1 Obulêbi buyêrekîre Mowabu. «Nêci, obudufu anyagagwamwo. Ar-Mowabu aherêrekera. Nêci, obudufu anyagagwamwo, Kir-Mowabu aherêrekera. 2 Bakola basôkera ebwa mahêro e Diboni mpu bagend’ilakirayo. E Nebo n’e Madaba, Mowabu ali omu mulenge: amarhwe goshi gali makungûle, n’amânwa goshi gali mamôme. 3 Abagera omu njira, masunzu bayambîrhe; oku burhungiri bw’enyumpa n’omungo, boshi badwîrhe babanda endûlù banadubula emirenge. 4 Heshiboni na Eleyâle badwîrhe bayâma; izù lyâbo lidwîrhe lyayumvîkana kuhika e Yahasi. Co cirhumire abalwî b’e Mowabu badwîrhe babanda orhuhababo; yêshi yêshi anajongonosire. 5 Omurhima gwâni gudwîrhe gwalakira Mowabu: abantu bâge bâbo bajà bayâka kuhika e Sowari n’Egalati-Shelishiya! Omurhezi gwa Luhiti badwîrhe bagusôka erhi banajà balaka; omu njira y’e Horo­-Nayimi bayisha babanda endûlù! 6 Amîshi ga Nimurimu gàganyire; olubala lwayumire, akahasi kahirigirhe, harhaciyimbwa hyasi hibishi! 7 Okwo kwarhuma ebirugu byàli bicisigîre, ebi bâli bacijire babîka, babiyîkirana ishiriza ly’omugezi gw’Emirhanda. 8 Nêci, akahababo kâbo kalumîre hoshi omu cihugo ca Mowabu, endûlù zâbo zahisire cingana e Egalayimu, zayumvîkîne cingana e Beri­-Elimu. 9 Amîshi ga Dimoni gakola gayunjwîre mukò! Ci naciyûshûlira Dimoni obundi buhanya: entale zâcîguga oku bàfumire olufù lw’e Mowabu, na kuli balya bâbà bacisigîre omu cihugo!»