1 Okubundi Ayubu ashubijà eluhya, aderha, erhi: 2 Muyumve! Muyumve akanwa kâni lyo ntûlirira. 3 Muleke ntang’iderha, na hano mbà namâderha, anayishig’ibà go mango musheka. 4 Kuli nie ka muntu warhuma nacîlasa? N’akabà arhali ntyôla, cankarhumaga mbirêmbera? 5 Mundolekwo, mwanageramwo omusisi, muhire okuboko oku kanwa kinyu muhulike. 6 Nka birhànyakwo nieshi nnanyôbôhe; nieshi omusisi gunangeremwo. 7 Cirhuma abantu bîsi balama? Ciru bashosihale banabè ba misî kulusha? 8 Iburha lyâbo linayôloloke eburhambi bwâbo, abinjikulu bâbo banayûshûke erhi banabona. 9 Enyumpa zâbo ziri mw’omurhûla ntà bôba bubagwêrhe, Akarhi ka Nyamuzinda, karhabahikakwo. 10 Empanzi yâbo ngasi mango erhi kubusa yanabusa, n’enkafu zâbo zinaburhe bwinjà zirhamoma. 11 Bakola balîkûla abâna bâbo mpu bajishârha, banagende nka busô, abâna bâbo b’ebirhaba banajè babwadârha. 12 Wanabona bayishe bàyimba erhi banarhimba engoma, baziha n’ennanga, banacisimîsa omu kukaziha akarhêra. 13 Obuzîne bwâbo banabugeze omu murhûla, na caligumiza bacijira ekuzimu. 14 N’obwo bàkazâg’ibwîra Nyamuzinda, mpu: «ciyegûle kuli rhwe, kurharhusimîsizi okumanya enjira zâwe, 15 “Aligi ye ndi Ogala-byoshi, lyo nîrhu rhuhash’imuyemera? Bici rhwankayunguka omu kumuharâmya?”» 16 K’iragi lyâbo lirhali omu nfune zâbo? Ci kwônene orhamanyaga mpu Nyamuzinda ankayumva ihano ly’omugalugalu! 17 Ka ngasi mango kazima akamole k’abantu bagalugalu, Ka ngasi mango obuhanya bubarhîndakwo? Ka ngasi mango abarhumira amalumwa nka luhembo lw’obukunizi bwâge? 18 Ka ko baligî nka hyasi hyayêhûlwa n’empûsî, ka ko bali nka mujimbi gwahêkwa na kalemêra? 19 Ka Nyamuzinda anabikire abâna bâge obuhane bwâge? Yênene ahanagwe ly’ayumva bwinjà. 20 Amasù gâge yêne gabone oku ahanyagala, anywe yênene oku bukunizi bwa Nyakasane! 21 Bulya, bici enyumpa yâge yaciyîsh’imukwanana hano ayûs’ifà, hano omubalè gw’emyâka yâge gubà gwamâheka? 22 Ka Nyamuzinda ye wankayigîriza eby’okumanywa? Kali ye twa emmanja z’abâli enyanya kulusha? 23 Muguma anafè erhi anali n’obugale bwâge bwoshi, abè agwêrhe omurhûla lwoshi, ntà kadûndo. 24 Amabûnda gâge gayunjwîre mashushi, n’omwôngo gw’amavuha gâge gayunjulîre magoba. 25 Owundi anafè erhi n’omungo gumuli emurhima, ebwa kubà ntà mango naye àlabwîre oku iragi. 26 Ci bombi omu katulo banajicihengeka, n’emivunyu ebalûnde. 27 Abà, mmanyire bwinjà enkengêro zinyu, n’ebi mudwîrhe mwarhanya kuli nie. 28 Bulya mudwîrhe mwadôsanya mpu: «ngahi erya nyumpa y’omuluzi erigi?» Ngahi erigi erya nyumpa abîsi bàyubakagamwo? 29 Ka murhadôsagya ababalama? Ka mwahabaga ebimanyîso byâbo? 30 Ali ntya: oku lusiku lw’obuhanya, omwîsi anababalirwe omu mango gw’obukunizi anamanye kurhi ajira. 31 Ndi wankamushobeka oku lugendo lwâge? Na kuli ebi àjizire ndi wankamuha kw’oluhembo? 32 Kuli ye erhi bamuhêka aha nshînda ntya, oku birhôndo hy’ecûsho câge kwo ayigîriza. 33 Amalôngo g’omu kabânda gali malêmbu kuli ye enyuma zâge abantu banayisha bamuyîmizize, n’embere zâge abandi mwandu bamushokolere. 34 Bici mwantulirizakwo, bya busha? Omu mashuzo ginyu harhacisigiri oburhali obwengehushu.