1 Oku ecânda cishuhwa n’enkuba y’olubula erhi nkuba kwône, kwo n’omusirhe ashuhwa n’olukengwa.

2 Kula akafûnzi kaburuduka, na kulîra ehiremberembe hiheneka, kwo n’enfûlago y’obumâma egenda ciru.

3 Nka kula bayîkira eciterusi akarhi, n’ecihêsi omukoba kwo banabikira abahwinja emihini.

4 Orhahîra okadumiza omusirhe oku isirhc lyâge, wakanabà akâge nâwe.

5 Omusirhe omushuze nk’oku isirhc lyâge linali, akâmanya mpu ali murhimanya.

6 Kubula-bulà na kucîtwa amaboko, okurhuma omuganda w’ecingolo-ngolo.

7 Entege z’ow’akagulu zirhajira nsimiko, zo nguma n’omugani omu kanwa k’ecingolo-ngolo.

8 Kunanîriza ibuye oku mujaleti, okuhà ecingolo-ngolo irenge.

9 Omugani omu kanwa k’ecingolo-ngolo, ihaji lya kashûgi-shûgi omu nfune z’omulalwe.

10 Omulwî wâlasha ngasi muntu wacîgerera, ye muguma n’omuntu oziga akolerwa n’ecingolo-ngolo.

11 Kulîra akabwa kashubîrira ebishaliza, kwo n’omuhwinja naye ashubirira obuhwinja bwâge.

12 K’okola oshanzire omuntu ôcibwîne burhimanya? Omusirhe ye mukulu hali ye.

13 Omwôlo erhi engoromora eri emuhanda, «entale eri emuhanda!»

14 Omwôlo kwo ahinduluka aha ncîngo, kula olumvi luhinduluka omu mulirango.

15 Omwôlo anazinde alikira okuboko oku cishanjo, okukuyêrekeza ekanwa kumurhamye.

16 Omwôlo kw’amanya mpu ye murhimanya olushîne, walusha bantu nda bashuza n’obwîrhonzi.

17 Okucîhira omu lubanja lwa bene, kubà kugwârha amarhwîri g’akabwa.

18 Kwo ali ak’omusirhe walasha omuherho gulikwo emyampi èkolîre, gulikwo n’empiru n’olufù,

19 omuntu orheba owâbo, abuliderha, erhi: «byàli bihinza!»

20 Cibula ca nshâli cizimya omuliro entambala nayo enahwe nka ntà rukozo-wâkoza.

21 Omuntu mukunizi kw’azûsa akadali kulîra, amakala gazûsa omuliro, kulîra bahira enshâli oku cîko.

22 Ebinwa by’omuntu w’omwanzi bubà bununîrizi, buyandagalira omu nda kuhika oku nyômvu.

23 Buhomo oku nyungu y’ibûmba, ko kanwa k’omuntu oganira n’olubohôlolo, n’obwo omurhima gwâge guli mubî.

24 Oshombana ajira oku arhebana n’ebinwa, n’obwo omurhima gwâge guyûbarhîre obulyâlya;

25 ciru akaderha n’obwonjo, orhamuyêmêraga, bulyâla omu murhima gwâge muli bigalu-galu nda.

26 Enshômbo hali amango ecihundikira obulenga, omu ndêko mwo eciyêrekanira.

27 Ohûmba omwîna anagugwemwo, ohirika ibuye linamugalukekwo.

28 Olulimi lunywesi lushomba okuli, akanwa kashigîriza kushâba kashâba.