1 Ayubu erhi akola ashuza aderha, erhi: 2 Nêci mmanyire oku kwo binali ntyo: K’omuntu ankayâza Nyamuzinda? 3 Omuntu oderha mpu amujîsa kadali, arhamushuza ciru n’eliguma oku kali cihumbi. 4 Ayishi byoshi, àli na muzibu kulusha byoshi, ndi wankaderha mpu acishingikanye ye abule n’oku abîre? 5 Obagala entondo zirhanamanyiri, anazikundule zikamujira burhè. 6 Anashabagize igulu aha linali, n’ebikondo liyimangirakwo binagere mw’omusisi. 7 Anahakanye izûba mpu lirharhengaga emashinji, n’enyenyêzi azihamikire. 8 Yêne ye walambûlaga amalunga, ye gera oku mîshi g’enyanja. 9 Ye walemaga Ursi na Orioni, Enyenyêzi cirera-mwêzi n’olukere lw’e Mukondwè. 10 Kuhuma ahuma na gombi, ye wajiraga omwandu gw’ebirhankamanywa, ebirhangâzo by’obulenga bwâge birhankaganjwa. 11 Akangera ho ntamubona, anacîgendere ntanatwîri ihuzi-huzi. 12 Erhi ankanyaga omushoko, ndi wankamurhanga? Ndi wankacîshomya mpu amubwîra, erhi: «Bici ebyo ojizire?» 13 Nyamuzinda liguma atulumukirwa, bambali ba Rahabu kuyandala baciyandala aha magulu gâge. 14 Nâni oburhindi bwâni nti nacîhagiza, nti ngwêrhe akanwa nâmubwîra? 15 Ciru ankabîre nyâzize, ntankashuzize, kuyinjibana nankamuyinjibina erhi kwo; bulya ye wantwîra olubanja. 16 N’erhi nakamuyâkûza akashuza, ntacîkêbirwi oku ankayumvîrhiza izù lyâni! 17 Oyu odwîrhe andabarhanyiza obumâma, odwîrhe anyûshûlira ebibânde buzira igwârhiro, 18 orhakaziga ciru namira omûka, analiko anywêsa omutula! 19 Ka kulwa nalwaga? Arhankajîbwa omu irhwe! Ka lubanja najà? Ntâye wankacîshomya mpu amuhira oku ibuye! 20 Nkaderha nti nyâzize, akanwa kâge kanyagiriza, Nkaderha nti ndi mwêru-kwêru, arhâmpè lubanja. 21 Ci kwône, ka ndi mwêru-kwêru? Ciru niene ntacimanyiri! N’oku ndamire kwanshologosire! 22 Bulya kwoshi ko nakuguma, nankudesire: anashenyule omushinganyanya, anashenyule n’enkola-maligo. 23 Erhi ecahira cikali ciyisha, anashekere amagala g’abêru-kwêru. 24 Omu cihugo cigwîre omu nfune z’enkola-maligo anahunye amasû g’abacîranuzi, n’akabà arhali ye, aligi wundi ndi? 25 Ensiku zâni zo mbidu aha mulibisi, zajà zantibamwo buzira kubona iragi. 26 Zikanyize nka bwârho bubidu, Nka kula akadûrha kacîhunika (oku mwâna-goko). 27 Erhi najiderha nti ndeke okuniha, nti mpindule obusù ntùze, 28 nanyumv’ebihamba binshamule erhi kukengêra amaligo gâni goshi kurhuma bulyâla mmanyire oku arhali buhamihami oli wandibuliza. 29 Akabà nie nyazirage, bici nacicîrhamizako? 30 Ka mpu ncîkalabe amîshi g’olubula, mpu nkalabe enfune n’omushenyi mwêru? 31 Kurhahânge orharnvumvuza oku civù, ciru n’emishângi yâni yône embe nshishinyê. 32 Bulya yêhe arhali muntu akâni arhajisibwa kadali, arhanajisibwa lubanja. 33 Ntâye wankarhuja ekarhî mpu arhubwîra olubanja, akaderha mpu arhuhirekwo amaboko. 34 Ntâye waderha mpu ayegûle akarhi kâge kantengekwo, mpu ayegûle ebikângo byâge, bihuse okunjugumya. 35 Ci kwône kurhârhume ntamubwîra buzira bwôba, bulya oku bwâni; ntayôsiri ntyo.