1 Muli obwôla budufu mwâmi anacibula îrò, arhumiza mpu bamulêrhere ecitabu c’emikolo n’ebijiro byâge. Bacilêrha, barhondêra bacibungûla banacisomera embere zâge. 2 Lêro banacishimâna ahayandisirwe kurhi Mardokeyo ajag’imanyîsa obulyâlya bwa Bigtani boshi na Tareshi bali barhonyi babirhi ba mwâmi, bo bakazâg’ilanga enyumpa ya mwâmi na ngasi byoshi byanabagamwo; bali balalîre okuyîrha mwâmi Asuerusi. 3 Mwâmi anacidôsa, erhi: «Bicigi biguma Mardokeyo ahâbiragwe nka bukuze n’irenge kuli okwo ohôla?» Nabo balya barhumisi ba mwâmi bakazâg’imukolera agôla mango banacishuza, mpu: «Arhahabagwa cici.» 4 Mwâmi anacidôsa, erhi: «Ndi oli omu ngo?» Mw’agôla mango gonène, Hamani erhi ali embuga aha nyumpa ya mwâmi, aliyîshir’ihûna mwâmi mpu bamanike Mardokeyo oku murhi ali amurheganyîze. 5 Abarhumisi ba mwâmi banacishuza mwâmi, erhi: «Hamani oyo oli omu ngo.» Mwâmi anaciderha, erhi: «Ayîshe!» 6 Erhi Hamani aha amâjà omu nyumpa mwâmi anacimudôsa, erhi: «Kurhi bankajirira omuntu mwâmi alonza okukuza?» Hamani acîjà emurhima, erhi: «Wundi ndi mwâmi ankalonza okukuza ahanyuma lyâni?» 7 Hamani anacishuza, erhi: «Ka hali omuntu mwâmi alonza okukuza?» 8 Erhi kukwânîne okuyanka omwambalo gw’obwâmi, gulya mwâmi yênene akola arhanzir’iyambala n’okumuyamhisagwo; kandii okumuhira oku nfarasi mwâmi yenne akola arhanzir’igendakwo; erya ebarhwîre ecimanè c’obwâmi omu irhwe. 9 Ogwôla mwambalo n’eyôla nfarasi banabihà olya onali mukulu bwenêne omu bagula ba mwâmi naye anabiyanbisa olya muntu mwâmi alonza okukuza, kandi banajà bamugeza omu miha nda y’olugo, banajà bayâkûza embere zâge mpu: «Kw’ajirirwa ntyôla omuntu mwâmi alonza okukuza!» 10 Mwâmi anacibwîra Hamani, erhi: «Kanyagya duba oyanke ogôla mwambalo n’eyôla nfarasi na nk’okwôla onadesire ogendig’ikujirira Mardokeyo, Muyahudi, otamîre aha muhango gwa mwâmi, orhanalekaga akantu muli ebyôla onadesire.» 11 Hamani anaciyanka gulya mwambalo n’erya nfarasi, ayambisa Mardokeyo gulya mwambalo anamugerana oku nfarasi omu ngasi lugo anayisha ayâkûza, erhi: «Ntyôla kwo mwâmi ajirira omuntu alonza okukuza.» 12 Mardokeyo ashub’icîshubirira aha muhango gwa mwâmi naye Hamani ayombokera emwâge n’omutula n’irhwe libwîke. 13 Hamani anacirhondêra ashambâlira mukâge Zereshi n’abîra bâge oku kwo byabîrage ntyôla. Abîra bâge na mukâge Zereshi, banacimubwîra, mpu: «Akabà kobinali Mardokeyo anali w’omu bûko bw’Abayahudi, mîra warhondêraga okucîrhôheza, ntâko wacimujira, okwôla wakaz’ifukamira burhahusa embere zâge».

14 Oku banacidwîrhe bashambâla ntyôla abaganda ba mwâmi banaciyirukira bayisha bakola balirhola Hamani mpu ajè oku lusiku lukulu, Esteri arheganyize.