27
Oku muntu oli hôfi ha Nnâmahanga ntà côbà
1 Lwa Daudi.
Nyakasane ye kamole ye na kucira kwâni: ndi naciyôboha? Nyakasane ye lwâkiro lwâni: ndi wampiramwo ecikango?
2 Erhi enkola-maligo zaciyisha mpu zimmire mugumagumà, abo babisha banabè bo bahenanguka bajè oku idaho.
3 Ciru bakantulakwo entambala, ngwêrhe aha ncîkubagîre.
4 Kantu kaguma konene nsengîre Nnawîrhu, kanali k’aka: nti mbêre nâni omu bwâmi bwa Nyakasane ensiku zoshi z’obuzîne bwâni, lyo ncîshingira oburhonyi bwa Nyakasane, ndole n’oku ndâro yâge.
5 Bulyâla omu mwâge anfulika olusiku najakwo olubanja, yo ànfulika enyuma z’ecirhebo c’omu mwâge, anannengereze oku ibuye.
6 Nkolaga ndengerîre oku nyanya z’ababisha bandi eburhambi. Niono nkola nârherekêra omu mwâge enterekêro y’omwîshingo, nayimbira Nyakasane nnamuzihire.
7 Nyakasane yumva oku nayâkûza, mbêra nâni obwonjo, oyumve oku nakubwîra.
8 Wêne omurhima gwâni gulikwo, amasù gâni wêne galonza, nti obusù bwâwe nâni mbulolekwo, Muciza.
9 Orhabunfulikaga orhanayôzagya mwambali wâwe omu burhè bwâwe, wêne we burhabâle bwâni orhandikiriraga orhacidêkereraga, Nnâmahanga, Muciza wâni.
10 Ciru larha na nyâmà bakandekêrera, Nnâmahanga yêhe arhakandeka.
11 Ondangûle enjira zâwe, Yâgirwa, onampire omu njira edêkerîre, bulyâla abanshombire ho bali.
12 Orhankwêbaga omu nfune z’abashombanyi bâni, bulyâla abahamirizi b’obunywesi bakola bayimanzire, nie banayimangire barhanammirira marhî.
13 Ncîkêbirwe nti nâbà nciri omu igulu ly’abazîne, nambone oku Nyakasane kuhâna abâna.
14 Osengere Nyakasane onazibuhe, ohire omurhima omu nda, onacîkubagire Ye!