Emund’oli yo nyêrekîze omurhima gwâni, Yâgirwa Nnâmahanga.

2 Wêne ncîkubagîre: orhambonesagya nshonyi, abashombanyi bâni bakanacishinga.

3 Bulyâla omu bantu bacîkwikubagira ntâye enshonyi zibumba, bo zàbumba balya bavuna n’olucâli akanwa bàdesire.

4 Yâgirwa onanangule aha emirimbwa yâwe egera, onanyigîrize oku enjira zâwe zigenda.

5 Ongeze omu njira y’okuli kwâwe onanyigîrize, bulya wêne we Nyamuzinda we na mufungizi wâni.

6 Yâgirwa, kengêra obwonjo oyôrha ôbà; kengêra olukogo lwâwe lwa kurhenga mîra.

7 Yâgirwa, orhagerêrezagya ebyâha najiraga erhi ndi murhò, onkengêre erhi nie Yâgirwa, obwonjo bwâwe n’obwinjà bwâwe burhumire.

8 Nyakasane abà mwinjà abà na mwimâna co cinarhuma ahabûla abanya-byâha.

9 Abantu bîrhôhye omu njira y’obushinganyanya abageza, abacirhohya bo amanyîsa enjira yâge.

10 Enjira za Nyakasane zoshi bubà burhonyi n’oburhabêsha, oku bantu bashimba omulagi gwâge n’amarhegeko gâge.

11 Yâgirwa Nyakasane, izîno lyâwe lyoki lyarhuma wakûla ecâha câni, caluzire kuligo. 12 Ndi olyâla orhînya Nyakasane? Yêne àmubwîriza njira ehi acîshoga.

13 Akolaga ayôrha ali mugale, n’iburha lyâge lihâbwe ecihugo.

14 Nyakasane abamurhînya abajîsa mahwe, bo anayêreka ebi àli abalaganyize.

15 Nyakasane yêne nyôrha ndolakwo, bulya yêne ye kûla amagulu gâni omu kasirha.

16 Ndolakwo obwonjo bwâni bukugwârhe, Lolà oku ndi kahumba nnampanyagîre.

17 Nkûla ogu mutula emurhima, onantenzemwo ebi bihamba.

18 Lolà oku mpanyagîre, lolà oku mbabîre, nkûlira n’ebyâha byâni byoshi.

19 Langîra abashombanyi bâni: mpu baluga wâni! Alà n’enshombo bandwîrhekwo!

20 Olange iroho lyâni onandîkûze, enshonyi zakanambumba namânakuyâkiraho.

21 Okubà mwêru-kwêru n’okurhalyalyanya byo byananga, bulya we ncîkubagîre.

22 Nnâmahanga mâshi, okûle Israheli omu mbaka alimwo zoshi.