BIBLIYA NTAGATIFU OMU MASHI Hozeya 2

Omu nsiku zâyisha

1 Bene Israheli bâluga nka mushenyi gw’omunyanja, gwo gurhaganjwa gurhanagerwa. Ahâli h’okucikaderhwa: «Murhali-Lubaga-Lwâni», bâkaziderhwa Bene-Nyamuzinda Ozîne. 2 Abâna ba Yûda n’ab’Israheli balungana*, bâbà na mwâmi muguma, bânagandâza kurhaluka olubibi lw’ecihugo câbo bulya lwâbà luhamu olusiku lwa Yizreeli. 3 Bwiragi bene winyu, erhi: «Lubaga lwâni», na bâli binyu, erhi: «Musîmwa»†.

Obuhane n’obucîyunjuze bw’ishanja oku bubaraga

4 Muhêke nyoko lubanja mumusambîse‡. Bulya arhaciri mukânie, nâni ntaciri ibà. Aleke obubaraga bwâge, arhenze obugonyi omu cifuba câge. 5 Akabà nanga namugendêsa bushugunu, mmujire nk’olusiku àburhagwa, nâmushushîsa obwerûle, namujira nk’idaho lyûmu, mmuyirhe n’enyôrha§. 6 N’abâna bâge ntacibalonza bulya bali ba bubaraga. 7 Nêci, nnina yàbîre mbaraga, owababurhaga àcîhemwîre; aderha, erhi: «Nâkulikira abalume bâni, bo bampà omugati n’amîshi, emishangi n’emipira, amavurha n’ecinyôbwa.»* 8 Co cirhumire nkola nafuka enjira yâge n’olûrhe, nâziba enjira yâge abule ihulukiro. 9 Akulikîre abîra bâge, ci arhabahikekwo; abalonza arhacibabone. Buzinda aderhe, erhi: «Nkola nashubira emwa ibanie murhanzi, bulya nali mwinjà mîra kulusha buno.» 10 Arhamanyaga yêhe oku nie nakâgimuhà engano, amamvu mahyâhya n’amavurha, nie namuhâga obuhirhi bw’amasholo n’ensaranga†, byo akagirhumikiramwo Baali!

11 Co cirhumire, nkola nâshubiyanka engano yâni omu mango gâyo, n’amamvu gâni mahyâhya amango gâgo, nâmunyaga emishangi n’emipira yâni abwîsiremwo obushugunu bwâge. 12 Na ntyo mmuyêrekane n’enshonyi zâge emwa abîra bâge, na ntâye wacimuntenza omu ikumi ly’eminwe. 13 Nârhenza amasîma gâge goshi, ensiku nkulu zâge, emyêzi yâge mihyahya, esabato zâge, n’emirimbo yâge yoshi. 14 Nahererekeza enkoma zâge n’amalehe gâge akâgilimbira, mpu: «Balume bâni babimpâga.» Nâbijira bulambo ensimba zâkâyâbukiramwo‡. 15 Nâmuhana oku nsiku za Baali, ezi akagimurherekêramwo, àkola ayambîrhe engolo n’amagerha. Niehe anyibagira! Kanwa ka Nyamuzinda.

16 Co cirhumire lêro nkola namurhebêba, mmuhêke omu irungu§, 17 nshambâze omurhima gwâge. Kurhenga aho mmugalulire enkoma zâge n’olubanda lwa Akori, muhango gwa bulangâlire, ashuza lêro nk’amango aciri mugêngere n’amango arhengaga omu cihugo c’e Mîsiri*. 18 Olwo lusiku lêro, -kwo Nyakasane adesire-, wanderha, mpu: «Ibanie», orhacinderhe mpu «Baali wâni»†. 19 Narhenza amazîno ga ba Baali omu kanwa kâge, barhakanaciderha ago mazîno bundi. 20 Olwo lusiku, nâjira kuli bo eciragâne haguma n’ensimba z’emuzirhu, enyunyi z’emalunga n’ebiyandala oku idaho; emiherho, engôrho, n’ebîrha, nâbivuna mbikage omu cihugo, nâmujira adêkerere n’omurhûla. 21 Nâkuyanka lwoshi ensiku zoshi, nâkuyanka omu bushinganyanya n’omu irhegeko, omu buzigire n’omu bwonjo. 22 Nâkuyanka omu bwemêzi, ntyo omanyîrire Nyamuzinda.

23 Mw’olwo lusiku, - kanwa ka Nyamuzinda, - nâshuza omu mpingu, nabo bashuze omu igulu. 24 lgulu lyâshuza omu kulêrha engano, amamvu mahyâhya n’amavurha, nabo bashuze e Yizreeli. 25 Nâmujira ishwa limîre omu cihugo, nâbabalira Bashombe, nabwîra Lurhali-Lubaga-Lwâni, nti: «We lubaga lwâni», naye anshuze, erhi: «Nyamuzinda wâni».

Hozeya
<
2
>

*2:2 2, 2 Olwo lusiku abâna ba Yûda n’ab’Israheli bahimana bashenshagane ecihugo na ntyo barhenge omu bujà.

†2:3 2, 3 Lêro gakola mazîno minjà garhaciri nka agali muli 1, 6 na 1, 9.

‡2:4 2, 4 Muhêke nyoko lubanja mumusambîse: emwa Abalêbi, okuhêkana lubanja bwàli bwôrhere: 4, 1; Iz 3, 13; Mik 6, 1; Yer 2, 9. Aha, Nyamuzinda ye ohêrhe olubaga lwâge lulalahi lubànjà.

§2:5 2, 5 Omu bihugo by’ebushoshôkero bw’izûba erhi bahanaga omukazi banamuleka bushugunu: Eze 16, 37-39; Iz 47, 2-3; Yer 13, 22; Nah 3, 5; Maf 17, 10. 2. 7: Oyo mukazi ashushanyîbwe n’ecihugo c’Israheli. Obuhirhi bwa Kanâni bwarhumaga Israheli ahirima omu câha (10, 1; 13, 6) bwâhirigirha: 4, 3; 5, 7; 13, 15.

*2:7 2, 7 Abalume bâni, bo banyamuzinda bw’obunywesi b’e Kanâni.

†2:10 2, 10 Ebyo byoshi byakagikolêsibwa omu kulonza okuhà Baali irenge.

‡2:14 2, 14 Olukoma n’amalehe: cimanyîso c’omurhûla n’obushagaluke kurhondêrera amango ga Salomoni (1 Bâm 5, 5).

§2:16 2, 16 Amango gw’olubungo, oluhaga lwaheza obwôrhere bw’akalamo k’omw’irungu (Amo 5, 25; Hoz 12, 10). Erhi Israheli aciri mwâna (Hoz 11, 1-4) arhalimanyire banyamuzinda b’ihanga lya bene. Akagishimba Nyamuzinda wali omu citù (Hoz 2, 16-17; Yer 2, 2-3).

*2:17 2, 17 2, 17: Lubanda lwa «Akori» luganjirwe omu mbanda zibà hôfi na Yeriko ziyêrekîre omu ndalâlà y’ecihugo, mwo bakagijirira ebijiro bigalugalu birhasîmîsa Nyamuzinda: Yoz 7, 24-26. Izîno ly’olwo lubanda kwo kuderha: lubanda lwa buhanya (Yoz 7, 26) lwâyishibà muhango gwa bulangâlire, bulya lwâhinduka njira ya kujà omu cihugo citagatîfu.

†2:18 2, 18 Baali: kwo kuderha «Nnawîrhu» ntyo kwo ba nyamuzinda b’e Kanâni bakagiderhwa.