51
Israheli acîkubagira Nyakasane
1 Muyumvîrhize, mwe mushimba obushinganyanya, mwe mulongereza Nyakasane. Lolêrezi ibuye mwarhengagamwo n’enyenga mwakulagwâmwo. 2 Lolêrezi Abrahamu, sho winyu, na Sara wammuburhaga. Ali yêne erhi mmuhamagala, ci namugisha, najira ayôloloka. 3 Nêci, Nyakasane ababalîre Siyoni, ababalîre ebigûkà byâge byoshi. Irungu lyâge alijira aka Edeni, n’idaho lyûmu alihindula ishwa lya Nyakasane. Bâbonamwo obushagaluke n’amasîma; bâkaz’ivugiramwo omunkwa n’okuzihiramwo ennanga.
Obushinganyanya bwa Nyamuzinda bwâgandâza
4 Onyumve bwinjà, we lubaga lwâni, we ishanja lyâni, ontege okurhwiri. Bulya irhegeko likola lyarhenga emunda ndi, n’obushinganyanya bwâni bwâbà kamole k’amashanja. 5 Obucîranuzi bwâni buli hôfi. obucire bwâni buyîruka n’amaboko gâni gakola gatwa emmanja z’amashanja. Ebirhwa byampebakwo obulangâlire bwâbo, na ntyo bicîkubagire okuboko kwâni. 6 Galamiri emalunga, mulole igulu bwandagala, bulya amalunga gâyishicîberamwo nka mugî, igulu lyâyôrha mirendwè nka mwambalo, n’abayûbaka muli lyo, nabo bagukumuka nka nzi. Ci obucire bwâni bwayôrha buli ho ensiku n’amango, n’obushinganyanya bwâni burhakayûrha. 7 Munyumve bwinjà, mwe muyishi obushinganyanya, wâni lubaga lubîkirira irhegeko lyâni emurhima. Murhayôbohaga ebijâci by’abantu, murharhemukaga ebwa kubà bamammulogorhera. 8 Bulya kwo babà nka mushangi gwalîrwe n’enshwa, na nka môya gamalîrwe n’ecibungu. Ci obushinganyanya bwâni bwayôrha bubâho ensiku n’amango, n’obucire bwâni kurhenga iburha kuhika oku lindi.
Butulûko bwa Nyakasane
9 Zûka, zûka, cihundikire emisî yâwe, wâni kuboko kwa Nyakasane!
Zûka nka omu nsiku za mîra, nka omu myâka yageraga!
10 K’arhali w’olya watumirhaga Rahabu wanarhulungula Wankuba-joka?
K’arhali w’olya waganyagya enyanja n’amîshi g’ekuzimu?
K’arhali w’olya watwâga enjira emuhengere mpu lyo balya wacungulaga bayîkira?
11 Abalîkûzibagwa na Nyakasane bâyish’igaluka,
bâyish’ijà omu Siyoni erhi banayisha babanda orhuhababo rhw’obushagaluke,
n’obusîme bw’ensiku n’amango bwamoleka amalanga gâbo;
obushagaluke n’omwîshingo byâbayunjula,
amalibuko n’endûlù byâhirigirha.
Nyamuzinda ye Murhûliriza
12 Niene, niene nie ndwîrhe nammurhûliriza!
Oligi ndi wayôboha omuntu wânafè,
omuntu oburhwa n’owundi, oli nka hyâsi?
13 Wayibagîre Nyakasane wakulemaga,
owabungulaga amalunga anasimika igulu;
wakayôrha wa juguma omulegerege gwoshi
erhi bukali bw’okakurhindibuza burhuma,
bulya ko ali nk’odwîrhe wacirheganya okukuherêrekeza.
Ci ngahigi buli obukunizi bw’olya odwîrhe akulibuza?
14 Omushwêkwa ali hôfi ashwêkûlwe,
arhâcifire omu mpamikwa, arhanacibule eci alya,
15 Nie ono nie Nyakasane, Nyamuzinda wâwe,
ovanganya enyanja n’empimbi z’amîshi gâyo.
Izîno lyâni, nie Nyakasane, Nyamuzinda w’Emirhwe,
16 Mpizire ebinwa byâni omu kanwa kâwe,
nnankubwîkire n’ecîhôho c’okuboko kwâni, omu kugwîka amalunga,
omu kusinga igulu n’omu kubwîra Siyoni, nti: «We lubaga lwâni!»
Yeruzalemu ayimanzibwa na Nyakasane
17 Zilka, zûka, yimanga, wâni Yeruzalemu,
we wanyweraga omu maboko ga Nyakasane akahe k’obukunizi bwâge,
we wanywaga wanashongôza akabehe k’okudandabaganya!
18 Ciru ntà muguma wamuhabwîre muli balya bagala aburhaga,
ntâye ciru n’omuguma wamugwârhîre oku kuboko
muli balya bâna boshi aleraga!
19 Alaga mahanya abiri gacihondire kuli we: ndi wakulakira?
Okuhagulwa n’okushâbirwa, ishali n’engôrho: ndi wakurhûliriza?
20 Abâna bâwe babengîre, bakola balambûkîre omu ngasi marhambi g’enjira zoshi,
bakola bali nka kula akashafu kagwârhwa omu murhego,
bamâzigânwa n’obukunizi bwa Nyakasane,
n’omuhigo gwa Nyamuzinda wâwe.
21 Co cirhumire, yumvagya okûla, oyu muhanya,
oyu mulalwè, ci arhali ndalwè ya mamvu!
22 Kwo adesire ntyâla, Nyakasane Nyamubâho,
Nyamuzinda wâwe, ofungira olubaga lwâge:
Alà oku nkola narhenza akabehe k’okudandabaganya omu nfune zâwe,
akabehe k’obukunizi bwâni; orhakacikanywakwo bundi,
23 Nakahira omu nfune z’abanzi bâwe, balya bakâg’ikubwîra,
mpu: Gwishira oku idaho, rhukugerekwo!
Na ntyo wakaz’iherhamya omugongo gwâwe nka njira y’oku idaho,
nka mulimbwa bakaz’igeramwo.