1 Obulebi buyêrekîre Mîsiri. Alà oku Nyakasane amashonera oku citù cibidu, amaj’e Mîsiri. Ba­ nyamuzinda b’obwîhambe b’e Mîsiri bamâdundagana embere zâge, n’abanya-Mîsiri omurhima gwamâbarhoga omu nda. 2 Nkola nakoza abanya-Mîsiri bône na nnène; bâlwîsanya bône na nnène: ngasi muntu alwîsa mwene wâbo, ngasi muntu âlwîsa omulungu wâge, ecishagala câlwîsa ecâbo cishagala, n’obwâmi bulwîse obwâbo bwâmi. 3 Omûka gwa Mîsiri gwamurhengamwo, n’emihigo yâge nayitulumbya. Bâgwîra okudôsa banyamuzinda b’obwîhambe, n’abazimu. n’emyômoka n’abashonga. 4 Nalikirira Mîsiri omu maboko g’omurhegesi mudârhi, n’omwâmi muminya ayîma muli bo. Kwo adesire ntyo Nyakasane Nyamuzinda w’Emirhwe. 5 Amîshi gâhirigirha omu nyanja, olwîshi lwâgana lunayûmûke. 6 Emibunda yakaz’ibaya, amîshi g’omu nyîshi z’e Mîsiri gajà gahonga n’okuyuma amasheke n’amashâsha gayumûka. 7 Amalambo gali eburhambi bwa Nili n’agali hala Nili acilohera omu nyanja, na ngasi ebi Nili ameza byoshi byâyumûka, bihêkwe n’e­ mpûsi binahirigirhe. 8 Abashâna balaka banalakûle; ngasi bakwêba olulobo omu Nili bajà boshi omu mishîbo; na balya boshi bakaz’ilambulira orhwêshe rhwâbo omu mîshi, bazânwa. 9 Ngasi bakâg’ihinga ecitâni bâtulutumba; abakazi bakâg’izâbûla ecitâni n’abalume bakâg’icihunga, batulûla n’entanya. 10 Abalusi b’emyenda bâgogomerwa, ngasi boshi bakûla omushêgo omu mukolo gwâbo batwîka omurhima. 11 Nêci, kwo binali, abaluzi b’e Sowani bacîbêra bingolongolo! Abagula b’omu bahanûzi ba Faraoni mwâmi w’e Mîsiri badwîrhe basinga ihano ly’obuhwinja. Kurhigi mwankahash’ibwîra Faraoni mwâmi w’e Mîsiri, mpu: «Ndi mugala w’abagula, nkomoka y’oku bâmi ba mîra?» 12 Ngahi baligi abagula bâwe? Lêro bakubwîrizagye banakumanyîse migabo mici Nyakasane Nyamuzinda w’emirhwe ahigîre Abanya-Mîsiri. 13 Abaluzi b’e Sowani bashubire bingolongolo; abaluzi b’e Nofu badwîrhe bacîrheba bône; nabo abarhambo b’ebishagala byâge badwîrhe bahabula Mîsiri. 14 Nyakasane anabahiziremwo omurhima gw’ecizungu; badwîrhe bahabula Mîsiri omu bijiro byâge byoshi, nka kula omulalwe ajà adandabagana emunda ajà ashalira. 15 N’omu Mîsiri murhacijirika mukolo, oli ogu irhwe lyankajira, oli ogu omucira gwankajira, oli ogu ecigundu nîsi erhi ogu amashushi ga­nkajira.

16 Mw’olwôla lusiku, abanya-Mîsiri babà nka kula abakazi bayôrha: bâjuguma banarhemuke n’obwôba babona Nyakasane Nyamuzinda w’Emirhwe abadundira okuboko*19, 16 Emyanzi y’obucunguzi eyigîrizibwe oku bantu boshi, ci arhali ya bene Israheli bône. (Lolà muli Iz 40—45; Yer 44, 1).. 17 Ecihugo ca Yûda cashuba côbà kuli Mîsiri: ngasi mango ânayumve bacîderha, ânageremwo omusisi akengêra omuhigo Nyakasane Nyamuzinda w’Emirhwe amuhigiraga. 18 Mw’olwo lusiku, omu cihugo c’e Mîsiri mwâbe bishagala birhanu byakaderha olulimi lw’e Kanâni binakacîgashira Nyakasane Nyamuzinda w’Emirhwe. Ciguma ca muli byo caderhwa «Cishagala c’Izûba». 19 Mw’olwôla lusiku, omu kâgarhî k’ecihugo c’e Mîsiri mwâbà oluhêro lurherekîrwe Nyakasane, na hôfi h’olubibi bagwîka ibuye ly’okuyîbuka Nyakasane. 20 Câbà cimanyîso ca kuhamîriza Nyakasane Nyamuzinda w’Emi­rhwe omu cihugo c’e Mîsiri. Amango balakira Nyakasane mpu abarhabâle oku babisha babalibuza, âbarhumira Omucunguzi wabacinga anabalîkûze. 21 Olwo lusiku Nyakasane acîmanyîsa oku banya-Mîsiri, nabo abanya-Mîsiri bamanya Nyakasane; bâkâmulerhera enterekêro n’entûlo; bâkâjirira Nyakasane ebiragâne banabiyûkirize. 22 Nyakasane âshûrha abanya-Mîsiri; âshûrha anafumye; bâgaluka emunda Nyakasane ali, naye âbayumvirhiza anabafumye. 23 Olwo lusiku, habà omulimbwa gwarhenga e Mîsiri guje e Asîriya; ab’e Asîriya bakâj’e Mîsiri n’abanya-Mîsiri baj’e Asîriya, n’abanya-Mîsiri bâkaz’irhumikira Asîriya; gwâbà mugisho omu kâgarhî k’igulu. 24 Olwo lusiku, Israheli abà w’omu basharhu boshi na Mîsiri n’Asîriya; gwâbà mugisho omu kâgarhî k’igulu. 25 Nyakasane Nyamuzinda w’Emirhwe ânabagishe aderhe, erhi: «Agishwe Mîsiri, lubaga lwâni, n’Asîriya, mukolo gw’amaboko gâni, n’Israheli, cigabi câni c’omwîmo».