!)
Aleka Nyamubâho wamujiraga,
ibuye lyamucizagya alibonêsa nshonyi.
16 Bàrhuma abà mitula, erhi banyamuzinda b’embuga bàrhuma;
bamujira burhè n’ebyakobwa.
17 Bakazâgirherekêra bashetani n’obwo barhali Nyamuzinda,
bakazirherekêra banyamuzinda barhayishi,
bahyâhya mâshi, ba lishinjo-lishinjo, balya basho barhagashanizagya.
18 (Wayibagîre ibuye lyakuburhaga, orhacikengîri Nyamuzinda wakuhiragaho.)
19 Nyamubâho abona okwo, n’omu burhè bwâge, ajandika bagala na bâli bâwe.
20 Aderha erhi: Nabafulika obusù bwâni, ndolage kurhi byababêra.
Bulya lyabîre iburha ligalugalu, bâna barhagwêrhi oku bakacîkubagirwa.
21 Barhumire nâbà mitula y’irumbi lyâbo mpu banyamuzinda,
banjijire burhè n’amarumbi gâbo;
nâni nkolaga najira babè mitula y’irumbi mpu lubaga.
22 Nêci, oburhè bwâni bwayâsire muliro,
gwâyôca ciru n’ebiri idako ly’okuzimu, gwâyôca idaho guyôce n’emyâka,
gurhasige olubando lw’entondo.
23 Nabalashirakwo amahanya, nabayukizakwo emyampi yâni.
24 Bahungumuka n’ecizombo, bâlibwa n’ishûshira banayumîrire n’obwôge.
Nabarhumira erîno ly’ebiryanyi, baguma n’amanjoka-njoka.
25 E muhanda, engôrho yamalîra abânarhabana, omu nyumpa ebihamba.
Ebyo byaheza omwânarhabana n’omwânanyere,
omwâna ociri oku ibêre n’omushosi w’emvi.
26 Nakadesire nti: «Nabashemba-shemba,
nti nazâza izîno lyâbo omu karhî k’abantu»,
27 nka ntarhînyaga ifêka ly’omubisha,
kuderha nti abashombanyi bâbo bakanahaba baderhe erhi:
«Okuboko kwîrhu kwo kwahimîne,
ci arhali Nyamubâho wakozire ebyo byoshi.»
28 Nêci, bulya luli lubaga lurhabona,
lurhanagwêrhi makengu.
29 Nka bali bantu barhimanya bakanayumvîrhe,
bakanabwîne bwinjà kurhi bazinda bali.
30 Kurhi omuntu muguma akakânana ecihumbi,
n’ababirhi kurhi bakatundulika ebihumbi ikumi,
kuleka kulya kubà ibâle lyâbo lyabaguzize,
na kulya kubà Nyamubâho abarhibiremwo?
31 Cikwône ibuye lyâbo lirhali nk’ibâle lîrhu;
arhanali abashombanyi bîrhu bo bakarhulagira.
32 Bulyâla ihaji lyâbo lyàli ly’oku muzâbîbu gw’e Sodomo,
ly’omu lukoma lw’e Gomora:
amalehe g’eyo mizâbîbu galimwo obwôge,
ebihadu by’amalehe gâbo biri bilulu-bilulu,
33 idivayi lyâbo gali manjokanjokà,
gali mîno makali ga mpiri.
34 Ci kwône yêhe, k’arhali ho andi aha burhambi nka ntûlo,
erya mbôhe omu irhù ly’ebinja?
35 Olwihôlo n’oluhembo biri byâni,
amango okugulu kwâbo kwarhereza.
Bulyâl’olusiku lwâbo lw’okuhanyagala luli hôfi;
nehi babîkîrwe hiyishire buhena.
36 (Bulya Nyamubâho ayishihôla olubaga lwâge.
Ci kwône abambali bôhe lukogo ababêra),
hano abona bârhà enjingo hano abona
harhaciri ntagengwa harhanaciri mujà.
37 Ago mango anaderha, erhi: banyamuzinda bâbo ngahi baligi,
liryal’ibuye bakazâgiyâkiraho?
38 Balya bakazâgirya amashushi g’enterekêro zâbo banakazinywa idivayi
ly’okugashâniza kwâbo, bayimangage bamurhabâle,
bahindukage lwâkiro lwinyu.
39 Mulolage oku niono, niono ndi ye,
n’oku ntà wundi oli Nyamuzinda haguma nâni.
Niene nie nyîrha nie nanciza, amango namashûrha,
niene nanfumya, (na ntâye wakakûla owundi omu nfune zâni).
40 Nêci, nnengerîze enfune zâni emalunga,
nandesire, nti: «Nie nkudesire, nie mbâho ensiku n’amango»,
41 amango nâbà namarhyaza engôrho yâni erhangirayalabuka,
n’okuboko kwâni kurhangira okutwa emmanja,
ago mango nânacihôlera emunda abashombanyi bâni bali,
balya banshomba nânabaha oluhembo lwâbo.
42 Emyampi yâni nayilalusa n’omukò,
n’engôrho yâni yavûgusa enyama:
mukò gwababanzirwe n’abagwêrhe mpira,
mpanga z’abarhambo b’omushombanyi!
43 Mwe malunga, muciyigîrize haguma naye,
na bene Nyamuzinda bamuharamye!
Mwe mashanja, mucîyigîrize haguma n’olubaga lwâge,
n’entumwa za Nyamuzinda ziderhe obuzibu bwâge.
Bulyâla ayishihôla omukò gw’abambali,
anagalulire abashombanyi bâge amakwânane gâbo.
Abamushomba abagalulira ebyâbo,
anakangûle ecihugo c’olubaga lwâge.
44 Mûsa ayisha ali bona Yozwè mwene Nuni, ebinwa by’olu lwimbo byoshi abiderhera omu kurhwiri kw’olubaga. Okushimba irhegeko kwo kulama 45 Erhi Mûsa ayûsa abwîra Israheli yêshi ebi binwa, 46 ashubibabwîra, erhi: «Muyumvîrhize ebi binwa byoshi; byo njijire ene caliho w’okumuyagîriza. Murhegeke bagala binyu balange banakulikire ebinwa by’olu Lushika byoshi. 47 Kuli mwe, olwo Lushika lurhali lwa kuhalîza, bulya luli kalamo kinyu, lwo lwanamuha okulama nsiku nyinji mw’eci cihugo mwajiyanka obu mwayikira Yordani». Bamanyîsa Mûsa oku akola afà 48 Olwo lusiku lwonênè, Nyamubâho ashambâza Mûsa, amubwîra erhi: 49 «Sôkera oku ntondo ya Nebo, ntondo eri omu birhondo bya Abarimu, omu cihugo ca Mowabu, ah’ishiriza lya Yeriko, onalole bwinjà ecihugo ca Kanâni nahà Bene Israheli nti cibè câbo. 50 “Onafire oku ntondo wasôkera, wabugâna ab’emwinyu aka mulumuna wâwe Aroni, wafîraga oku ntondo ya Hori, ajibugâna abafîre”. 51 “Kulya kubà arhambêraga mwîkubagirwa omu karhî ka Bene Israheli, oku lw’e Meriba-Kadeshi, omu irungu lya Sini, kulya kubà wabuzire buyêrekana obwimâna bwâni omu karhî ka Bene Israheli”. 52 “Walangîrira emuhanda ci kwône ecihugo nâhà Bene Israheli orhacikozemwo okugulu”».