BIBLIYA NTAGATIFU OMU MASHI Yoweli 2

Okuhuluza oku lwa-Nnâmahanga

1 Mubûhe emishekera* omu Siyoni†, mubande orhuhabâbo oku ntondo ntàgatifu. Mugeremwo omusisi mwe bantu mweshi, bulya olwa-Nnâmahanga lwayishire, bulya luli hôfi. 2 Lusiku lwa mwizimya n’olwikungu, lusiku luyunjwîre bitù n’omwizizi‡. Nka kula lukula arhanda emashinji, ntyo kwo engabo y’abantu yâpamuka erhasâg’ibonekana bundi, erhakanacibonekana ciru n’eliguma.

Okurhêrwa n’enzige

3 Embere zâbo, muliro, enyuma zâbo, nayo muliro. Ecihugo kwo ciri embere zâbo nk’ishwa lya Edeni, enyuma zâbo ekola mpinga bwâmwa! Ntâco câbafulumuka. 4 Eyo ngabo kwo eri nka biterusi, ababishonyirekwo bajà babicinagiza§. 5 Emidindiri yâbo nka ya mpanzi; bajà bacimoga oku ntondo, balaza nka ngulumira ya muliro omu mushûshu gw’ecanda, cigamba ca ngabo ya balwî bakeresire n’amatumu. 6 Omu kubona ntyo, ebihugo bamârhoga n’obwôba, boshi bageramwo ogwa nyegenye. Obusù bwahinduka. 7 Eyo ngabo yamâcinîka nka ntwâli zajilwa, yamagamaga oku byôgo, ngasi muguma gwâge mukâba*. 8 Ntâye wasûnsunika wâbo, ngasi muguma n’enjira yâge, bacîkanika ekarhî k’emyampi buzira kushandabana. 9 Barhêra ecishagala, bacînika oku byôgo, bashonera oku nyumpa, basheshereramwo nka bishambo.

Okubonekerwa kw’olusiku lwa Nyakasane.

10 Amango ayisha, igulu lyâgeramwo omusisi, amalunga gadirhimane. Izûba n’omwêzi bijemwo omwizizi, n’enyenyêzi zizime. 11 Izù lya Nnâmahanga† lyâyumvikane, ashokolire engabo zâge, bulya abamulwira bali banji, bulya ajira obuhashe bunji n’oku adesire kwo kunabà; luli lukulu olusiku lwa Nyamuzinda, lwa kuyôbohya, na ndi wankamuja emalanga?

Gakola mango g’okugaluka emwa Nyakasane

12 Gaciri mango g’okugaluka emunda ndi, kwo Nyakasane, adesire. Okwo mukujire n’omurhima gwinyu gwoshi: mucîshalise, mulake munanyakûze. 13 Arhali myambalo yinyu yo musharhulage, ci murhima gwinyu gwo mukwânîne okuhindula. Nêci, galuki emwa Nyakasane bulya ali mwonjo na mwinjà, analegame omu kukaliha, ci mubidu omu kuhâna obwonjo, arhanakwirirwa mabî. 14 Kwankanabà anankahindwîre omuhigo gwâge, anakuyunjuze mugisho‡. Okubundi obwo, olerhere Nyamuzinda entûlo z’engano n’ìdìvayî. 15 Mubûhe omu mushekera e Siyoni, muderhe bacîshalise, bajire olusiku lukulu. 16 Muhamagale abantu, mulêrhe engabo yoshi, mulâlike§ olubaga. Muhamagale abashosi, mulêrhe abâna bacìri oku ibêre lya bannina. Omu hya-mulume ahuluke omu mwâge, n’omuhya w’emiramba arhenge omu kâ-buhya, boshî bazûke, bayìshe. 17 Kurhenga aha lusò* lw’aka-Nyamuzinda kuhika aha luhêrero, abadâhwa ba Nnâmahanga bamulakire, bamubwîre, mpu: «Orhubabalire, mâshi Yâgirwa, obabalire olubaga lwâwe; orhabonese omwîmo gwâwe nshonyi, gulek’ishekerwa n’amashanja. Ka wâleka amashanja gakâderha, mpu: Ngahi aligi olya Nyamuzinda wâbo?»

Okuhwa kw’obuhanya: Okucunguka.

18 Nyakasane âyâgalwa n’ecihugo câge, âcibêra lukogo, âbabalira n’olubaga lwâge. 19 Nyakasane âshuza, abwîre olubaga lwâge, erhi: «Lolà oku namâkurhumira engano, idivayi n’amavurha mahyâhya. Wâyigurha, ohimbe. Ntakanacilonza abantu bakushekere erhi bakurhindibuze. 20 Abashombanyi bâwe bakayisha enyanya†, nnambagalule, mbajûce oku ntuli n’oku manga. Ababashokolire nâbahirika omu nyanja ebwa bushoshôkero bw’izûba. Emirhumba yâbo yakaz’iyûdûkamwo akabayo kalumira omu cihugo coshi. Ntyo kwo bahungumuka balya boshi bàkujirire amabî.»

