1 Abaciri omu mahêma erhi bayumva ogwo mwanzi, nabo bafuduka. 2 Boshi bajamwo entemu n’obôba, ntâye waciberaga aha owâbo ali, ci erhi ngasi njira banarhimanaga omu kabanda n’oku ntondo. 3 Na ngasi boshi banahandaga omu ntondo omu Betuliya nabo barhangira okuyâka. Okubundi obwo bene Israheli boshi ngasi bantu bakola batula entambala babavangamukirakwo. 4 Uziyahu anacirhuma entumwa omu Betomastaimi n’omu Bebayi, e Kobe, e Kola n’omu cihugo ca bene Israheli coshi, mpu bagend’imanyîsa okwabîre, mpu boshi banacirhunike oku bashombanyi babanigûze. 5 Erhi bene Israheli banayumva ogwo mwanzi, boshi banacicîrhuna kuli bo caligumiza babahojahoja bahibi kuhika aha Koba. N’abantu b’e Yeruzalemu nabo banaciyisha balibisire, na ngasi bandi banayûbakaga omu ntondo boshi, bulya babamanyisize olwabire omu cihando c’abashombanyi bâbo. Abantu b’e Galadi n’ab’e Galileya nabo banacibatumirhira omu marhambi g’emwâbo, kuhika bayikirira e Damasko n’olunda lw’emwâbo. 6 Abâli basigîre omu bantu b’e Betuli, banaciyandagalira omu cihando c'Abanyasîriya. Banacihagula bwenêne, bagala la. 7 Nabo bene Israheli erhi bashûbûka eyo munda balihula embaga banacirhôla ngasi byanali bisigîre byoshi. Ecishagala n’emirhundu na ngasi cigabi ca bantu bali omu kabanda nîsi erhi omu ntondo nabo banaciyisha, bahagula kwâbo, banyaga bintu binji bwenêne, bulya gwàli mwandu.

8 Omudâhwa Yoyakimu n’ihano ly’abagula boshi b’e Yeruzalemu banaciyisha mpu nabo bône bacîbonere oku minjà Nyamuzinda anajiriraga olubaga lwâge lw’Israheli, mpu banabone Yuditi, banamubwîre ebinwa by’okumuhà obwangà. 9 Erhi banamuhikaho, boshi bamugisha kuguma, banacimubwîra, mpu: «We bushagaluke bw’Israheli, we kucivuga kunene kw’Israheli, oku irenge linene ly’olubaga lwîrhu. 10 Wajizire okwo koshi n’amaboko gâwe na Nyamuzinda anasîma bwenêne. Wajirire Israheli kwinjà, Oyagirwe, na Nyamuzinda ogala byoshi n’ow’ensiku n’amango akugishe.» Olubaga loshi lwanacidumiza mpu: «Amen!»

11 Olubaga lwanacihagula ecirâlo câbo nsiku makumi asharhu goshi. Yuditi bamuhà enyumpa ya Holoferno n’ebirugu byâge, arhôla encingo yâge, amasahani galimwo goshi n’emizigo yâge yoshi, babishonêkeza oku cihêsi câge, anacishwêkerakwo engâlè zâge, anabishana kulya. 12 Abakazi b’Abayahudi boshi banaciyisha mpu bamulolekwo, banacimugisha, bamusamisa; banacirhôla emijegereza, n’eyindi banaciyiha balya bakazi banali naye. 13 Yuditi, n’ecimanè c’emizêti, anashokolera olubaga loshi na balya bakazi banali boshi abahà emijegereza n’abalume ba bene Israheli banabakulikira, aha bafumbasire emirasano, abandi bayambîrhe ebimanyîso bayisha bayimba n’izù linene bwenêne. 14 Na Yuditi anacirhangira olu lwimbo lw’okuvuga omunkwa ekarhî ka Israheli yêshi, na olubaga loshi lwakashuza kuli okwo kuvuga omunkwa.