Orhahîraga okalubira banyankola-maligo, orhahîraga okayâgalwa n’abajira amabî.

2 Bulya kula ebyâsi bihorhama kwo nabo bahorhama kula akâsi kayuma kwo nabo bânabè.

3 Wêhe okaz’icîkubagira Nyakasane onakaz’ijira aminjà, lyo odêkerera hano igulu onayumve omurhûla

4 Obè wacîzigiriza muli Nyakasane, wabona oku akushobôza engalo omurhima gwâwe gusengîre.

5 Olangîse Nyakasane enjira zâwe, onacîkubagireye, wâbona ebi akola.

6 Wâbona oku alengeza obushinganyanya bwâwe nka kamole, n’okuyâza oyâzize akulengeze nka lya kalengerêre.

7 Orhûlûle muli Nyakasane onacîkubagireye kwône orhahîraga okalubira omuntu oli omu njira yâge yâge buzira kubà kurhi, omuntu ovunyengerera ebirhali byo.

8 Lekà okukunira, ocîke oburhè bukugwêrhe; orharûkûzagya: bulya buzinda byankanabîha.

9 Bulyâla enkola-maligo kuhera zâhere abacîkubagira Nnâmahanga bôhe bo bayish’irya igulu.

10 Omubî hano kasanzi erhi arhacihali, n’erhi wakalola aha anali, orhâmubone.

11 Abatûdu bo balya igulu balirya banayumve omurhûla munji-munji.

12 Omubî arhalongeza omwinjà kalamo, arhanamumirira marhî

13 Nyakasane kwo kugwîra amasheka, bulyâla amanyire oku olusiku lw’oyo luyishire. 14 Banyankola-maligo aha babîhira banakaz’iyômola engôrho, bafôle n’omuherho, mpu lyo bahira omukenyi muhanya okw’idaho, bananige abantu bashimbire enjira nyinjà.

15 Bône: engôrho yâbo yo yanabarhungûla emirhima, n’amatumu gâbo oku madwî gabavunikira.

16 Ebinyi omushinganyanya afumbasire, byo bikulu oku binji binji by’encuku;

17 bulyâla amaboko g’encuku kuvunwa gâvunwe, abashinganyanya bôhe Nyakasane bayegemîre.

18 Nnâmahanga kushîbirira ashîbirira omûka gw’abantu nkana, omwîmo gwâbo kalamo k’ensiku n’amango.

19 Omu buhanya barhâyumve nshonyi, n’omu cizombo barhâbule bushalûka.

20 Endyâlya zôhe kuhera zâhere abashombanyi ba Nnâmahanga nabo kwo bâhungumuke ak’enshungulûlù y’ebulambo, kwo bâhirigirhe nka kula omugî guhirigirha.

21 Encuku ehoza ci erhagalula, omushinganyanya yêhe arhahimwa lukogo arhanahimwa kuhâna.

22 Bulya yêhe abà ahâ obwangà, bo balya igulu, n’abà ahehêrera kukubunguka bakubunguka.

23 Nyakasane ye zibuhya ilabarha ly’omuntu, ye rhonya n’igenda lyâge. 24 Na ciru akahirima arhabêra oku idaho bulya Nyakasane amugwêrhe okuboko.

25 Nali murhò, nie oyu nkola mushosi, ntasâg’ibona balekêrîre entagengwa, ntasâg’ibona iburha lyâbo lyafâ cizômbo.

26 Ngasi mango lukogo ebà na kuhoza ehoza, n’iburha lyâbo kugishwa lyâgishwe.

27 Oleke okubî ojire okwinja, ly’oyôrha ohali ensiku n’amango.

28 Bulyâla Nyakasane ye ayôrha arhonya obushinganyanya, arhakanalekêrera abacêse bâge.

29 Abashinganyanya bo balya igulu, bo banalibêrakwo ensiku n’amango.

30 Akanwa k’omushinganyanya kurhimanya karhimanya, n’olulimi lwâge lurhaderha ebirhashinganini.

31 Irhegeko lya Nyakasane lirhamurhenga emurhima, n’igenda lyâge lirhadandabagana.

32 Encuku yôhe ebulâbi ekaz’ijà omushinganyanya na kuyîrha ekaz’ilonza mpu emuyîrhe.

33 Cikwône Nyakasane arhâmulekêrere omu nfune zâyo, arhamutumuze olusiku lw’okutwa emmanja.

34 Okaz’icîkubagira Nyakasane onakaz’ishimba enjira zâge, akuyôlolola olye igulu, osheke obona oku enkola-maligo zahungumuka.

35 Nkola mbwîne endyâlya eminyire, yagandâza nka nduluma ya mpehema.

36 Erhi nshub’igera erhi erhacihali, nti nnonza, lêrhaga!

37 Orhang’ilola omuntu mwinjà, olâbe entagengwa, mulume nkana osiga enfula.

38 Enkola-maligo bushugunu zâgende endyâlya nshuzo zânafe.

39 Abashinganyanya Nyakasane balolerakwo obucire bwâbo, yêne ye lwâkiro lwâbo omu mango g’embaka.

40 Nyakasane kurhabâla akaz’irhabâla abashinganyanya, kulikûza akaz’ibalîkûza oku babisha n’okubacinga kulibo, bulya bamuyâkireho.