1 «Endâro oyijire ya birhebo ikumi, obijire bya citâni ciniole n’emyenda y’akaduku k’omukara, ey’akaduku k’akalinga, ey’akalinga kêru ohirekwo ba-kerubimi bakozirwe n’obulenga. 2 “Obulî bwa ngasi cirhebo bubè bwa makoro makumi abirhi na munâni, n’obugali bubè bwa makoro anni. Olwo, lwo lugero lw’ebirhebo byoshi”. 3 “Birhebo birhanu bilungwe ngasi ciguma oku câbo”. 4 “Ohire emishumi oku muhiro gw’ecirhebo cirhanzi, oku kampwempwe k’obulungîro, onajire ntyo oku muhiro gw’ecirhebo cizinda c’obulungîro bwa kabirhi”. 5 “Ohire mishumi makumi arhanu oku cirhebo cirhanzi, na mishumi makumi arhanu oku kampwe-mpwe k’ecirhebo c’obulungîro bwa kabirhi, eyo mishumi ekâyêrekerana ngasi muguma n’ogwâbo”. 6 “Ojire mîno makumi arhanu ga masholo, go galunga ngasi cirhebo oku câbo, na ntyo Endâro ebè ya bûbake buguma bwône”. 7 “Kandi ojire ebirhebo by’amôya g’empene, oyûbakemwo ecihando enyanya z’Endâro. Ojire ikumi na ciguma”. 8 “Obulî bwa cirhebo ciguma: makoro makumi asharhu. Obugali bw’ecirhebo: makoro anni. Lwo na lugero lw’ebirhebo byoshi oku binali ikumi na ciguma”. 9 “Ohangire birhebo birhanu haguma, na bindi ndarhu haguma. Ecirhebo ca kali ndarhu ocigonyere embere z’ecihando”. 10 “Ohire mishumi makumi arhanu oku muhiro gw’ecirhebo cibwisire birya birhangiriza bigwârhîne na yindi mishumi makumi arhanu oku muhiro gw’ecirhebo cibwisire birya bindi bya kabirhi bigwârhîne”. 11 “Ojire mîno makumi arhanu ga mulinga, ogageze omu mishumi, na ntyo gashwêke ecihando coshi cibè bûbake buguma”. 12 “Ecihimbi c’ebirhebo by’ecihando cisigîre, cijêmbukire enyuma ly’endâro”. 13 “N’ebwa buli bw’ebyo birhebo by’ecihimbi cisigîre cije lunda luguma n’olundi oku buli bw’ebirhebo, kandi bijêmbukire oku ntambi zombi z’endâro, bibwîkîre olunda n’olundi lw’endâro”. 14 “Eco cihando ocijirire oburhungiri bw’empù z’enganda-buzi, zishîzirwe ibala lidukula, n’oburhungiri bw’empù mvunge zinozire bujè oku nyanya.”»

15 «Ojire omutûngo gw’Endâro gubè gwa murhi gwa akasiya, mugwike burherema. 16 “Obulî bwa ngasi mutûngo bubè bwa makoro ikumi, n’obugali bw’ikoro liguma n’ecihimbi”. 17 “Ngasi mutûngo gubè na mahango abiri galungîne ngasi ihango omu lyâbo. Kwo onajirage ntyo oku yindi mitûngo y’Endâro yoshi”. 18 “Ojire lukangà lw’okushwêka n’okusêza Endâro, mirhi makumi abirhi ya lukangà olunda lw’emukondwè”. 19 “Eyo mitûngo oku eri makumi abirhi, oyihirekwo marhwêrhwè anni ga marhale: marhwêrhwè abirhi oku ngasi murhi”. 20 “Olunda lwa kabirhi lw’Endâro, emwênè, ohire yo mitûngo makumi abirhi”; 21 “nayo ejekwo marhwêrhwè makumi anni ga marhale, marhwêrhwè abirhi oku ngasi mutûngo gw’olukangà”. 22 “Enyuma ly’Endâro, ebwa nyanja, ohireyo mitûngo ndarhu ya lukangà”, 23 “ojire mitûngo ibirhi ebuzinda bw’Endâro, oku kafende-fende”. 24 “Eyo mitûngo, eshwekane ibirhi-ibirhi kurhenga idako kuhika enyanya aha bushwinjiro omu mpâga ntanzi. Ntyo, kwo eyo mitûngo ibirhi y’oku kafende-fende yayôrha”. 25 “Ntyo, habà mitûngo munâni n’amarhwèrhwè gâyo g’amarhale: marhwêrhwè ikumi na ndarhu, abirhi oku muntûngo muguma n’abirhi kuli ngasi gundi mutûngo”. 26 “Kandi ojire n’emirhamba y’omurhi gwa akasiya: irhanu oku mitûngo y’olundi lunda lw’Endâro”, 27 “irhanu oku mitûngo eri oku kafende-fende k’Endâro, olunda lw’enyanja”. 28 “Omurhamba gw’engusu gushwêkerwe aha kâgarhî k’emitûngo, gurhulukâne kurhenga ebuzinda kuhika obundi buzinda”. 29 “Emitûngo y’lukangà oyishîge amasholo, empagà z’okuhiramwo emirhamba, ozijire za masholo, n’emirhamba nayo oyishîge masholo”. 30 “Oyûbake eyo Ndâro nka kulya wayêrekagwa oku ntondo.”»

31 «Kandi ojire omwenda gw’akaduku k’omukara, n’akaduku k’akalinga, n’akalinga kêru, n’ecitâni ciniole; bahirekwo bakerubimi bakozirwe n’obulenga. 32 “Ogumanike kuli mitûngo inni ya murhi gwa akasiya mishîge amasholo, egwêrhe ngondôzo z’amasholo zigwârhîne oku marhwêrhwè anni g’amarhale”. 33 “Ogwo mwenda gugwarhwe n’amîno g’ebirhale, n’omu ndalâlà yago, mwo mwahira omucîmba gw’Endagâno. Ogwo mwenda lwo lwâbà lubibi lw’Abatagatîfu n’Ahatagatîfu h’Ebitagatîfu”. 34 “Ohire omufûniko oku mucîmba gw’Endagâno omu Hatagatîfu h’Ebitagatîfu”. 35 “Amêza ogahire embere ly’ogo mwenda, n’akamole aha mbêre lya mêza, olunda lw’emukondwè lw’Endâro. Ohire amêza olunda lw’ebumosho”. 36 “Kandi ohire omwenda aha muhango gw’ecihando, mwenda gwa kaduku k’omukara, kaduku k’akalinga, kaduku-kêru n’ecitâni ciniole: mukolo gwa muntu mulenga”. 37 “Ogwo mwenda gugwârhire kuli mitûngo irhanu y’omurhi gwa akasiya, onayishîge amasholo. Engondôzo zâyo zibè za masholo, onazitulirekwo marhwêrhwè arhanu ga mulinga.”»