20
Okufundika endagâno omu marhegeko ikumi
1 Nyamuzinda anaciderha ebi binwa byoshi, erhi:
2 Nie Nyakasane, Nyamuzinda wâwe, owakurhenzagya omu cihugo c’e Mîsiri, omu nyumpa y’obujà:
3 Orhahîraga okabà n’abandi banyamuzinda kuleka nie.
4 Orhahîraga okajira enshushano, erhi olwiganyo lw’ebiremwa bibà enyanya emalunga, n’oli olw’ebiremwa bya hano igulu, n’oli eby’omu mîshi ekuzimu kw’igulu.
5 Orhahîraga okabaharâmya erhi kubakolera, bulya niene Nyakasane, Nyamuzinda wâwe, ndi wa mutula otulutumbya abâna oku mabî ga b’îshe, kuhika oku iburha lya kasharhu, n’erya kani, balya banshomba;
6 ci abanzigira, bakashimba n’amarhegeko gâni, nnambajirire aminjà kuhika oku iburha lya kali cihumbi.
7 Orhakâzâg’iderha busha izîno lya Nyakasane, Nyamuzinda wâwe, bulya Nyakasane arhaleka kuhana omuntu oderha busha izîno lyâge.
8 Okâkengêra olwa Sabato, onakâlujira lutagatîfu.
9 Nsiku ndarhu wakaz’ijiramwo emikolo yâwe yoshi,
10 ci olusiku lwa kali nda, luli Sabato wa Nyakasane, Nyamuzinda wâwe.
11 Bulya omu nsiku ndarhu Nyakasane àjira amalunga n’igulu, enyanja na ngasi bibâmwo, ci oku lusiku lwa kali nda àrhamûka. Co cârhumire Nyakasane agisha olwo Sabato, ànalujira lutagatîfu.
12 Okazikenga sho na nyoko, ly’olama myâka minji omu cihugo ohîrwe na Nyakasane, Nyamuzinda wâwe.
13 Orhahîraga okaniga.
14 Orhahîraga okajira eby’enshonyi.
15 Orhahîraga okazimba.
16 Orhahîraga okahamiririza mulungu wâwe obunywesi.
17 Orhahîraga okacifìnja mukà mulungu wâwe, nîsi erhi mwambali wâge kandi erhi mwambalikazi wâge, erhi nkâfu yâge, erhi cihêsi câge, ngasi kalugu ka mulungu wâwe koshi orhacîfînjagako.
18 Olubaga lwoshi lwakâg’iyumva emilazô, emikungulo n’izù ly’omushekera, n’entondo yatumbûka mugî. Olubaga lwabona lwadirhimana, lwanaciyêgûlira kûli. 19 Bàbwîra Mûsa, mpu: «Orhubwîre wêne rhwayumwa; ci Nyamuzinda arharhubwîraga, rhwankanafà!» 20 Mûsa abwîra olubaga, erhi: «Murhayôbohaga! Bulya Nyamuzinda ayishire mpu amurhangule, lyo ecôbà câge cimmubâmwo, mulek’ikâgoma.» 21 Olubaga lwacîyegûlira kulî, ci Mûsa yêhe ayegêra cirya citù Nyamuzinda àlimwo.
Irhegeko liyêrekîre oluhêrero lw’enterekêro
22 Nyakasane anacibwîra Mûsa, erhi: «Ojibwîra Bene Israheli, ntya: mwabwîne mwene oku kurhenga e malunga nakâg’imuganiza. 23 Murhahîraga mukampalikanya na banyamuzinda b’amarhale, mumanye irhondo mwankaderha mpu mwacîjirira banyamuzinda b’âmasholo. 24 Oyîsh’inyubakira oluhêrero lw’obudaka wakârherekêrakwo embâgwa n’enterekêro zâwe z’omurhûla, ebibuzi n’enkafu zâwe na ngasi bantu nânamanyise izîno lyâni, nâyisha ah’oli nkugishe. 25 Ci erhi wankanyubakira oluhêrero lw’amabuye, orhayubakaga n’amabuye mabinje, bulya hano ogagezakwo enkolôlo yâwe, wanagaziza. Orhakâg’irheremera oku mashonezo nka wajà aha luhêrero lwâni, lyo olek’iyêrekana obushugunu bwâwe.»