2 Yâgirwa Nyamuzinda, Nyamuzinda wâni, kurhi wandekêrîre? Oli kuli n’omusengero n’omulenge gw’izù lyâni.

3 Yâgirwa Nyamuzinda wâni, namâlaka omulenge mûshi, orhananyumvîrhîzi, nnandwîrhe nalira budufu, orhanatwa ihuzihuzi.

4 Ocîbêrîre omu ndâro yâwe, mwo Israheli akuhêra irenge.

5 We bashakulûza balangâlîre; bàkulangâlira, nâwe wàbaciza.

6 Erhi bàkuyâkûza, bàcira, erhi bacîkwikubagira, barhacitulutûmbaga.

7 Niehe ndi muvunyu, ntali muntu: ndi mugalugalu omu bîrhu, ndi ikundwe omu lubaga.

8 Ngasi wambona erhi anangayaguza, abande ennani, adunde irhwe.

9 Mpu: Nyakasane amucizagye, obwo ye akacîkubagira; amulwîrage, bulya kuzigira amuzigira.

10 Arhali wundi wankûlaga omu nda ya nyâmà, ci wêne, wandera n’omurhûla erhi ndi oku ibêre

11 Kurhenga aha kuburhwa mbà wâwe nieshi, wêne Nyamuzinda wâni kurhenga omu nda ya nyâmà.

12 Mâshi, orhanje kuli, obu narhindibuka, yegera hôfi, bulya ntagwêrhi murhabâzi.

13 Ndi butumirhwa n’empanzi mwandu mwandu, ensimba z’e Bashâni zamànzunguluka.

14 Zidwîrhe zanyânira emalanga, nka ntale yatula yanabinja mpu ndîbwe.

15 Namâbulajika nka mîshi, namâjonjolekana orhuvuha. Omurhima gwâni gwamâjonga nka nsinde, gwamâhirigirha omu nda.

16 Namâyumûka omumiro nk’isèsè, n’olulimi lwamânanîra ebiraka.

17 Orhubwa rhunzungulusire mwandu mwandu, omulongo gw’enkola-maligo guntêzire. 18 Bantuzire amaboko n’amagulu, banaganja orhuvuha rhwâni rhwoshi.

19 Badwîrhage bampengûza, banammôlera amasù: emyambalo yâni bayigabanyire, n’ecirondo câni baciyeshire cigole

20 Mâshi, Yâgirwa, orhacilegerere, okanye, ontabâle

21 Yâgirwa Nyamuzinda, obuzîne bwâni oburhenze oku ngôrho, omanye nankalumwa n’akabwa.

22 Onkûle omu kanwa k’entale, n’obunyi bwâni oburhange oku mahembe g’embogo.

23 Nâlumîza irenge ly’izîno lyâwe ekarhî ka bene wîrhu, nnankukuze omu ndêko y’olubaga.

24 Mwe murhînya Nyakasane, kuzagyi ye, we iburha lya Yakôbo wêshi, omuhè irenge. Iburha ly’Israheli lyoshi limoyôbôhe.

25 Kulya kubà arhankengulaga, arhanagayaguzagya omusengero gw’omunyi arhananfulikaga obusù bwâge, ci erhi nkaz’imuyâkûza, ànyumvîrhiza.

26 We nâkaziha irenge omu ndêko nkulu, nâjirire eciragâne embere z’abakurhînya.

27 Abakenyi nabo bâlya banayîgurhe, n’abalongereza Nyakasane, kukuza bâmukuza, emirhima yâbo elame ensiku n’amango.

28 Igulu lyoshi lyàkengera Nyakasane, linabè ye lishiga, n’emilala y’amashanja goshi yâfukama embere zâge, emuharâmye.

29 Bulya Nyakasane ye Nn’obwâmi, yêne ye Nyamwagirwa w’amashanja;

30 Yêne yêne baharâmya abayûbaka igulu n’abadwîrhe bajà omu idaho, bamuyûnamire.

31 Iburha lyâni ye lyâkolera; Amashanja gânacibwîrwe obwonjo bwa Nyakasane.

32 N’iburha lyâyisha libwîrwe obushinganyanya bwâge, mpu: «Lolagi emikolo ya Nyakasane».