Obulebi bw’ebiryo binji

21 Mwe bantu, murhacìyôbohaga, musîme munacîshinge, bulya Nyakasane akozire eby’enkwîra. 22 Ninyu, mwe nsimba z’erubala, murhaciyôbohaga, obuhasi bwamezire, emirhi yayanyire amalehe, emizêti n’emizâbîbu bijagalîre malehe. 23 Ninyu, mwe bantu b’e Siyoni, shamambiri n’omwîshingo, musîme muli Nyakasane, bulya obushinganyanya‡ bwâge burhumire, ammuhîre enkuba, aniesize enkuba mpangûka omu mango gâyo, nk’oku byànalî burhanzi. 24 Enguli ziyunjwîre ngano, orhubindi rhwabulajika mavurha n’irivayi lihyahya. 25 «Nammurhengize galya mango g’enzige n’amahanzi n’ebizindêre, zirya ngabo zâni nali mmurhumîre nti zimmuyônere emyâka yinyu. 26 “Mwâlya, munayigurhe oku munalonzize, munaharâmye Nyamuzinda winyu okola ebirhangâzo binji. Olubaga lwâni lurhakacibona nshonyi”. 27 “Lyo mumanya ntyo oku nie ndi ekarhî k’Israheli, nie Nyakasane Nyamuzinda winyu, ci ntà wundi Nyamuzinda. Nanga, ntà mango olubaga lwâni lwâcibone nshonyi§.”»

Yoweli
<
2
>

*2:1 2, 1 Mishekera: mishekera na ngoma «duba duba» za matabâro abayâka bayâke, obuhane buli hôfi, lolà Iz 18, 3; Hoz 8, 1; Yer 4, 5; 6, 1. Kandi nêci, omushekera n’engoma bibà bya kulâlika kwa kurherekêra, lolà Mib 10, 2-10; Yow 2, 15; ntyo kwo bayish’ilâlika enshimânano nkulu y’ab’isho gwa, aha lusiku luzinda lw’igulu, lolà Iz 27, 13; 1 Tes 4, 16-17; 1 Kor 15, 52.

†2:1 2, 1 - 2, 1-11: Okuhuluza: emirongo 1-11 eshubirire okuderha okurhêrwa n’enzige nka kuno ngabo ya balwî ntalindirwa, lolà 1, 15: Olusiku lwa Nyamuzinda.

‡2:2 2, 2 Mwìzizi: nk’enzige zihundire ecihugo zinasike izûba, gubè mwizimya. Lolà Maf 9, 2. Engabo: Omu Cigereki, bàdesire: «nka kula lukula, kwo edwîrhe yarhanda engabo»; omu Cihabraniya: «nka kula lukula arhanda»

§2:4 2, 4 Babicinagiza: enzige kwo zihârhula nka biterusi (nfarasi); kwo ziri nka balwî bashonyire bulibirha oku nfarasi, lolà Nah 2, 4-7.11; 3, 2-3. 15-17, omu nsiku zafulûlwa buzinda.

*2:7 2, 7 Mukâba: omu Cigreki, n’omu buhindule bwa Vulgata, bàdesire: «kuyahuka» (ntà kuyahuka); omu Cihabraniya, baderha: «kugwarhana» (nka kula enjuci zisimbana haguma).

†2:11 2, 11 Izù lya Nnâmahanga: mukungulo n’omulazo, lolà 4, 16; Lub 19, 16+; Amo 1, 2; Lul 18, 14; 29, 3-9.

‡2:14 2, 14 Omunago gwashub’iyisha, abantu bahinge banayêze, lolà Lush 7, 13-14; 16, 10.15.17; Hag 2, 15-19; ago mango, olubaga lwashubirira okukarherekêra, lolà 1, 9.

§2:16 2, 16 Mulâlike, erhi muhamagale: ko kuderha mushûke, mucêse, lolà 1, 14.

*2:17 2, 17 Lusò: kwo kuderha embuga, ebushoshôkero bw’ecirhînyiro, lolà 1 Bâm 6, 3; Eze 40, 48-49; aha karhî k’omuhango n’oluhêrero lw’okuyôkera enterekêro, lolà 1 Bâm 8, 64; 2 Nga 8, 12. Abadâhwa nka basâlira banayêrekere ebwa cirhînyiro.

†2:20 2, 20 Enyanya: enzige zayisha enyanya kwo ziri nka mushombanyi Nnâmahanga arhumire kurhenga «Enyanya», elugulu, mpu ahâne abantu oku mabî gâbo, lolà Yer 1, 13-15+; Eze 26, 7.

‡2:23 2, 23 Bushinganyanya: kuli kuderha nkaba oku Nyamuzinda ye Mushinganyanya atwa n’obushinganyanya, arhalenganya; erhi kandî: Nyamuzinda ye hâna obushinganyanya, ye galula abantu omu bushinganyanya. Nn’obushinganyanya wayisha ye Kristu, mwigîriza w’obushinganyanya; lolà Hoz 10, 12 (Cihabraniya), na Yer 23, 6; 33, 15. - Burhanzi: mîra (omu Cigereki n’e Vulgata); «omu mwêzi murhanzi» (Cihabraniya).

§2:27 2, 27 BHS na WLC bajira mandiko maguma ci barhaganja emilongo n’okuyiberûla kuguma. Aha, BHS ayimangire omu milongo 27; WLC yêhe ahisire omu milongo 32. Omu cigabi cikulikire WLC agwêrhe milongo 21 n’obwo BHS agwêrhe irhanu yône; BHS agwêrhe ecigabi ca 3 n’eca 4, n’obwo WLC yêhe agushire eca 3 n’eca 4, câbà cigabi ciguma ca milongo 21