4
Musengero gw’ebijingo
1 Gwârhi omukulu w’abimbiza. Oku luzihwa lusâlikwa n’emisî: Lulanga lwa Daudi.
2 Nkakulakira, oyumvîrhize izù lyâni, Yâgirwa,
Nnâmahanga, mucîranuzi wâni:
Kàli nàlimbengîre, wanciza:
ndîkûza we kasinga, onayumvîrhize omusengero gwâni.
3 Mwe bantu, mangaci mwaleka obudandalisi bwinyu,
mangaci mwaleka okurhonya empûsi n’okulonza obunywesi?
4 Ci mumanye bwinjà oku Nyamuzinda
àjirîre omurhonyi wâge ecirhangâzo, nkamulakira, Nyakasane anayumve izù lyâni.
5 Muyôbohe n’irhondo murhacijiraga ecâha,
n’amango mukola muli aha ncingo,
mucîje emurhima, muhulike!
6 Murherekêre enterekêro z’okuli,
mucîkwêbe omu maboko ga Nnâmahanga!
7 Banji bacîduduma, mpu:
«Ndi wankacirhuha akalembe wâni?»
Yâgirwa Nyakasane, orhumolekere n’obumoleke bw’obusù bwâwe.
8 Waliha Nnâmahanga, omurhima gwâni oguyunjuze masîma,
galushire ag’amango engano n’irivayi lyâbo biyêzire.
9 Ncikolera aha ncingo n’omurhûla, na nkola ndi îrò:
bulya we onyimangire wênene, Yâgirwa Nnâmahanga.