ENNANGA
Enshokolezi
Ed citabu cibâmwo Nnanga 150. Ennanga kwo kuderha enyimbo zayimbagwa omu cînanda erhi omu nzenze erhi omu mulimba gw’engoma. Kurhenga mîra, abantu bw’omu Israheli bagwerhe ennanga za ngasi lubero nk’agandi ma- shanja g’ebushoshôkero bw’izuba, nk’enyimbo za Mûsa (Lub 15), Olwimbo lwa Debora (Bac 5); emisengero ya Daudi (2 Sam 1, 17) na ntyo na ntyo. Ecitabu c’Ennanga cibâmwo ennanga z’idini zajiragwa n’abantu ba ngasi lubero.
Daudi wajiraga ennanga, ci kwône ezindi zajiragwa enyuma ly’okurhenga e Babeli. Ennanga zasâlîragwa n’okuyimbwa omu ka-Nyamuzinda kurhenga mîra bwenene. Obwinja bw’Ennanga: ennanga gali masala g’Amalaganyo ga mîra. Nyamuzinda yêne wabafûhiraga ebinwa alonzagya mpu bamushambâzemwo. Yezu yêne na nnina Mariya n’entumwa basàliraga ennanga. Ekleziya eyimba ennanga nk’oku esalîra agandi masâla matagatifu. Abayandikaga ennanga bakolêsize ebinwa n’ebijiro by’amango gabo. Buzir’okuhindula oluderho ciru n’olu- guma, ebyo binwa by’okukuza Nnâmahanga, by’okumushenga, by’okumuharâmya, byanahash’ikolesibwa n’abantu boshi erhi bankayimanga embere za Yezu, Mucunguzi wirhu. Ebi abayandikaga Ennanga bamanyîsagya mulizo byoshi byabire: Omuciza mîra ayishaga, ayîmire n’amashanja nago goshi gahamagirwe okumukuza, okumuhà irenge emyaka yoshi.
EBIRIMWO
Ennanga zijira mbero isharhu nene:
1. Enyimbo z’okukuza Nnâmahanga
2. Enyimbo z’okushenga
3. Enyimbo z’enyigîrizo
1
Enjira ibirhi
1 Iragi lyâge omuntu orhacîfundikira haguma n’encuku
orhagenda n’emihera, orhanaboneka omu ndêko y’abashombanyi.
2 Arhasîmisibwa n’agarhali marhegeko ga Nyamuzinda,
anagerêreza ago marhegeko bwacà-bwayira.
3 Kwo agandâza nka murhi gumezire aha cikunguzo c’olwîshi,
guyêrakwo emburho amango gâgwo, gunayôrha guyinjihire.
Na ngasi hyoshi ajira kubêra himubêra.
4 Emihera erhakabona okwo!
kàli kw’eri nka hyâsi hya canda hiyehwîrwe n’empûsi!
5 Ntà kwâbo: aha kagombe eyo mihera erhakahambûla,
ciru erhakalabarha omu ihano ly’abashinganyanya*1, 5 Sadiq ye mushinganyanya ci arhali rash’.
6 Bulya Nyamuzinda ayishi enjira y’abimâna,
ci enjira y’endyâlya kuhabula ehabula.
*1:5 1, 5 Sadiq ye mushinganyanya ci arhali rash’