1 Erhi anayumva oku kwo byalâlîrwe ntyôla, Mardokeyo asharhula emyambalo yâge ayambala sunzu, anacilabika oluvù. Okubundi anacikanya omu lugo loshi ajà abanda endûlù, 2 anacigend’iyimanga aha muhango gujire aha bwâmi bulya ntâye wankagezire muli ogwôla muhango anacîhundikîre sunzu. 3 Omu ngasi cishagala banamanyisagyamwo ogwôla mwanzi gw’ebwâmi, oku ngasi Muyahudi wanali k’olwôla lugo kwabà kurhindibuka, kulaka n’okurhoza emirenge, kucîshalisa n’emirhanyo. Banji baj’omu mishîbo, bayambala sunzu, bacilabika oluvù.

4 Bambalikazi n’abalamba barhonyi ba Esteri bayish’imumanyîsa ogwôla mwanzi. Omwâmikazi, omungo gwamugwârha bwenêne. Arhuma abahêkera Mardokeyo emyambalo mpu lyo aleka sunzu wâge. Ci Mardokeyo acîlahirira. 5 Lêro okubundi obwôla, Esteri anacirhuma omwambali wâge Hataki, muguma w’omu barhonyi mwâmi alimuhire mpu bakaz’imukolera, Esteri anacimurhuma mpu agend’idôsa Mardokeyo kurhi byabîre na bici birhumire abà n’olugendo lwa bene olôla.

6 Hataki anahuluka ajà emunda Mardokeyo ali atamîre aha muhango gw’omuhanda gwa mwâmi. 7 Mardokeyo anacimurhondêreza oku binali byoshi anacimubwîra na kurhi Hamani alagânaga okurhulira ensaranga zirhali nyi oku mbîko ya mwâmi nka mpyîlo y’okumalîra Abayahudi. 8 Anacimuhà erya mpamîso y’olwandiko lw’irhegeko lyalumîzibagwa omu cihugo coshi mpu bayîrhe Abayahudi; n’okwôla kwankamanyisize Esteri ebyabîre byoshi. Anacimu komêreza mpu abwîre omugoli ajè emunda mwâmi ali amushenge obwonjo oku lubaga aburhagwamwo. «Erhi kengêra mwâna wâni muli zirya nsiku z’amalibuko amango nakazâg’ikulîsa n’amaboko gâni. Bulya Hamani ye oligi wa kabirhi omu cihugo ca mwâmi, ahûnyire mwâmi mpu rhweshi rhufè!» «Oshenge Nyakasane, orhuderhere emunda ali, orhufulumuse olufù!»

9 Hataki agaluka aj’ishambâlira Esteri ebyo binwa. 10 Esteri arhuma Hataki ajibwîra Mardokeyo, erhi: 11 «Bambali ba mwâmi boshi n’abayûbaka omu cihugo câge bayîshi oku ngasi muntu abè mulume, abè mukazi, erhi ankanacîshomya mpu ajè emunda mwâmi ali arhanahamagirwi naye, oyôla muntu anakumba ho nahalya omu irhegeko lidesire mpu oyôla muntu afè. Nkabaga erhi mwâmi akanamuyêrekeza akarhi kâge k’amasholo, mwâmi anamanyîse ntyo oku oyûla muntu ababalirwe. Hamagera na nsiku makumi asharhu ntalalikwa mpu njè emunda mwâmi ali».

12 Hataki anacimanyîsa Mardokeyo ebyo binwa bya Esteri. 13 Naye Mardokeyo anacishuza Hataki, erhi: «Ojag’ibwîra Esteri, orhamanyaga mpu okwenge oli omu bwâmi, wênene Muyahudi wâfuma omu bandi. 14 “Bulya kwo binali erhi wankabà orhadesiri kanwa mwagano mango, okucira n’okuyôkoka kw’Abayahudi kwanarhenga handi*4, 14 Kwanarhenga handi: Kwo kuderha emwa Nyamuzinda. Ntà mango Abayahudi bàcîshomize okudarhula Nnâmahanga omw’izîno; bulya bàkengaga Nnâmahanga bwenêne. Nyamuzinda arhaderhagwa omw’izîno lyâge.; w’oyo n’enyumpa ya sho mwanahûngumuka. Ndi wankamanya erhi arhali amango gali nkaga go garhumaga ôbà mwamikazi?”»

