19
Dibi-dibi garhali magulu
1 Omuganda orhali mudahemuka ye mukulu, oku mugale w’omusirhe na wa kanwa kabî.
2 Obushiru burhagerêreza burhali bwo, n’amagulu mabidu-mabidu ganahabuke.
3 Obuhwinja bw’omuntu bunamusherêgeze amâjira, omurhima gwâge gubâge Nyakasane ye gutumuza.
4 Obugale buluza abîra, omukenyi yêhe ciru n’omwîra muguma anamuyâke.
5 Omuhamîrizi w’obunywesi ârhakabula buhanwa, naye kanywesi yêne ârhakafuma buhane.
6 Omuntu ohâna, banji bamusengera, ohâna boshi bamurhonya.
7 Erhi bene wâbo omuntu wamâkena bamushomba boshi, kurhi abîra bâge boki bankabulaga bwamuyâka.
8 Owabwîne ahika oku mûka, anacîtakîre, n’omuntu okola n’oburhimanya ye bandâna obucire.
Okurhuza kw’omugula
9 Omuhamîrizi w’obunywesi arhabula buhanwa, naye kanywesi yêne, kuhera ânahere.
10 Obwigusi burhakwânana musirhe, omujà naye kushuhwa ashuhwa n’okurhegeka ba nnawâbo.
11 Oburhimanya bw’omulume bumanyirwa oku kurhûza kwâge, n’irenge lyâge lirhalibirhira ebigalu-galu.
12 Okukaliha kwa mwâmi kwo kuyôrha nka mululumo gwa ngoromora, okurhonya kwâge kwo kuyôrha nka lumè oku byâsi.
13 Omwâna muhwinja buhanya bw’îshe, omukazi w’embaka kw’ali nka mirhônyi yarhoga oku nyumpa burhahusa.
14 Enyumpa y’ebirugu, kashambala k’îshe wa muntu, ci omukazi mwîrhonzi, ngalo ya Nyakasane.
15 Obwôlo njingo buvuna, murhima mwângu, arhafuma ishali.
Murhima mwinjà omuntu asîmirwa
16 Olanga amarhegeko kucîlanga acilânga yêne, ci omuntu olekerera enjira yâge kufâ ajifâ.
17 Obabalira omukenyi erhi Nyakasane abîsize, yêne ye wâjuhe.
18 Ohane mugala wâwe liciri duba, ci kwône orhacîhiraga oku ntuli y’okumuyîrha.
19 Omukali yêne ocijira, okumulekerera kunali kuyûshûla obuhanya bwâge.
20 Oyumve ihano onaleke bakuhakanye, lyo ozinda oli murhimanya.
21 Emihigo y’omurhima gw’omuntu eluga, ci omuhigo gwa Nyakasane gwo gusêra.
22 Murhima mwinjà omuntu asîmirwa, n’omukenyi ye mukulu aha munywesi.
23 Okurhînya Nyakasane ebà njira ya kalamo, ecimubâ co cinamubâ, n’omubâ arhaganya buligo.
Okuhanûla
24 Omwôlo analikire okuboko oku cishanjo, arhânakuhise ciru n’ekanwa.
25 Shûrha ogayana, omuhwinja ayengehe, kalihira omwenge akûlemwo ihano.
26 Okolera Îshe amaligo akanahulusa nnina, ali mwâna muhanya na muhehêrere.
27 Mwâna wâni, olekage n’okuyumva amahano, akabà kuyâka walonza okuyâka ebinwa by’oburhimanya.
28 Muhamiriza mubî oshekera abashamuka e kagombe, akanwa k’endyâlya kugulinjika kagulinjika amaligo.
29 Akarhi kanali ka kuhana abagambana, n’empîmbo zibà zirinzire omugongo gw’abahwinja.