1 Na bunôla, lêro nkolaga masheka g’entindi kundusha, abà nakazâg’ibona b’îshe wâbo bali bagaraganda bwenêne, balya ciru ntankahirîre ebiryo omu mulânga gw’ebibwa byâni. 2 Ciru n’emisî y’amaboko gâbo ntâbyo yankànkwânine, bàlikorôsire okw’ibonya-nshonyi. 3 Barhàcigwêrhe nyama oku mibiri yâbo erhi cizombo cikali cirhuma, bakazikugurha emizî y’amadirha, bakazirya obuhasi bw’oku côlezo. 4 Bakazihumbula engâka omu makerêrhè, n’obûntu bwâbo bwakazirhenga omu mizî y’ensinzi 5 Bâli bamâlibirhwako n’abandi omu cihugo, bàkazâg’ibashekera nka bishambo, 6 Bàkazâg’ihanda omu mânga z’embyà, omu nkunda erhi omu nyâla z’amabuye. 7 Bakola bajalumbira omu mashaka nka ndogomi, n’okulundumana omu marhàdu, 8 Bâna ba nshâhu na kulusha, balume barhajira izîno, bàcibêrire bakage omu cihugo. 9 Lêro muli zino nsiku, nie bakola badwîrhe lwimbo, nie nkola mugani gwâbo. 10 Omu kubashologorha, banakazînyâka, barhanacirhînya okummeshera emalanga. 11 Na bulya yêne warhumire olugè lw’omuherho gwâni lwadaga, ye wanancôcôbize, bakola bakanegenera omu masù gâni. 12 Bakolaga bayishilola oku bansholoshônza, balole erhi nafukunya, okubundi bangereze mu nsânya. 13 Bakola banfukira amâjira, babonereho igwârhiro ly’okumperêrekeza, na ntâye wabacîka. 14 Bakola badâha omu mwwâni nk’owagera omu murhule mugali gw’omu lukânga, bangendegendeko lugali bansige omu bigukà. 15 Ecôbà campindukîre, irhûnda lyâni lyayêhûka nka mpûsi, n’obulangâlire bwâni bwagera nka bitù. 16 Na bunôla, akalamo ngwêrhe kalêmbire, ensiku z’amaganya zamandibuza. 17 Budufu nanyumve amavuha garhaciri gâni, n’abandyagâsa barhahûnga. 18 Yêne ongwârhîre omu mwambalo n’emisî yâge yoshi, kusêgeza oku mishumi y’ecirondo câni. 19 Ankwêbire omu byôndo, nkola nshushire akatulo n’oluvû. 20 Ndwîrhe nakuyâkûza orhananshuza, nyimanzire embere zâwe orhanandola îsù. 21 Wàhindusire mwîsi kuli nie, okuboko kwâwe kudârhi kudwîrhe kwandibuza. 22 Wamankwêba emalunga mpu empûsi embone, mpu lyo nzikanwa n’omulaba? 23 Nêci mmanyire oku okola onyêrekîze ebwa lufù, era munda abantu boshi bashimânana. 24 Ci kwône, ka nkola nenganyize omukenyi, amango ali omu maganya anadwîrhe ahûna ecàfûngira? 25 Ka niono ntafaga bônjo, ngasi walilamire kubî? Ka ntayêrekanaga olukogo oku mugaraganda. 26 Nakagilangâlira iragi, lêro obuhanya bwantogera, Nakazilingûza obulangashane, lêro gwabà mwizimya gucîyêrekana. 27 Nangôngo akola andibuza burhahusa, Ensiku z’amalibuko zànzidohîre. 28 Nkahuluka n’obusù buzinzibire, ntâye ontuliriza, omu karhî k’olubaga nkaderha nti nyimuke, erhi kunakola kumpà olwôho! 29 Banyambwe bàhindusire bene wîrhu, n’omulungu wâni akola ye cigukuma. 30 Omubiri gwâni gwahihire, amavuha gâni gayumûsire. 31 Olulanga lwâni lukola lulongêrera kuyimba mishîbo, akarhêra kâni oku mulênge gwa ba-nyamulakà.