15 Esteri abwîra Mardokeyo, erhi: 16 «Ogend’ibwîra Abayahudi banali omu Suza boshi bacîshalise erhi nie ntuma. Murhalyaga murhananywaga miregerege isharhu na madufu asharhu. Oku lwâni lunda, nie haguma na bambalikazi bâni, nacîshalisa kuguma na ninyu. Na hanôla mbà namacîrheganya ntyôla, nanaj’emunda mwâmi ali, gwârhi irhegeko, akabà kufà nafà nanafâga». 17 Mardokeyo ashubira emwâge agend’ijira kulyâla Esteri amubwîraga.

Mardokeyo ashenga erhi akengêra aminjà ga Nyakasane goshi, aderha erhi: Mâshi, Yâgirwa, Yâgirwa Mwâmi Ogala-byoshi, ebintu byoshi bibà oku buhashe bwâwe, na ntâye ciru n’omuguma wankakucîka nka wamalonza okuciza Israheli. We walemaga empingu n’igulu, na ngasi birhangâzo bibà hanôla igulu. We mwâmi w’ebintu byoshi, na ntâco cankakucîka Nyamwagirwa! Oyîshi byoshi, orhahabiri oku arhali kujira cikanyi nîsi erhi bucîbonyi kandi erhi magene g’okubona irenge lyarhumaga nalahira okufukamira omwîbonyi Hamani. Bulya nêci nanacinyihya erhi kuciza Israheli kurhuma. Ci kwônene najizire ntyôla, lyo ndek’ihà omuntu irenge likwânîne Nyamuzinda yênene; ntankanaharâmya owundi okuleka wênene, Yâgirwa Nnâmahanga, ci arhali ebwa kucivuna kwo kwarhuma najira ntyôla. Na bunôla Yâgirwa Nnâmahanga, Mwâmi, we Nyamuzinda w’A brahamu, obabalire olubaga lwâwe; bulya abashombanyi bîrhu bakola ba rhulomolîre amasù mpu barhuyîrhe banaherêrekeze omwîmo gwâwe gwa kurhenga mîra. Orhagayaguzagya omurhwe gwâwe, ogu wênene wacungulaga kurhenga e Mîsiri. Yâgirwa oyumvîrhize omusengero gwâni! Omwîmo gwâwe ogufè obwonjo, emishîbo yîrhu oyihindule bushagaluke lyo rhulanga akalamo kîrhu rhunabè bantu bakuyimba irenge ly’izîno lyâwe, mâshi Nyakasane. Yâgirwa omanye mâshi wankaheza orhunwa rhw’abakukuza. Nabo bene Israheli balaka bwenêne n’emisî yâbo yoshi omu kubona olufù lukola luli embere z’amasù gâbo.

