1 Omûka gwamampwêra, ensiku zâni zamâyûrha abambisha bakola bali barheganye. 2 Aye! Acibâga abashekeza abandi barhàli banzongolosire, isù lyâni lyamageza obudufu ekarhî k’ebijâci byâbo. 3 Wêne obâge mufungizi emunda wênene oli, aho ndi wankashûrha omu nfune? 4 Bulya wabafûnisire omurhima balek’ibona ebishingânîne, mâshi orhacizigaga bahima. 5 Aka lebè wajiriraga abîra olusiku lukulu, n’obwo amasù g’abâna bâge gazikire omu mbonyi. 6 Wànjizire mugani gw’amashanja; nie nkola nyakumesherwa ebusù. 7 Isù lyâni lyamahola erhi burhè burhuma n’ebirumbu byâni byoshi ekola nzûngu yonene. 8 Abantu bashinganyanya bamajuguma erhi okola kurhuma n’omushinganyanya amâkunirira omugalugalu. 9 Ci kwône kurhârhume omushinganyanya aleka enjira yâge, oli wa amaboko mêru kwêru anayûshûla oburhwâli. 10 Ci kwônene mw’oyo mweshi yishagi yâga, ka ntacibonage omurhimanya muli mwe? 11 Ensiku zâni zamâyûrha, n’emihigo yâni yafananda, byo byàli biragane by’omurhima gwâni. 12 Obudufu banabujire mûshi, Obulangashane bunajè hôfi ciru hankabà omwizimya! 13 Bici nankacilangâlira, ekuzimu yo na mwâni, omu mwizimya mwo nâtwîra icumbi. 14 Nabwîzire enshinda; nti: «we lârhà» N’emivunyu, nti: «we Nyâmà, we na mwâli wîrhu!» 15 Ngahigi obulangâlire bwâni bucirigi? N’iragi lyâni ndi wankacilimanya? 16 Ka bayandagalira haguma rhwe nabo ekuzimu, nîsi erhi, rhweshi rhuzikire omu katulo?