NAHUMU, NAHUM
Enshokolezi
Ecitabu ca Nahumu cirhangira n’olulanga lw’oburhè bwa Nyamubâho n’okutwîrwa olubanja kw’ababî. Abantu b’omu Asûru bayishihanwa na ab’omu Yûda bayishicungulwa (1, 2—2, 3).
Nahumu alonzagya okumanyîsa oku Ninive âyishiherêrekezibwa. Nyamuzinda âyishimuhà obuhane bwenêne erhi kulibuza Israheli n’agandi mashanja kurhuma.
Ninive ahanwa omu mwâka gwa 612 embere Kristu aburhwe. Ntyo Nahumu ayandikaga ecitabu câge myâka misungunu embere ly’ago mango. Abayahudi b’enyuma ly’ago mango barhàcilangaliraga okuhima abashombanyi bâbo b’en’igulu. Balangâlira okucungulwa kw’iroho.
Nahumu kuli kuderha LUHÛMA, abalibuzibagwa bahûmuke bulya owalibuzagya abandi akola alyûla amabî gâge, Nnâmahanga akola amuhana.
EBIRIMWO
1. Oburhè bwa Nyakasane: cigabi 1
2. Okurhêrwa kwa Ninive: cigabi 2
3. Okuhanwa kwa Ninive: cigabi 3
1
1 Aka kali kanwa k’obulêbi buyêrekîre Ninive, myanzi Nyamubâho àfulûliraga Nahumu w’e Elkoshi.
Enshula-mwanzi
Lulanga: Oburhè bwa Nyakasane
2 Kàli Nyamubâho abà wa mitula, Nyamubâho abà mwihôzi! Nyamubâho anacihôle, abà wa burhè bwenêne! Nyamubâho anacihôlere abashombanyi bâge, anabike omujina oku babisha.
3 Nyamubâho arhabà burhè duba, ci kwônene arhahimwa budârhi, Nyamuzinda arhankaleka okuhana endyâlya eyâzire. Analambagire omu mpûsi n’omu mulaba, n’omu cihonzi, ebitù, ko katulo enshando zâge zibalaza.
4 Anarhalabanye enyanja, ayiganye, anaganye enyîshi zoshi. Bashani na Karmeli bayumvîrhe erhi okwo kurhuma, ehibala by’omu Libano hyagokomba!
5 Entondo zinajugume emalanga gâge, orhurhondo rhugeremwo ogwa nyegenye; idaho likunduke, igulu n’abaliyûbakakwo.
6 Obukali bwâge wâni! Ndi wankabulindira? Ndi wankafukunya amango adârhabîre? Obudârhi bwâge kwo buyâka nka muliro, n’amabuye ganashanguke embere zâge. 7 Nyamubâho abà mwinjà abà lwâkiro amango g’amalibuko oku bamuhizirekwo omurhima, abamuyegemera n’abamuyishi, 8 amango ecihônzi cizûsire*1, 8 mango ecihônzi cizûsire: Amango obuhanya buzûsire… Eci cinwa cikengezize enkuba y’ecihônzi cinene (Nûhu ali murhûliriza aka Nahumu nk’oku kuyandisirwe omu citabu c’Omurhondêro 5, 29; ago mazîno gombi kulikuderha LUHÛMA).. Anatulikanye abamuhizirekwo akamêne, alukirîze abashombanyi bâge kuhika omu mwizimya.
Obulebi kuli Yûda na Ninive
(Kuli Yûda)
9 Bici ogererîze kuli Nyamubâho? Kàli ye Kaheza, obujà burhâshubirire kabirhi 10 Bâjamo eciri nka câhirà, bâhungumuka nka lubala! Omu, boshi bâhungumke.
(Kuli Asûru)
11 Emwâwe, wâni Ninive, yo yârhengaga omuntu w’emihigo y’obulyâlya, omuntu w’omurhima guli nka gwa Beliyali†1, 11 Oyu mubisha warhengaga emwa Asûru, anabà Senakeribu. (Rhulole 1 Bâm 18—19), .
(Kuli Yûda)
12 Nyamubâho adesire ntya, erhi: «Ciru bakarhabâla, ciru bakaluga kurhi, bagûkumuka, baherêrekere. Akabà nakugânyaguzize, ntakacikugânyaguza bundi. 13 Na bunôla nkolaga nakuhûmûla kuli ogwo muzigo, nâtwa emigozi ekushwêsire.»
(Kuli mwâmi w’e Ninive)
14 Wâni Ninive, lolà oku Nyamubâho akuhigîre: ntà bûko bwâcihêke izîno lyâwe, nâshâba engombe y’abazimu bâwe, nkûlemwo enshushano mbinjè n’emmumbe, n’enshinda yâwe nyishandâge bulya wahehêrîrwe.
*1:8 1, 8 mango ecihônzi cizûsire: Amango obuhanya buzûsire… Eci cinwa cikengezize enkuba y’ecihônzi cinene (Nûhu ali murhûliriza aka Nahumu nk’oku kuyandisirwe omu citabu c’Omurhondêro 5, 29; ago mazîno gombi kulikuderha LUHÛMA).
†1:11 1, 11 Oyu mubisha warhengaga emwa Asûru, anabà Senakeribu. (Rhulole 1 Bâm 18—19),