2 Amalunga gaganîra irenge lya Nyamuzinda, n’enkuba ederha emikolo y’eminwe yâge.

3 Olusiku lushambâlira olundi lusiku, n’obudufu bubwîra obundi budufu.

4 Lirhali iderha birhanali binwa, izù lyabyo lyankabula bwayumvibwa:

5 Izù lyabyo lilumîre igulu lyoshi, n’enderho zâbo zihisire ngasi aha igulu lihekera. Eyo nyanya yo àyubakira izûba icumbi,

6 Nalyo, nka muhya-mulume warhenga omu k’obuhya, lisîma okushimba enjira yalyo nka ntwâli.

7 Lishoshôkera oku mpekà y’emalunga, lihike bulibirha oku yindi mpekà, na ntâco cankacîfulika idûrhu lyâlyo.

8 Amarhegeko ga Nyamuzinda gabà mimâna, gazibuhya omurhima; akanwa ka Nyamuzinda kabà k’okuli, kabwîriza ecidâga obugula.

9 Amarhegeko ga Nyamuzinda gashingânîne, gasîmîsa omurhima akanwa ka Nyamuzinda kulangashana kalangashana, kabà kamole k’amasù.

10 Okurhînya Nyakasane bubà bucêse, kuyôrha ensiku n’amango; emmanja za Nyakasane zibà z’okuli zoshi zoshi zishingânîne.

11 Zanacîfinjwa kulusha amasholo kulusha amasholo gacìre bwenêne; galushire obûci obununu, ciru n’enshongôle y’obûci.

12 Naye mwambali wâwe go gamuyigîriza, kali kamalo kanene okugashimba.

13 Ndi wankamanya amabî gâge? Ombabalire ngasi bubî bucînfulisiremwo.

14 Obucîbone nabwo obulangekwo mwambali wâwe, bulek’impîma! Ntyo mbè muntu mwimâna, na mwêru-kwêru oku câha cinene.

15 Mâshi enderho z’ekanwa kâni zikusîmîse, n’entimanya z’omu murhima gwâni embere zâwe, Nyakasane Nyamuzinda, ntebo yâni na Muciza wâni.