1 Nyakasane anacimbwîra, erhi: Orhôle olupaho lunênênè, oyandikekwo na kala kalâmu abantu bakolêsa, erhi: Maher-Shalal-Hash-Baz. 2 Nanaciyanka bahamîrizi babirhi bankacîkubagirwa, bo Uriya, mudâhwa, na Zakariya, mwene Yeberekiya. 3 Okubundi nanaciyegera omulêbi-kazi. A­rhôla izîmi, aburha omwâna-rhabana. Nyakasane anacimbwîra, erhi: «Omuyîrike izîno*8, 3 Nyakasane akahâna izîno erhi hali ecirhumire. Abâna bakâg’iyîrikwa omu kushimba nk’oku babusirwe erhi omu kushimba oku Nyamuzinda âmurheganyize (Murh 30, 6…). lya Maher-Shalal-Hash-Baz. 4 “Bulya embere oyo mwâna amanye okudâda, mpu larha, erhi nyâmà, babà erhi bahesire obugale bw’e Damasko n’eminyago y’e Samâriya embere z’omwâmi w’e Asîriya”».

5 Nyakasane ashub’imbwîra, erhi: 6 «Obu olu lubaga lwagayire amîshi ga Silowè, agahulula bunyi-bunyi, lwabul’ikadirhimana embere za Rasoni na mwene Ramalyahu. 7 “omanyâge oku akola abarhulirakwo amîshi g’Olwîshi, mîshi ga muhûsi munene na manji bwenêne, ye mwâmi w’e Asîriya n’irenge lyâge lyoshi. Lwayisha lwagera oku mibunda yalo yoshi, luyunjulire kuhika oku bikunguzo byâlo byoshi”. 8 “Lwacihandalika-handalika, lwajà cingana omu lya Yûda, lwabirira, lwagera omu kâgarhî, kuhika omu igosi, na mw’okwo kujà lwashanjûla emyaro yalwo, lulinde luyunjuza ecihugo câwe coshi, wâni Emanûweli!” 9 “Mumanye, mwe mbaga mweshi, munajugumane! Murhege amarhwîri, mwe bihugo b’ihanga mweshi! Muyambale emirasano yinyu, munajugumane! Muyambale emirasano yinyu, munajugumane!” 10 “Muhige emihigo: yafananda; muderhe akanwa: karhâgwârhe, bulya Nyamuzinda ali haguma nîrhu.”»

11 Nêci, ntyâla kwo Nyakasane ambwîzire erhi angwârhira oku kuboko, antonda mpu ntashimbaga amâjira g’olu lubaga, erhi: 12 «Murhaderhaga ‘bugoma’ ngasi koshi olûla lubaga luderha ‘bugoma’; murhayôbohaga ebi badwîrhe bayôboha, murhajugumanaga. 13 “Nyakasane Nyamuzinda w’Emirhwe, ye mukwânîne okuderha Mutagatîfu, yêne mukwânîne okurhînya”. 14 “Ye wâbà luhêro, ibuye ly’okusârhaza na lwâla lw’okuhirimya enyumpa ibirhi z’Israheli; âbà mugozi na murhego oku bantu b’e Yeruzalemu.”. 15 “Banji bâsârhala, bâhirima banavunike, bâgwa omu murhego banagwaârhwe.”. 16 “Obwo buhamîrizi obuhamike, ezo nyigîrizo ozihirekwo eciziriko omu murhima gw’abashimbûlizi bâni.”» 17 Ncîkubagîre Nyakasane ofulisire bene Yakôbo obusù bwâge, ye na­ngalire. 18 Niono n’abâna Nyakasane ampâga, rhuli bimanyîso na birhangâzo omu Israheli, byarhenga emwa Nyakasane Nyamuzinda w’Emirhwe ojira e­ndâro yâge oku ntondo ya Siyoni. 19 Nêci, bammubwîra, mpu: «Muj’idôsa abazimu n’abashonga bakaz’ihwêhwêrheza n’okushungûrha. K’olubaga lurhakwânîni ludôse banyamuzi­nda bâlwo n’okurhûla olw’abazîne emw’abafu?» 20 Ako kanwa bakaderha mpu bayigîrize banahamîrize, ci barhakâbona buce!

21 Bâgeragera omu cihugo, bagogomîrwe, n’enda yayêkemba; na hano ishali libà lyamâbaluma bwenêne, bakunira, barhondêre okuhehêrera mwâmi wâbo na Nyamuzinda wâbo. Bâgalamira emalunga; 22 kandi bashub’ilola oku idaho: barhabona erhali mirhanyo n’omwizimya, endunduli y’okujugumya n’obudufu burhagwêrhi hya bulangashane ciru n’ehisungunu. 23 Ka gurhali mwizimya guciri omu cihugo cirimwo emirhanyo?

Omu nsiku ntanzi, Nyakasane abonêsize ecihugo ca Zabuloni n’eca Neftali enshonyi; omu nsiku zâyisha, âkuza enjira y’oku nyanja, ishiriza lya Yordani, n’ecihugo c’olubaga.