Omwâmikazi Esteri naye oyakira muli Nyakasane erhi arhungwa n’obwôba bw’olufù lwalikola lumuyêrekîre luminomino. Anacihogola erya myambalo yâge y’obugale, ayambala ey’okucîbabaza n’okushîba; ahâli h’amanukato galya gabaya bwinjinjà oku irhwe lyâge, alibumba luvù na ngasi bindi bya bibolêrereza. Arhohya bwenêne omubiri gwâge; n’ebiviri bishandabîne abà by’akola aj’agerana halya hoshi anakazâg’igera abà amashokôza amanayambaliza bwinjà. Ashenga Nyakasane Nyamuzinda w’Israheli aderha, erhi: Nyamwagirwa, mwâmi wîrhu, wêne Nyamuzinda ntà wundi, ntabala nâni bulya obwînage oku niono nieshi ntà handi nankacikula oburhabâle okuleka emunda oli: bulya embaka zinyîshire, nkola ndi omu kanga k’okufà. Kurhenga eburhò bwâni erhi nciri aha mwîrhu, nayumvîrhe oku wêne ne Yâgirwa, we wacîshogaga Israheli omu karhî g’agandi mashanja goshi na balarha wacîshogâbo muli bashakulûza bâbo, mpu babè mwîmo gwâwe ensiku n’amango, n’oku wajizire makwânane manji wakazâg’ibalaganya. Lêro rhwakugomera, wanacirhuhâna emwa abashombanyi bîrhu, ebwakubà rhwamakaz’iharâmya ba-nyamuzinda bâbo. Oli mushinganyanya Yâgirwa Nnâhamwîrhu. Ci kwônene barhaciderhaga mpu obûla rhwamagwârhwa mpira rhukolaga rhwalekera ahôla, ci balunginage boshi n’enshushano zâbo mpu bakûle omulâli gw’omu kanwa kâwe, mpu baherêrekeze loshi-loshi omwîmo gwâwe, mpu badundaguze orhunwa rhw’abakukuza, bamalîre ntyôla irenge ly’aka­ Nyamuzinda kâwe n’oluhêrero lwâwe. ntyo bakaz’iharâmya omu igulu lyoshi ba-nyamuzinda b’obwîhambi n’okucîsîmîsa lwoshi embrere z’omwâmi w’igulu. Yâgirwa, enshusho yâwe erhahindukaga buhanya oku barhacihali, mâshi, orharhuganyaguzagya omu malibuko gîrhu! Emihigo mibî abashombanyi bîrhu barhurheganyiza, ojire ebagalukire bônène n’omurhangiriza wankacîshomya mpu arhurhêra, ojire acîbonerekwo, abè lwîganyo lw’abâbo! Yâgirwa okengêre, ociyêrekane olusiku lw’amalibuko gîrhu! Nâni ompè oburhwâli, Yâgirwa Mwâmi wa ba-nyamuzinda na Murhegesi wa ngasi bukulu. Ohire ebinwa binunu omu kanwa kâni hano mbà nkola ndi omu mbaka embrere z’entale, onayiyêrekeze omurhima embere z’abashombanyi bîrhu, baherêrekere haguma n’abandi boshi babashusha. Rhwêhe okuboko kwâwe kurhucize, onayîshe ontabille bulya niene ndi, ntanagwêrhi wundi nalibirhira kuleka we, wêne Nyakasane! Oyîshi byoshi onayîshi oku ntabonakwo irenge ly’abarhasima bayumve izîno lyâwe, oyîshi oku ntabonakwo gw’entakembûlwa n’ogw’abanyamahanga. Omanyire obulagîrire ndimwo, omanyire oku obwôba bungwêrhe erhi bucîbone bwâni burhuma, bulya bundi ebusù, mwa zino nsiku ndi nagenda engalanju hano igulu, bwôba n’enshonyi ziri nka za mwambalo gw’izinga. Waliha, ontenze kw’obwo bwôrhere, ojire burhankulikiraga omu nsiku zâni z’omurhûla. Mwambalikazi wâwe arhalîraga oku cîbo ca Hamani, arhajaga oku nsiku nkulu z’ebwâmi arhananywaga amamvu g’abazimu. Mwambalikazi wâwe arhacisimisagya kundi kundi kurhenga olusiku akuhiragakwo omurhima kuhik’ene, ci muli we, Nyakasane, Nyamuzinda wa Abrahamu. Nyamuzinda w’emisî elushire eya boshi, oyumvîrhize izù ly’abâli omu malibuko barhanacigwêrhi bulangâlire, orhukule omu maboko g’abaminya onankûle omu bwôba ndimwo!