1 Nyamubâho ashambâla na Mûsa n’Aroni, aderha, erhi: 2 Alaga ebinwa b’irhegeko Nyamubâho arhegesire, ene aderha erhi: Ojibwîra bene Israheli bayîshe bandwîrhîre enkâfu y’omukara, erya erhagwêrhi ishembo lici oku mubiri, erhanasagihêka omuzigo. 3 Muyihekere omudâhwa Eleazari, naye anayirhenza omu cihando bagendiyibâgira embere zâge. 4 Omudâhwa Eleazari anarhôla oku mukò gw’eyôla nkâfu n’omunwe gwâge, anajira nago olukangûlo kali nda olunda lw’omuhango gw’Ihêma ly’embugânano. 5 Banayôca eyôla nkâfu erhi anadwîrhe abona! banayôca oluhù lwâyo, enyama zâyo n’omukò gwâyo kuguma n’ecihò câyo. 6 Omudâhwa anarhôla enshâli z’omurhi gw’omwêrezi, ez’olwifûyè n’ebindi by’akaduku; anabikwêba mulyamuliro gudwîrhe gwasingônola erya nkâfu. 7 Kandi anashuka emyambalo yâge, ashukire n’omubiri gwâge omu mîshi, anashubira omu cihando, ayôrhe mugalugalu*19, 7 Nk’oku bishingânîne, omuntu mugalugalu arhagwâsirwi okugaluka omu cihando e­mbêre bijinge (Lush 23, 12) kuleka omudâhwa. kuhika bijingo. 8 Naye olya wayôcagya erya nkâfu, anashuka emyambalo yâge, ashukire n’omubiri gwâge omu mîshi, anayôrha mugalugalu kuhika bijingo. 9 Omuntu oli bwinjà anaguka lulya luvù lw’erya nkâfu, anagendilubulagira emuhanda gw’ecihando, omu hantu hinjà; bakazilubikira endêko ya bene Israheli, bakaziluhira omu mîshi g’okubayôbôla; eri nterekêro oku byâha. 10 Oyu wagukaga oluvù lw’erya nkâfu anashuka emyambalo yâge, anayôrha mugalugalu kuhika bijingo. Okwôla, lyâbà irhegeko ly’ensiku zoshi oku bene Israheli n’oku muntu w’ecigolo onayûbasire ekarhî kâbo.

11 Owankahuma oku mufù mulebe erhi mulebe, oyôla anabè mugalugalu nsiku nda. 12 Anayishicîcêsa n’agôla mîshi olusiku lwa kasharhu n’olwa kali nda, anabà bwinjà. Ci erhi akabà arhacîcêsizi oku lusiku lwa kasharhu n’olwa kali nda, arhankabà bwinjà. 13 Owankahuma oku mufù, oku mubiri gw’omuntu wamafa, akabà arhacîcêsizi, oyôla anahemula endâro ya Nyamubâho; kukwânîne akagwe omu bene Israheli. Bulya galya mîshi gakûla ebizinzire garhabulajikire kuli ye; ali mugalugalu, n’agôla mazinga gâge anagayôrhana. 14 Alaga irhegeko erhi omuntu ankafira omw’lhêma. Ngasi yêshi wankajà muli eryo ihêma, na ngasi kalugu kali muli ryo, ebyôla byoshi byanabà bigalugalu kuhika nsiku nda. 15 Ngasi kalugu kafûnule, kalya karhagwêrhi cifûniko cisheke n’ehigozi, kânaba kagalugalu. 16 Ngasi yêshi wankahuma oku muntu wanigiragwa omu mashwa, erhi wundi ofîre kwônene erhi mavuha ga muntu, erhi oku cûsho, oyôla ânabà mugalugalu kuhika nsiku nda.

17 Kuli oyu muntu mugalugalu, banarhôla oku luvù lw’embâgwa yasingônolagwa nka nterekêro ya mpyûlo oku byâha, banabulagirakwo n’amîshi minjà gali omu kalugu. 18 Omuntu oyôsire bwinjà anayanka ebyâsi by’olwifûyè, na hano abà amabidobeza omu mîshi, anajiramwo olukangûlo oku nyumpa, oku ngasi kalugu n’oku bantu boshi banali halya, kuli omuntu wahumaga oku mavuha, erhi olya muntu bayîrhaga, erhi wundi ofîre kwônene erhi ohumire oku cûsho, 19 omuntu oli bwinjà anajira olukangûlo kuli olya oli mugalugalu, oku lusiku lwa kasharhu na olwa kali nda; anamukulira ecâha câge oku lusiku lwa kali nda. Oyôla muntu mugalugalu anashuka emyambalo yâge, naye yêne anacîshuka omu mîshi, na bijingo ânabà bwinjà. 20 Omuntu wankabà mugalugalu nka arhanacîcêsizi, anakagwe omu lubaga, bulya adwîrhe ahemula ahantu himâna ha Nyamubâho; bulya galya mîshi gakûla ebizinzire garhabulajikire kuli ye: ali mugalugalu. 21 Kuli bo lyabà irhegeko ly’ensiku zoshi. Olya muntu wajiraga olukangûlo lwa galya mîshi gakûla ebizinzire anashuka emyambalo yâge, owankahuma oku mîshi gakûla ebizinzire, anayôrha mugalugalu kuhika bijingo. 22 Ehi akahumwakwo oli mugalugalu, nahyo hinabè higalugalu, n’omuntu wankahihumakwo naye anabè mugalugalu kuhika bijingo