1 Balâmu abona oku Nyamubâho arhonyize okugisha Israheli, lêro arhacijaga nk’agandi mango ebwa kugendidôsa embuko, ci ayêrekeza obusù bwâge ebwa irungu. 2 Erhi Balâmu abà amâyinamula amasù, abona oku bene Israheli bahanzire ishanja oku lindi, anaciyagânwa na Mûka gwa Nyamuzinda, 3 aderha ecinwa câge, erhi:

Obugeremwa bwa Balâmu mwene Beori,

Obugeremwa bwa omuntu onizire isù,

4 Obugeramwa bwa olya muntu oyumva ebinwa bya Nyamuzinda,

Kubona abona ebi Ogala-byoshi ayêrekana,

anahâbwe n’ishuzo limâna n’amasù gâge gabungûke.

5 Alà oku gayinjiha amahêma gâwe Yakôbo!

n’enyumpa zâwe, Israheli!

6 Nka kula orhubanda rhulanduka,

nka kula amashwa mahinge oku lwîshi,

nka binûsi Nyamubâho arhwêraga,

nka kula emiyerezi elandira oku burhambi bw’amîshi.

7 Amîshi ganasheshe ebi bindi byâge,

n’emburho yâge egundumuke enyanya ly’ago mîshi manji,

omwâmi wâge ayisha ayêrêra enyanya ly’Agagi,

n’obwâmi bwâge bwajire irenge!

8 Nyamuzinda amurhenza e Mîsiri:

amuhà emisî eri nka ya mbogo.

Yamalîra amashanja gashingalala embere zâge.

Yabavunangula orhuvuha, anabatyabule n’emyampi yâge.

9 Anagonye amadwî, acîbundike nka ntale ndume,

nk’amacîbundika nka nsimba, ndi wankacimuzûsa?

Agishwe, owâkugishe n’owakuhinde, akahindwa!

10 Oburhè bwa Balaka bwayâka bwenêne kuli Balâmu, ashûrha omu nfune, amubwîra erhi: «Nalikuhamagala nti ohehêrere abashombanyi bâni, wêhe kwamabà kubagisha kasharhu. 11 Na buno yimukaga duba olibirhire emwâwe! Nali ndesire nti nakujira oj’irenge; lêro lolà oku Nyamubâho amakuyegûla kuli lyo.» 12 Balâmu anacishuza Balaka erhi: «Ka ntali erhi nabwîzire entumwa wali orhumire, oku: 13 Ciru Balaka akampa enyumpa yâge eyunjwîre nfaranga na masholo, ntakavuna irhegeko lya Nyamubâho, omu kujira niene nk’oku nnonzize okujira ehinja erhi ehibî; n’oku ngasi oku Nyamubâho anadesire kwo naderha? 14 Alaga oku bunôla nkola nacîshubirira emw’olubaga lwâni; yishaga nkubwîre ehi olu lubaga lwanajirîre olubaga lwâwe omu nsiku zàyisha». 15 Okuhandi anaciderha ebi binwa, erhi:

Bugeramwa bwa Balâmu mwene Beori,

bugeramwa bw’omuntu wanizire isù,

16 bugeramwa bw’olya muntu oyumva ebinwa bya Nyamuzinda

ye oyishi eby’Ow’Enyanya

ye olya obona ebyanacibonwe by’Ogala-byoshi

olya okûmba bûbi anagalirhondêra abona.

17 Namamubona, ci kwône arhacibà wa buno;

namamulâba ci kwône arhacibà nk’oli hôfi.

Enyenyêzi yamârhenga muli Yakôbo,

akarhi k’obwâmi kamayimanga omu Israheli;

kamavunanga emyanganga ya Mowabu,

Kamamalîra bene Seti.

18 Ecihugo c’Edomu camagwârhwa busâsa,

na Seyiri kwo n’okwo; Israheli amâlambûla obuhashe bwâge.

19 Emwa Yakôbo yamârhenga omurhegesi

ye wamalîra ngasi bicisigîre omu ngo na Edomu.

20 Balâmu abona Amaleki, anacimubwîra ebi binwa, erhi: «Amaleki lyo ishanja likulu omu mashanja, n’obuzinda bwâge kwabà kushâbûka». 21 Balâmu anacibona bene Keneti, anaciderha, erhi: Aha mwinyu bahazibuhize, ewe Kayini, n’enyumpa zinyu ziri nyûbake oku ibuye. 22 Ci kwônene olugo lwinyu lubà lwa Beori; amango gahi mwanarhenge omu bujà bwa Asûru? 23 Balâmu ashubirira aderha ebi binwa, erhi: Aye, amashanja g’emashinji gabugânana emwênè, 24 n’enkugè olunda lw’e Kitimi. Gamalibûsa Asûru, gamabengeza Eberi; naye obuzinda bwâge kuli kuherêrekera lwoshi. 25 Balâmu erhi abà amayimuka, ahuma njira, acîshubirira emwâge; naye Balaka ajà lwâge lunda.