1 Mwene omuntu, yanka itofali, olihebe embere zâwe: Otâkekwo olugo Yeruzalemu. 2 Enyuma z’aho wânarhangira okugorha olwôla lugo, wanalulundikakwo ebisinga, wanaluhirakwo enkingi, wanaluyunjuza birâlo, wanaluzonza bimpokolo omu marhambi moshi. 3 Okubundi, wanayanka olukalangiro lw’ecûma, lubè nka lwo luyûbasirwe ekarhî kawe n’olugo. Wânayêrekera emunda luli, wânalugorha, loshi oluzonge. Cimanyîso ecôla oku mulala gw’Israheli. 4 Gwesherera oluhande lw’ekumosho, cibarhuze ecâha c’omulala gw’Israheli, Ensiku wakanagez’ogwishîre ntyôla erhi zo onabarhwîremwo ecâha câbo. 5 Niene nkugerîre emyâka y’ecôla câha câbo, gali mango ga nsiku maga­na asharhu na makumi gali mwenda, na muli agôla mango wânabarhulamo ecâha c’omulala gwa bene Israheli. 6 Hano ôbà wamàziyûsa, wânagwesherera kandi olunda lw’ekulyo, wânacîbarhuza ecâha c’omulala gwa Yûda, wanageza nsiku makumi anni. Nâkugerera amango, lusiku luguma oku mwâka muguma, 7 Wânayêrekera lulya lunda Yeruzalemu agorhîrwe, wanayînamula okuboko kwâwe kulyo kurhali kubwîkire na cici, wânaderha ebinwa bya obulêbi kuli Yeruzalemu, 8 Lolà oku nâkushwêka n’emigozi, lyo olekikazihindamukira olu­nda n’olundi, kuhika omale ezôla nsiku zâwe z’okushwêkwa, 9 Kuziga orholage engano, emparabuka, emporoji, ebishimbo, enkole, obulo: ebyôla byoshi wânabivanganya haguma, obidêkere nyungu nguma ojiremwo omugati gwâwe. Ensiku wâkanageza oli ogwêsherire lunda luguma erhi na ogwôla mugati gwâwe gwo onadwîrhe wâlyakwo, 10 N’ebyôla biryo wâkazilyakwo, wânakazirhôla lugero lwa sikêli nguma, byo wâkâlya oku lusiku, oku lusiku luguma loshi. 11 Wâkazinywa amîshi ci konene ga lugero wânakazinywa ecigabi ca kali ndarhu c’esetiri omu lusiku lugumagumà, 12 Ebyôla biryo byâwe wânakazirya nka mburungusè ya mugati ogu wayokeraga oku mazî g’abantu erhi bânabona, 13 Wânaderha erhi: «Ntyâla kwo adesire Nyamubâho Nyamuzinda w’Israheli. Ntyôla kwo bene Israheli bâyishikalya ebiryo byâbo bihemusire omu karhî ka amashanja emunda nabahivire.» 14 Okubundi nanaciderha nti: Mashi! Nyakasane Nyamubâho, iroho lyâni linyinyi­ lirhahemusiri. Kurhenga e burho bwâni kuhika bunôla, ntà mango ciru n’ama­guma nkola ndîre enyama yaniolagwa igosi, nîsi erhi eyi bàsharhulaga, ntà mango enyama ngalugalu ekola enjîre e kanwa. 15 Anacimbwîra, erhi akabà ntyôla nkolaga nkuyêmêrîre okaz’ibiyôca n’amashî ahâli h’amazî g’abantu, okwôla kwo wakaziyôkera omugati gwâwe, 16 Kandi àshubimbwîra erhi: Mwene omuntu, lolà oku nkola navunanga nsherêze embîko y’omugati gwa Yeruzalemu: Bakazilîra oku bihamba ecihimbi c’omugati cigere, n’amîshi nago bânakaziganywa erhi bânajuguma bulya nago gali magere, 17 okwôla koshi ali ebwa kubà omugati n’amîshi byâbulikana: boshi haguma bâhorha banayûmîrire erhi byâha byâbo birhuma.