2 W’ono nyâkireho Nyamwagirwa: nti enshonyi zakanayîsh’immumba omu myâka n’emyâka. ondîkûzagye wêne omu bushinganyanya bwâwe.

3 Oyuname ontege okurhwiri onakanye ondîkûze. Ombêre ibuye nyâkireho, onshubire côgo cizibu lyo ndobôka.

4 Bulya wêne w’ibuye lyâni we na côgo nyakîremwo, n’izîno lyâwe lyo lyarhuma wangwârhira oku kuboko onandangûle enjira.

5 Lyo lyanarhuma wantenza omu kasirha bantezire, bulya wêne we lwâkiro lwâni.

6 Omu nfune zâwe mbîsire omûka gwâni, nêci wandîkûza, Nyakasane Nyamuzinda orharhebana.

7 Orhakwîrirwa abagashâniza enshusho z’obusha niehe Nyakasane ncîkubagîre.

8 Nkolaga nasâma ncîtakîre obwonjo bwâwe, bulya walolêrîze obuligo bwâni.

9 Orhanampizire omu nfune z’omubisha, ci amagulu gâni wagayimanza ahadekerîre.

10 Ombêre obwonjo Yâgirwa, kulagîrira kuno isù lyâni lyaganukîrwe erhi mutula gurhuma, omurhima gurhaciri gwâni, n’omubìri kwo na kwo.

11 Okulama kwâni kukola ntâkwo erhi mungo gurhuma, emyâka yâni nayo yahwêrîre omu mirenge. Emisî nagwêrhe omu burhè yahwêrîre, n’orhuvuha rhundimwo byacîbêrîre bivungunyukiza.

12 Abanzi bâni ntà cijâci barhampizirimwo, abàlungwe bâni banshekîre barhama, abanyishi boshi kufuduka badwîrhe bafuduka, n’abadwîrhe bambona embuga kuyâka badwîrhe banyâka.

13 Narhenzire abantu emurhima, nayibagîrwe ak’owafîre, nâbà nka nyungu mbêre.

14 Nayumvîrhe abantu bali mahwe kàli ntaho ebihamba birhali! bajà haguma banjira omu ihano, badôsanya kurhi bankulamw’omûka.

15 Yâgirwa niehe we ncîkubagîre, nêci nsêzize: we Nyamuzinda wâni.

16 Iragi lyâni aha nfune zâwe liri: nkûla muno nfune z’ababisha, nkûla mwa bano bandibuza.

17 Yerekeza mwambali wâwe obusù burhulwîre, ndîkûza na lulya lukogo lwâwe.

18 Yâgirwa mâshi orhazigaga enshonyi zambumba namânakuyakûza, zibumbe ababî bahabe oku bàdesire, bajanwe ekuzimu.

19 Mâshi orhunwa rhuderha obunywesi rhudume, rhuhumbârhale rhulya rhunwa rhunywerhera entagengwa buzira nshonyi.

20 Yâgirwa obwinjà bwâwe buluga mushâna! Burhaluga obwinjà obîkira abakukenga wâni! Burhaluga obwinjà oshobôza abakuyâkiraho n’abandi basinza wâni!

21 Abôla orhabarhaza oku bulanzi bwâwe, kulanga obalanga oku mihigo mibî y’abantu. Kufulika okaz’ibafulika omu burhwâli bwâwe, mpu ly’obacinga oku nnongwè z’ab’akalimi.

22 Nyakasane mushâna ayâgirwe, owayankaga olukogo lwâge lusômerîne alunyêreka omu cishagala ciyûbakire.

23 Omu ntemu yâni niehe naderha, nti: «Bankûzire omu masù gâwe». Ci wêhe wayumva izù ly’omusengero gwâni ene nkaz’ikuyâkûza.

24 Musîme Nyakasane mwe barhonyi bâge! Kulanga alanga abemêzi Abakola n’obucîbone bôhe kukolera abakolera.

25 Mwe mucicîkubagira Nyakasane mweshi, muzibuhe munashubize omurhima omu nda.