2 Nnâmahanga, rhwacîyumvîrhîre n’amarhwîri gîrhu, ba larha bàrhubwîzire ebi wakozire amango gâbo, omu nsiku zàli burhanzi.

3 Wêne erhi ôbà wamâhulusa amashanja n’okuboko kwâwe, wabayanka bôhe wàbagwika butûdu; walasa amashanja wabashagalusa bôhe.

4 N’eci cihugo arhali muherho gwâbo gwabahîreco, arhanalî kuboko kwâbo kwabacizize, ci kuboko kwâwe, kulyo kwâwe n’okuca kw’obusù bwâwe, bulyâla orhàhimagwa kubarhonya.

5 We Mwâmi nshiga, we Nyamuzinda wâni, we wahimiraga Yakôbo.

6 Buhashe bwâwe rhwakwamagamwo abashombanyi bîrhu, buzibu bwâwe rhwahinagagamwo abàli barhurhêzire.

7 Arhali muherho gwâni nàli ncîkubagîre arhanali ngôrho yâni yangalukire.

8 Ci wêne warhulîkûzize oku babisha, wanabulabuza balya bâli barhushombire.

9 Nnâmahanga rhwakazâg’icîtakîrira mûshi na budufu, n’izîno lyâwe rhurhàhwaga rhurhàlikuza.

10 Alà lêro buno! warhulekêrîre wanarhubonesa nshonyi, ciru orhaciderha mpu warhabâla mwen’emirhwe y’abalwî bîrhu.

11 We warhumire rhwayâka ababisha, kwarhuma abashombanyi barhushokôla barhama.

12 Kwo warhuhânyire nka bibuzi byaj’ibâgwa, wanarhushandâza omu karhî k’amashanja.

13 Kuguza waguzize olubaga lwâwe, waluguza obusha, ciru ntà bunguke wakûzire mw’obwo burhunzi.

14 We warhumire rhwajâcirwa n’abâlûngwe bîrhu, abayûbaka haguma nîrhu barhushekera nk’aha bwacêraga.

15 Warhujizire lwimbo omu karhî k’amashanja, ebindi bihugo byarhugayire byàrhalusa.

16 Obubî bwâni burhacidwîrhi bwantenga emalanga, n’obusù bwâni enshonyi zabubumbire.

17 Ezo nshonyi zidwirhwe n’olya wakaz’injâcira n’okungayîsa, ye dwîrhe okwo omushombanyi, omubisha.

18 Ebyôla byoshi birhurhogîrekwo n’obwo rhurhakuyibagiraga, rhurhavunaga eciragâne câwe.

19 N’obwo omurhima gwîrhu gurhashubiraga enyuma n’amagulu gîrhu garhalekaga enjira yâwe.

20 Wanabul’irhutuntumira omu bulumba ba banyambwe, n’okurhubululirakwo omwizimya.

21 Rhuciyibagiraga izîno lyâwe Nyamuzinda wîrhu, rhukanayinamulira amaboko emunda nyamuzinda w’abandi ali;

22 ka kuhaba Nyamuzinda ankahabire ye yishi ebifulike omu murhima?

23 Ci rhwono badwîrhage banigûza erhi we rhuma, rhwono badwîrhe bagereka nka ezaj’ibàgwa.

24 Zûka, Nyakasane, cirhumire wahunga? Ozûke, omanye wankanarhukabulira ensiku n’amango!

25 Cankarhuma wafulika obusù bwâwe, onayibagira obulagîrire n’amalibuko gîrhu?

26 Omurhima gwîrhu bagugombize baguhira okw’idaho, enda yîrhu nayo okw’idaho eri.

27 Oyimuke orhurhabâle, n’olukogo lwâwe lurhume warhulîkûza.