1 W’oyo ojimanyîsa ogûla mulenge oku baluzi b’Israheli. 2 Obabwîre, erhi: Kurhi nyoko ayôrhaga? Nka ntale-kazi omuzindi ntà­le; aka entale-nkazi egwishire ekarhî k’entale ntôrhò, edwîrhe yayonkêsa abâna bâyo*19, 2 Entale-nkazi lwo lubaga lw’Israheli, abâna bâge bwo balya barhegesi b’Israheli.. 3 Yanacitûsa muguma omu bâna bâyo, anacibà mucûka gwa ntale-ndume, ayiga okukazishanshanyula omunyama gwâge, akazilya abantu. 4 Amashanja gayumvîrhe ogwâge, yanacigwârhirwa omu mwîna gwâbo, bayihêka enalimwo emigera omu cihugo c’e Mîsiri. 5 Wa ntale-nkazi abona oku busha arhamîre, ohulangâlire bwanyiha: Yashubirhôla wundi mwâna muguma omu bâna bâyo, yanacimulera bwinjà, alinda abà mucûkà gwa ntale-ndume. 6 Arhondêra ahivira omu karhî k’ezindi ntale, anacishuba mucûkà gwa ntale-ndume, ayiga okukazishanshanyula omunyama gwâge, akazilya abantu. 7 Akacîrhunika oku nyumpa zâbo, asherêza engo zâbo, ecihugo n’abantu bâco bakazigeramwo omusisi erhi bayumvagya omulumbo gwâge. 8 Amashanja gamurhabâlira, byo ebihugo by’eburhambi; banacimurhegeka n’akasira, anacigwârhirwa omu mwîna gwâbo. 9 N’emigera yâbo bamuhira omu irhonga, bamuhekera mwâmi w’e Babiloni banaciyihêka omu nyumpa eyûbasirwe kulî, lyo balekikayumva izù lyâge, omu ntondo z’Israheli. 10 Nyoko kw’ali nka muzâbîbu, murhwêre oku burhambi bw’olwîshi, gwakaziyâna gwanajira ebyâsi binji, bunji bw’amîshi burhuma. 11 Gwanacimerakwo amashami mazibuzibu, ganacibà rhurhi rhw’obwâmi; ganacikula, ganacilîha, gahika omu karhî k’ebitù, bakazisômerwa n’obulî bwâgo, n’obunji bw’amashami gâge. 12 Ci kônene bagukûzirage, bagukwêba oku idaho, empûsi y’ebuzûka­-zûba yayumya amalehe gâgo, gwanacicîvunikira, ishami lyâgo lizibuzibu lyanaciyuma, omuliro gwalisingônola. 13 Lolà gwo gukol’irhwêrwa omu irungu, omu cihugo ciyûmûsire na c’idûrhu. 14 Omuliro gwanacipamuka omu ishami lwâge, gwanacifonfomera amashami n’irehe lyâge. Gurhakacibona lirya ishami lyâgo lizibuzibu, akàli kola karhi k’ebwâmi. Guli mulenge ogwôla; gunakolêsibwe nka mulenge.