1 Ayubu aj’eluhya aderha, erhi: 2 Nêci mushâna wâni: munali nk’izù lya lubaga lwoshi, amango mwânafe, n’oburhimanya bunafè. 3 Nâni ngwêrhe obukengêre akinyu, ntâco mundushire muli okwo, na ntâye orhamanyiri ebyo byoshi. 4 Ci kwône omuntu anashekerwe n’omwîra wâge, Mpu kwenge amâbirikira Nyamuzinda mpu amushuze omushinganyanya mwêru-kwêru, gakola masheka bamuhà. 5 Abàbwîne câbugeshera, mpu obuhanya bufè nshuzo, n’owacihûmahûma, mpu bamuholereze. 6 Ago mango erhi n’ab’obuhagwe bacidêkerire omu bihândo byâbo; abasholoshônza Nyamuzinda erhi barhanahuligana, ciru na balya balonza okurhegeka Nyamuzinda! 7 Odôse enkafu zanakubwîra, enyunyi z’emalunga zanakuyigîriza. 8 Ebicibulula oku idaho byanakubwîriza, enfî z’omu nyanja zanakuyigîriza. 9 Bulya muli byo byoshi ntâco cirhamanyiri, oku kuboko kwa Nyamuzinda kwabijiraga byoshi. 10 Abà afùmbasire omu nfune zâge obuzîne bwa ngasi hiyîsa, n’omûka gwa ngasi muntu. 11 K’okurhwîri arhali ko kuyumva ebinwa nka kula olulimi luyumva obununu bw’ebiryo? 12 Abashosi bali ba kurhimanya, n’abakulu bali b’ihano. 13 Yêhe, oburhimanya n’obuhashe, byoshi ye Nnabyo, ihano n’okumanyirira byoshi byâge, 14 Oyu amâshâbira, ntâye wankamuyûbakira, oyu amâshwêka, ntâye wankacimushwêkûla. 15 Erhi ankacîka amîshi, cinashube canda cirî; akagalika, ganayône igulu! 16 Obuzîne n’amakengu ye Nnahyo, omurhebwa n’omurhebanyi, boshi bâge. 17 Abahanûzi anabahabîse olugere, abacîranuzi abasirahye. 18 Anashûhûle abâmi olunigi, abazônze omurhûnda ecibunu. 19 Abadâhwa anabagendêse buzira nkwêrho, ayîmûle n’abayîmire. 20 Anadumye bakishiderha, n’abagula abahabise amakengu. 21 Abaluzi anabalugize amaherhe, na baciri-misî anabashuhûlire olunigi. 22 Enyênga anayinyage omwizimya, n’endunduli ayihindule bulangashane. 23 Anayûshûle amashanja, anabuligaheza, anabè amâlandiza amashanja agal’igaherêrekeza. 24 Abakulu b’ecihugo anabanyage obukengêre, abatulutumbye, baherere omu irungu lirhabamwo njira. 25 Bàdundaguzize omu ndùnduli buzira kamole, badandabagane nka kulya balaluka.