1 Omu mwâka gwa kali ndarhu, omu mwêzi gwa kali ndarhu, omu nsiku irhanu z’omwêzi nali ntamîre aha mwâni, erhi n’abagula b’e Yûda batamîrage nabo aha mwâni, okuboko kwa Nyamubâho kwanacicîhonda kuli nie. 2 Nakaz’ilolêreza: nabona hali oli nka muntu. Ebyàkazâg’ibonekana nka nsiko kujà idako, gwàli muliro, na kandi kurhenga oku nsiko kujà enyanya bwàli bulangashane buli nka bwa nyenyêzi. 3 Anacilambûla okuli nka kuboko, angwârhira oku mvîri; mûka anacinyêhûkana ekarhî k’amalunga n’igulu, ampêka e Yeruzalemu, omu kuyâgânwa na Nyamuzinda, andêkereza aha muhango gw’omu ndalâlà gudwîrhe gwalola olunda lw’emwênè, ahantu bali bahizire omuzimu w’olûji*8, 3 Nyamwagirwa ayêreka omulêbi oku abantu b’e Yeruzalemu bahanwa bwenêne kulusha. Barhahanirwe amabî b’îshe bajiraga ci bahanirwa amabî gâbo gwonene. ye onalêrha olûji. 4 Ci, lolà oku ahôla ho hali irenge lya Nyamuzinda w’Israheli, lyàli nk’oku nanalibonaga omu kabanda. 5 Anacimbwîra erhi: «Mwene omuntu, yînamulira amasù olunda lw’emwênè». Nanaciyînamulira amasù olunda lw’emwênè, nalola olunda lw’omuhango gwàli emwênè aha luhêrero yo munda ali oyôla muzimu w’olûji, aha muhango. 6 Anacimbwîra, erhi: Wâni mwene omuntu, k’obwîne ebibakola bajira? K’obwîne aga magalugalu galushire olugero Ben’Israheli bali bajira hano, mpu lyo bantenza omu ka-Nyamuzinda kâni? Wâcibona kandi agandi magalugalu manene gâkushologosa. 7 Anacimpêka omu ndalâlà y’aka-Nyamuzinda. Nanacilolêreza: omurhule gwàli omu lukûta. 8 Anacimbwîra, erhi: «Mwene omuntu, rhula olukûta». Nanacirhula olukûta, hàli omuhango. 9 Anacimbwîra, erhi: «Kanya ojemwo, ojilola agôla magalugalu eyôla munda». 10 Nanacijamwo, nakazilolêreza, nanacibonamwo ensanamu za ngasi lubero: ez’ebinyâgâsi n’ez’ensimba zirya zankashologosa omuntu, n’abandi bazimu boshi b’omulala gwa Ben’Israheli, zàli oku nkûta empande zoshi. 11 Na bantu makumi gali nda bw’omu mulala gwa bene Israheli bali bayîmanzire embere z’abôla bazimu na Yazanyahu mugala wa Shafani naye àli ekarhî kâbo, -ngasi muguma erhi anafumbasire ecetêzo câge. N’omugî gw’enshangi erhi gudwîrhe gwadudumuka. 12 Anacimbwîra, erhi: «Kw’obwînage wâni mwene omuntu ebi abagula b’Israheli bajirira omu mwizimya, ngasi muguma omu hiyumpa hyâge hishîge irangi? Banakaziderha mpu: Nyamubâho arharhubona, mpu Nyamubâho arhenzire omu cihugo». 13 Anacimbwîra kandi, erhi: «Wâcibona ebindi bigalugalu bajira». 14 Anacimpeka ebwa muhango gw’aka-Nyamuzinda gudwîrhe gwalola olunda lw’emwênè, nalola oku eyôla munda yali etamîre abakazi, bakazâg’ilakira Tamuzi†8, 14 Tamuzi: izîno lya muzimu.. 15 Anacimbwîra, erhi: «Ka wabwîne obwo mwene muntu? Erhi wâcibona ebindi bigalugalu bilushire ebyôla ». 16 Anacimpêka omu ndalâlà y’aka-Nyamuzinda. Nalola oku aha muhango gwa aka-Nyamubâho, ekarhî k’ecirhînyiro n’oluhêrero bantu makumi abirhi na barhanu bayêrekîze aka-Nyamuzinda omugongo, banadwîrhe balola olunda lw’ebuzûka-zûba, olwôla lunda lw’ebuzûka-zûba bakazâg’ifukamiriza yo izûba. 17 Anacimbwîra, erhi: «Ka wabwîne obwo, wâni mwene omuntu? Ka ntakolaga nfuhirwe obwo n’ebîra bijiro bigalugalu ab’omu mulala gwa Yûda bakola bacihebiremwo? Bamâbumba ecihugo kavango, banakaz’insholoshonza ntyôla: Lolà oku badwîrhe bayegeza ishami oku izûlu lyâbo. 18 Nâni nkolaga nâbajirira ebya bukali, ntababalire, ntanabêre bwonjo. Bâyâkûliza bwenêne omu marhwiri gâni ntanabayunvirhize».