Nyakasane Nnâmahanga adesire akanwa analâlika igulu lyoshi, kurhenga ebushoshôkero bw’izûba kuhika ebuzikiro bwalyo.

2 Nyamuzinda abalagazize kurhenga e Siyoni, ntondo yâge nyinjinjà.

3 Nyamuzinda wîrhu oyôla oyishire: arhâbule buderha akanwa. Ntakanjirwa w’omuliro amushokolîre, ayisha ayôkera, n’empûsi emugosire yayisha yakola akal’ibala.

4 Amâlâlika amalunga amâlâlika n’idaho, bulyâla akola atwîr’olubaga lwâge olubanja.

5 Mpu: «mpamagaliri abemêzi bâni, mpamagaliri balya bànywânaga nâni bulya barherekêra.»

6 Amalunga gamanyîsa oku olubanja bwinjà lutûbirwe: bulyâla Nyamuzinda yêne olutwire.

7 Mpu: «lubaga lwâni yumva nkubwîre, mpu: Israheli nkola nakushobeka: niene nie Nyamubâho, nie Nyamuzinda wâwe.

8 Arhali nterekêro zâwe zo otumwîrekwo, bulyâla embâgwa zâwe zirhantenga omu masù.

9 Ntâzigè akanina k’omu mwâwe, ntâyêmêre n’enganda-buzi z’omu busô bwâwe.

10 Ensimba z’omu muzirhu zoshi zâni, n’ebintu biyâbukira omu malambo gâni birhankaganjwa.

11 Ntà kanyunyi kabalala mpabire, na ngasi hitondegera omu ishwa hyoshi mpimanyire.

12 Nka kwàli kushalika ntankakubwîzire bulyâla amahanga goshi gâni na ngasi bimuli byoshi byâni.

13 Ka nkulîra binyama bya mpanzi, nîsi erhi kwo bàkubwizire mpu nywa mwamba gwa bihebe?

14 Okaz’ibâgira Nnâmahanga enterekêro y’okumukuza, onakaz’ijuha Nnâmahanga endagâno omulaganya.

15 N’olusiku wânabe ogwêrhwe n’omutula onanyâkûze, wâbona oku nakulîkûza onankenge.»

16 Enkola-maligo nayo kwo Nyamuzinda ayibwîzire, erhi: «cirhuma obwîra abandi amarhegeko gâni, cirhuma ebinwa by’endagâno yâni birhakurhenga ekanwa,

17 we muntu wakengulaga ihano lyâni, wanajugucira ebinwa byâni kulî nâwe?

18 Erhi wabonaga ecishambo onakanye ociluse, erhi wabonaga abantu b’ebishungu erhi wamâbona abinyu.

19 Akanwa kâwe wakaz’ikalîkira oku bibî, n’olulimi lwâwe lurhàhimagwa kulyâlyanya.

20 Erhi wajàga oku rukiko erhi na mwene winyu ohêrhekwo, erhi na mwâna nyoko aburha oli bonêsa nshonyi.

21 K’obè wajijire ntyo nnampulike? Ka kwo omanyire mpu ndi akâwe? Nakuyagiriza njalabulire byoshi omu masù gâwe.

22 Rhangi muyumve kuno, mwe mukaz’iyibagira Nyamuzinda, rhangi muyumve kuno bakanajira abà nâgwârha babule câgalukira.

23 Ye nsîmîsa omuntu obâga enterekêro y’okunkuza, n’omuntu oshimba enjira nnungêdu ye nayêreka oku Nyamuzinda kuciza aciza.»