2 Mushâna nali nnangâlîre, nnalinnangalîre Nyakasane, naye olya okasinga ayunama, ayumvîrhiza omulenge gwâni.

3 Ankûla omu kuzimu, anshâyûla, ayimanza amagulu gâni oku ibuye, azibuhya ilabarha lyâni.

4 Anampira olwimbo luhyâhya ekanwa: lwimbo lwa kuyimbira Nyamuzinda wîrhu. Banji bâbona bayôbôhe, banacîkubagire Nyakasane nabo.

5 Ali w’iragi omuntu ocîkubagira Nyakasane, omuntu orhayêrekera emunda abagashâniza ebiremwa bali, n’emunda abanywesi bali.

6 Ebi wajizire, Yâgirwa Nyamuzinda wîrhu, guli mwandu: ebisômerîne n’ebi olonza okurhujirira nagwo mwandu, mushâna orhajîbwa omu irhwe.

Erhi nankalonza okubiderha n’okubirhondêreza, buli bujangija, nanga birhankaganjwa.

7 Orhalonzagya nterekêro orhanalonzagya ntûlo, ci kwône wanfukûla amarhwîri. Orhahûnaga nterekwa orhanahûnaga nterekêro oku byâha:

8 Go mango nadesire, nti niono nyishire. Nie bayandikire omu citabu cibunge.

9 «Mpu njire obulonza bwâwe, Nyamuzinda wâni, n’irhegeko lyâwe oku murhima limba.»

10 Obushinganyanya bwâwe nabumanyîsa aha balume akanwa kâni ntakashubakwo nâwe wêne orhahabiri Muciza.

11 Obushinganyanya bwâwe ntabufulikaga emurhima gwâni, oburhabêsha bwâwe n’oburhabâle bwâwe nabuganîrira abandi, nacîtakirira n’oburhabêsha bwâwe omu ngabo y’abantu.

12 We mbwîzire, Yâgirwa, omanye wantaza oku lukogo lwâwe, oburhonyi n’oburhabêsha bwâwe bukaz’iyôrha bunnanga.

13 Bulyâla ngosirwe n’ebibî: kuganja kutuka; obubî bwâni bwanzonzire: ciru ntacibona. obwo bubî bwo bunji kulusha emviri zindi okw’irhwe, n’omurhima gurhaciri gwâni.

14 Yâgirwa, orhahakanaga, ondîkûze; Yâgirwa, okanye ontabâle! 15 Lêro enshonyi zibagwarhe babulabule balya boshi banninga mpu bankûlemw’omûka. Bayêgûke enshonyi zibabumbe, balya bacîshingira okuhanyagala kwâni.

16 Zibabumbe basômerwe balya bakaz’iderha mpu tumirha tumirha!

17 Bôhe balya bakulonza, bacîshinge banasîme muli we; na balya bakulingakwo oburhabâle, bakaz’iyôrha baderha mpu Nyakasane aganze!

18 Niehe ndi mukenyi nnandi muhanya! Câba Nyakasane arhahimwa kunshîbirira. Nyamuzinda wâni, obiduhe mâshi!