21
Okukola ebishingânîne
1 Omurhima gwa mwâmi kwo guli omu nfune za Nyakasane nka mugezi gwa mîshi, emunda alonzize yo anaguhengulira.
2 Omu masù g’omuntu yêne, enjira zâge zoshi zishingânîne, ci Nyakasane yêhe mirhima ahombaganya.
3 Okukola ebishingânîne bikwânîne omu masù ga Nyakasane, kwo kukulu aha nterekêro.
4 Okulolera abandi oku cirhugo kugayana, enkola-maligo erhakola agarhali maligo.
5 Omwîrhonzi murhima adôsa na kuyunguka ayunguka, ebya duba-duba cizombo binafulusa.
6 Obugale burhenga omu bunywesi cihemu, oku burhimanga kwo bunali bwa mihera yalonza olufù.
7 Obulala bw’enkola-maligo bwo bwânazihezè, bulyâla zàlahire bwakola ebishingânîne.
Rhinga bwinjà bwônene bujirwa
8 Enjira y’enkola-maligo erhashongera, ebijiro by’entagengwa byôhe bibà bishongire.
9 Aha omuntu ankabêra haguma n’omukazi w’embaka, ankacijira oku kanshôsho k’enyumpa.
10 Enkola-maligo erhalongeza bandi kalamo, aha bwâge owâbo arhankababalirwa.
11 Bakahana omugambanyi, omunyi anabè murhimanya, n’omurhimanya bakamuhanûla anayengehe.
12 Omushinganyanya analolêreza enyumpa y’endyâlya; abulindike enkola-maligo omu buhanya.
13 Ofuka amarhwîri mpu arhagiyumva izù ly’omukenyi, naye ânaciyâme abule n’ecishuzize.
14 Ebihânwa bushâla-shâla binarhûze oburhè, n’ebihânwa bufunda-funda binarhûze obukali.
15 Oku mushinganyanya, okukola ebishingânîne kulyâ ntânda, ci, oku nkola-maligo, kurhahimwa câbà. Ow’amîru arhagala
16 Ocikûla omu njira y’obwîrhonzi omu ndêko y’abalinda-mboho afuduka akola ali.
17 Ow’amîru arhagala, ntâkwo agale omuntu osîma amamvu n’amashushi.
18 Enkola-maligo yo ncungulà y’entagengwa, n’endyâlya yo ebà ncungulà y’abashinganyanya.
19 Abà wankabêra nyumpa nguma n’omukazi w’embaka oyôrha arhûnzize, wankacîbêrera omu cihugo cirhabâmwo ndi.
20 Abà mw’omurhimanya habâ ebinja, habâ n’amavurha, omuhwinja yêhe abishandâze.
21 Okulikira enjira y’obushinganyanya n’ey’olukogo, ye hika oku kalamo n’oku irenge.
22 Omurhimanya ànahime olugo lw’entwâli, anahongole olwâkiro bacîkubagira.
23 Olanga akanwa n’olulimi lwâge, oku mutula acilanga.
Banyamakobwa bali banji
24 Izîno ly’omuntu ogambana, onagayana: ye Nyamakobwa, ngasi ebi akola kagayo abikolamwo.
25 Enyifinjo z’omwôlo kuyîrha ziyîrha, bulyâla enfune zâge zirhaziga zakola.
26 Enkola-maligo enalegerere yacîfinja ebya bene, oku omushinganyanya abâna ebyâge.
27 Enterekêro enkola-maligo zirherekêra erhi na bishwêka, k’olânga lyôhe bakazirherekêra n’omurhima guhizire amaligo.
28 Ohamîriza obunywesi erhi muhera, ci omuntu orhangiyumvirhiza ye manyiderha.
29 Endyâlya busù bukulu eciha, omushinganyanya yêhe kulola aj’alola aha âgera.
30 Ntà burhimanya, ntà bwîrhonzi, na nt’ihano lyankacigererakwo Nyamubâho.
31 Olusiku lw'okulwa, abantu biterusi barheganya, ci kwône Nyamuzinda ye boshi banasengera mpu abahimire.