1 Wâni Ayubu, yumva ezi nderho zâni, rhega okurhwiri kuli ebi binwa. 2 Lolà oku nabumbûla akanwa, n’oku olulimi lwâni lwamarhenga ebiraka mpu lushambâle. 3 Omurhima gwâni gwamâdubukamwo ebinwa by’obushinganyanya, n’akanwa kâni karharhengemwo ebirhali bya kukubûla, 4 Mûka gwa Nyamuzinda gwandemaga, Mûka gw’Ogala-byoshi gumpa akalamo. 5 Akabà wankahash’okunshuza, wananshuza nâni, oyimange embere zâni, oderhe okwâwe omanyire. 6 Lolà oku ndi akâwe, ntali Nyamuzinda, nâni nalemagwa omu budaka akâwe. 7 Okwo kwanarhuma omucûkà gwâni gurhakujugumya, n’okuboko omanye kwankakuzidohera, bulya ntalimwo bugalu. 8 Kurhi kulya nayumvîrhe amarhwîri gâni gahema, bulya nayumvîrhe omulenge gw’izù lyâwe, 9 Niono ndi mwêru kwêru ntà bulyâlya, ndi mwimâna, buzira izâbyo. 10 Ci kwône kushobeka anshobesire, anakola ali andola nka mushombanyi wâge. 11 Amalîra amagulu gâni omu byûma, n’okujà kwalongereza ngasi hoshi nankagera. 12 Kuli ebyo byoshi nkubwîzire oku oyâzire, bulya Nyamuzinda arhalusire omuntu. 13 Cankarhuma wamulonza kw’akadali, mpu kwenge arhali akushuza cinwa oku cinwa? 14 Nyamuzinda ajira mbero nyinji za binwa, buzira omuntu okukengukwa. 15 Omu bilôrho na muli ngasi biyishira omuntu budufu, nk’obôba bwamârhûnga ebiremwa, oku ncîngo zâbo; 16 Go mango abaderhera omu marhwiri, ababwîre amahwe, abadirhimanye n’enshusho z’ebibonekana. 17 Ly’ahugîsa omuntu obushanja bwâge, n’okunyihya oku bucîbone bwâge. 18 Ntyo anamucinge, omûka gwâge gulek’irhogera emuhengere, Obuzîne bwâge bulekihirigirha n’okuj’omu nyenga. 19 N’okulumwa kunayigirize omuntu nako, amango orhuvuha rhwâge rhugera mw’omusisi. 20 Omuntu anayumve omugati gwamâmushologorha, ayumve arhagwêrhi mîru ga kulya enyama. 21 Kuhika omubiri gwâge guje gwayumîrira, abone amavuha garhaboneka gayâlagale. 22 Nk’omûka gwâge gukola guyêrekîre ekuzimu, n’obuzîne bwâge bukola buyêrekîre ekuzimu, 23 Muli ago mango erhi hankayisha malahika, mufungizi muguma okûzirwe omu cihumbi, owankabwiriza omuntu ebi akwânîne okujira. 24 Owafa omuntu bwônjo amuderhere erhi: «Omubabalire arhajaga ekuzimu, nabwîne ecayôkola obuzîne bwâge!» 25 Aho, omubiri gwâge gwamâshubibona obuzibu bw’eburhô, anashubire omu mango gâge g’obusole. 26 Anahûna Nyamuzinda anayumvûbwe, anakaz’ilolêreza obusù bwâge n’enshagali, anayâlize oku n’omuntu agwêrhe obushinganya, 27 Omuntu anaj’ayîmba embere z’abandi bantu, erhi: «Nalinjizire okubî, nalimbuzire obushinganyanya, Yêhe arhangaluliraga nk’oku obubî bwâni bwalishingânîne». 28 Alanzire omûka gwâni oku lufù, n’akalamo kâni kayishibona obulangashane. 29 Lolà oku kwo Nyamuzinda ajirira omuntu ntyo, liguma, kabirhi, ciru n’akasharhu. 30 Okwôla mpu ly’arhenza omûka gwâge omu lufù, mpu ly’omuntu amolekerwa n’obulangashane bw’abazîne. 31 Orhege okurhwiri wâni Ayubu, onyumve, ohulike nie nkolaga naderha. 32 Akabà ogwêrhe ebinwa by’okushuza oderhage, bulya nanasima nyêrekane obushinganyanya bwâwe; 33 Akabà nanga, Ohulikage nkola nakuyumvîsa obumanye.