3
Yezu afumya omuntu ohozire okuboko
(Mat 12, 9-14; Luk 6, 6-11)
1 Yezu ashub’ijà omu sinagogi. Mwâli omuntu ohozire okuboko.
2 Bakahengûza mpu babone erhi amufumya olwa-Sabato, lyo bamushobeka.
3 anacibwîra olya muntu ohozire okuboko, erhi: «Yimuka, oj’ekâgarhî».
4 Okubundi abadôsa, erhi: «Ka kuyêmêrîrwe okujira kwinjà olwa-Sabato ahâli h’okujira kubî, okuciza obugumaguma b’omuntu ahâli h’okubuheza?» Nabo banacibà dondo.
5 Anacibagezamwo amasù, akunîre anali burhè erhi mirhima yâbo mibî erhuma; abwîra olya muntu, erhi: «Lambûla okuboko». Akulambûla, n’okuboko kwâge kwafuma.
6 Erhi Abafarizeyi bagenda baj’imujira ihano ho na halya haguma n’Abaherodi
* mpu babone kurhi bamuyîrhamwo.
Engabo y’abantu yakulikira Yezu
(Mat 12, 15-16; Luk 6, 17-19)
7 Yezu acîyêgûla bo n’abaganda bâge, aj’eburhambi bw’enyanja, n’engabo nyinji y’abantu yarheng’e Galileya n’e Yûda, yamukulikira. 8 Kurheng’e Yeruzalemu, n’Idumeya, n’ishiriza lya Yordani, n’entambi z’e Tiri n’e Sidoni, olubaga lwoshi, erhi luyumva emyanzi y’eby’adwîrhe ajira, lwàmuguma omu cirali. 9 Anacibwîra abaganda bâge mpu bamurheganyize obwârho lyo abantu balek’imufundêza. 10 Bulya àli amafumya balwâla banji, na ngasi boshi bâli bazamba bakalibirhira emunda ali mpu bamuhumekwo. 11 N’abashetani erhi bamubonaga, bakaz’imufukamira n’okuyakûza, mpu: «Oli Mugala wa Nyamuzinda!» 12 Ci yêhe akabahanza bwenêne mpu barhamumanyisagya.
Entumwa ikumi n’ibiri
(Mat 10, 1-4; Luk 6, 12-16)
13 Anacirheremera oku ntondo, ahamagala abàli alonzize yênene, bamushimba.
14 Acîshogamwo ikumi na babiri mpu babêre haguma naye anayish’ibarhuma okugend’iyigîriza.
15 Abahà obuhashe bw’okufumya abalwâla n’okulibirhakwo abashetani.
16 Anacicîshoga ikumi na babiri: Simoni, anamuyîrika izîno lya Petro;
17 Yakôbo, mwene Zebedeyo, n’omulumuna Yowane, abayîrika elya Bowanerge
†, kwo kuderha bene-nkuba.
18 Andreya, Filipo, Bartolomeyo, Mateyo, Toma, Yakôbo mwene Alfeyo, Simoni sha-bushiru,
19 na Yûda w’e Keriyoti, olya wamulenganyagya.
Ab’omulala gwa Yezu bagend’imugwârha
(Ywn 10, 20)
20 Banacijà omu nyumpa. Olubaga lwashub’ilundûka, ciru babula aha bankayikulira.
21 Erhi ab’omulala gwâge
‡ bamanya okwo, bakanya mpu baj’imugwârha, bulya bakâg’iderha mpu asirahire.
Arhali buhashe bwa Belzebubi Yezu ahulusamwo abashetani
(Mat 12, 24-32; Luk 11, 15-23; 12, 10)
22 Nabo abashamuka b’ihano bâli bayandagalîre e Yeruzalemu bakaderha, mpu: «Alimwo Belzebubi n’okubuhashe bw’omurhambo w’abashetani ahulusamwo abashetani»
§.
23 Erhi abà amabahamagala, anacibabwîra, omu migani, erhi: «Kurhi shetani ankalibirhakwo Shetani?
24 Erhi obwâmi bwankacigomera bwônene, obwo bwâmi burhankaciyimanga.
25 N’erhi enyumpa yakacilwîsa yonene, eyo nyumpa erhankaciyimanga.
26 Naye Shetani akabà acîgomire anacîlwîsa yênene, arhankaciyimanga, ci anafananda.
27 Ntâye wankajà omu mw’entwâli akayinyaga ebirugu, arhanarhanzir’ishwêka eyo ntwâli, lyoki ankabona oku ayinyaga ebirugu byâyo.
28 Mmubwîre okuli: ntâco abantu barhakababalirwakwo, ebyâha byoshi na ngasi malogorhe goshi bâlogorhe.
29 Ci owalogorhere kubî Mûka Mutagatîfu
*, ntà mango anababalirwe: agwârhwa n’ecâha c’ensiku n’amango.»
30 (Yezu anaciderha ntyo) bulya bakâg’iderha mpu: «Shetani omulimwo».
Ababusi na bene wâbo Yezu
(Mat 12, 46-50; Luk 8, 19-21)
31 Nina na bene wâbo bayisha, bayimanga embuga, bàrhuma owaj’imuhamagala.
32 Obwo erhi engabo nyinji y’abantu emutamîre eburhambi. Banacimubwîra, mpu: «Nyoko na bene winyu abo bali embuga bakulonza».
33 Naye abashuza, erhi: «Nyâmà ye ndi na bene wîrhu
† bo bahi?»
34 Okubundi ageza balya bâli bamutamîr’eburhambi mwo amasù, anaciderha, erhi: «Alà nyâmà na bene wîrhu!
35 Ngasi yêshi ojira oku Nnâmahanga alonza
‡, oyo ye mwene wîrhu, ye na mwâli wîrhu, ye na nyâmà».