14
Isirhe ly’omuntu orhîshi Nnâmahanga
1 Gwârhi omukulu w’abimbiza. Lwa Daudi
Omusirhe anakâderha omu murhima gwâge, erhi:
«Nyamuzinda arhahabà!»
Bàcisherêzize, bàjira ebirhankaderhwa;
ntà muntu okola aminjà ocibabâmwo.
2 Kurhenga emalunga Nyakasane adwîrhe asinza bene-Adamu,
mpu alole erhi bankacibonekanamwo ogwêrhe obukengêre,
ocidwîrhe alonza Nyamuzinda.
3 Boshi boshi bahabusire, oku banali boshi bàsherîre,
ntà muntu okola aminjà ocibabâmwo,
ntâye ciru n’ow’obufumu.
4 Ka barhakayumva,
abôla banyankola-maligo bakàmirangusa ishanja lyâni
nka kulya omuntu amirangusa omugati,
barhanashenga izîno lya Nyakasane?
5 Co cânarhume bajuguma n’obwôba buzira igwârhiro ly’ecôbà
kulya kubà Nyamuzinda ayôrha abâ n’iburha ly’omushinganyanya.
6 Kàli mwêhe mpu mwashekera ihano ly’omunyi,
n’obwo Nyamuzinda ye lwâkiro lwâge!
7 Owabona obucire bw’Israheli buhubuka e Siyoni!
Mango Nyakasane àgalula olubaga lwâge ekà,
Yakôbo acîshinga, Israheli asîme!