1 Elihu ashubiyûshûla ebinwa aderha, erhi: 2 «K’ocîkebirwe mpu wanayâza, nîsi erhi ohamagale n’obwâlagale oku wanabà, mushinganyanya omu masù ga Nyamuzinda.» 3 Okucîshomya okumubwîra, erhi: «Makwânane maci kuli mwe, nkajira ecâha erhi ntacijiziri?» 4 Lêro niene nkolaga nakushuza, nshuze n’abîra bâwe caligumiza, 5 Galamira emalunga ocîbonere, Lolà kurhi ebitù biri kulî na nâwe! 6 Okajira ecâha, k’erhi Ye obabazize? Okayûshûla obugoma bwâwe, k’omubabazize? 7 Akabà oli mushinganyanya bici omulerhera? Nîsi bici omushobôza? 8 Obubî bwâwe bwanabalaza balya mushushine mweshi, obushinganyanya bwâwe burhankakwânana abarhali bantu. 9 Abâli omu malibuko, barhahwa kuyâma, Abâli omu mazibu g’ababisha, banayâkûze, bahûne owabalikûza, 10 Ci ntâye oderha, erhi: «Ngahi oli Nyamuzinda, Mulemi wâni?» Olya ohà abantu enyimbo z’obukuze budufu, 11 Olya orhuyigîriza bwinjà kulusha aleke ensimba z’erubala, Orhujira binjà na bîrhonzi kulusha aleke enyunyi z’emalunga. 12 Banayâme arhanabayumve, erhi bucibune bwa bantu babî burhuma 13 Nyamuzinda arhayumvîrhiza ebinwa bibî, Ogala-byoshi arhabilolakwo. 14 Woyo wamacishomya okuderha, erhi «Ntamubwîni» mpu olubanja lwâni luli emwâge, nalinda! 15 Nîsi, erhi: «Oburhè bwâge burhahana» anali nk’ohabire obubî bw’ebinwa by’omuntu. 16 Kuli kuderha oku Ayubu adwîrhe abumbûlira akanwa busha, omu buhwinja bwâge adwîrhe aluza ebinwa busha.