1 Obulêbi buyêrekîre «Olubanda lw’Okubonekerwa»*22, 1 Yeshayahu àshambîre ebi binwa erhi Hezekiyahu amâyûsihima abanya Asûru, mwâka gwa 701 e­mbêre z’okuburhwa kwa Yezu.. Cirhumire mwasôkera mweshi oku nyumpa, 2 wâni lugo lushâmîra bwenêne, lugo lwa kadugundu, lugo lwa masîma? Emifù yâwe erhali ngôrho yayiyisire, arhali oku ntambala yafîrîre. 3 Abarhambo b’abasirika bâwe bacîyâkîre boshi caligumiza, bagwârhwa n’abafôla emiherho; abantu bâwe boshi bàbagwârhîre mpira haguma bâli bakola mpu bayâkira kulî. 4 Co carhumaga nderha, nti: «Murhandolagakwo, muleke ndake ndakûle! Murhacîrhamagya mpu mwantûliriza kw’obu buhanya bwarhogîre mwâli w’olubaga lwâni». 5 Bulya luli lusiku lwa côbà, lwa kurhindibuka n’okubonêsibwa eza mêmè, lusiku lurhumirwe na Nyakasane Nyamuzinda w’Emirhwe. Omu Lubanda lw’Okubonekerwa, enkûta zahongosire banakola badwîrhe balongeza oburhabâle ebwa ntondo. 6 Elamu amâcîbambîza emyampi, n’abantu bashonyire oku ngâlè n’oku biterusi, naye Kiri amâharhamwo empenzi, 7 Orhubanda rhwâwe rhulushire orhundi obwinjà rhuyunjwîre ngâlè, nabo banakushona oku biterusi bakuhandîre aha lusò. 8 Na ntyôla Yûda arhacigwêrhi cafungira†22, 8 Mwakengîre oku cibikira amîshi muhako, ci, mwayibagira okuhûna oburhabâle emwa Nyamuzinda.. Olwo lusiku, wâyêrekeza amasù ebwa nnundo y’emirasano mibîke omu nyumpa y’omu mizirhu! 9 N’emirhule eri omu lugo lwa Daudi, mwabwîne oku eri minji! Mwacîhakîre amîshi omu ciyanja ciri ah’idako. 10 Mwaganjire enyumpa ziri omu Yeruzalemu, mwanahongola enyumpa mpu lyo muzibuhya enkûta. 11 Mwanaciyûbaka ecibîkiro ekarhî k’enkûta zombi, mpu lyo mushâhulizamwo amîshi g’eciyanja ca mîra. Ci murhaciderhaga mpu mwayêrekeza amasù emw’olya okola ebyo byoshi, olya wabirheganyagya kurhenga mîra, murhamubonaga. 12 Nyakasane Nyamuzinda w’Emirhwe ali ammulalisire olwo lusiku mpu mulake munabande endûlù, mukungûlwe irhwe munayambale sunzu. 13 Ci gwabà mwishingo n’obushagaluke: okubâga enkafu, okuniga ebibuzi. okulya enyama n’okunywa amamvu, mpu: «Rhulye rhunanywe, bulya irhondo rhwacîfîra!» 14 Nyamuzinda w’Emirhwe anacinfululira aka kanwa, ambwîra, erhi: «Eco câha cirhakababalirwa kuhika okufà kwinyu», kwo adesire Nyakasane Nyamuzinda w’Emirhwe.

15 Nyakasane Nyamuzinda w’Emirhwe anacimbwîra, erhi: «Kanya, ojè emunda Shebena ali, ye murhindisi w’ecôgo ca mwâmi omubwîre, erhi: 16 “Mwanya muci ojira hanôla na ndi wakuhâga akashambala, obûla wacîhumbiraho enshinda, obûla wayigôya burherema, n’obûla wacîrhendêzeza icumbi omu lwâla?” 17 “Alà oku Nyakasane akola akudundaganya, akukwêbe kulî, wâni sho! anakurhulube bwinjinjà”, 18 “akuzingezinge anakuhirike ojè wahenanguka nk’ibâle lyahonera omu bulamho bugali-gali. Yo wafîra eyo munda, we n’engâlè olimbira, we okâhemula ecôgo ca nnâhamwinyu!” 19 “Nâkunyaga ecikono câwe, nnankurhenze aha mwâwe”. 20 “Na muli olwo lusiku lwonênè, nâhamagala omurhumisi wâni Eliyakimu, mwene Hilikiyahu”. 21 “Nâmuyambika ecishûli câwe, mmukenyeze olunigi lwâwe, nnamuhè obuhashe bwâwe, abè y’îshe w’abantu b’omu Yeruzalemu n’ab’omu nyumpa ya Yûda”. 22 “Namuhira olwigulo lw’enyumpa ya Daudi aha lurhugo, akaz’ihamûla, na ntâye wacihamike, akazihamika, na ntâye wacihamûle”. 23 “Namugwîka nka lubambo omu budaka buzihu, abè ntebe y’irenge omu nyumpa y’îshe”. 24 “Ye irenge ly’enyumpa y’îshe lyoshi lyâmananakwo, ababusi n’abâna, n’orhulugu rhutya-rhutya, kurhenga orhubêhè kuhika oku rhubindi rhwa ngasi lubero”. 25 “Muli olwôla lusiku, kanwa ka Nyamuzinda w’Emirhwe, lulya lubambo lugwîke omu budaka buzibu lwamanyuka, lushuguke lunarhoge, na gulya muzigo gwakâg’imananakwo, gwârhibuka, bulya kwo Nyakasane adesire ntyo”».