2 Nyamuzinda mâshi, rhega okurhwiri oyumve omusengero gwâni, orhanagayaga izù ly’okuyinginga kwâni,

3 ci onyumve onayumvîrhize. Omutula gwanjegezize, nanayumvîrhe bangurumana:

4 izù ly’omubisha lirhumire, lwôho lw’omuntu mubî lurhumire. Kulya kubà badwîrhe bambarhuza amabî, banadwîrhe bansongera n’omutula gwoshi.

5 Omurhima gundi omu nda bagulyagusize, n’ebihamba by’olufù byamponirekwo.

6 Obwôba n’omusisi byantanzir’ekà, najugumire narhalusa.

7 Ndigi, nti: «Owampà amashala nka ngûkù, nanabalala nj’icirhamûkira ».

8 Nanayâkira kulî, nj’ibêra omu mpinga.

9 Nanayirukira nalonza aha nacibundika, aha nayâkira empûsi n’omulaba.

10 Orhang’ibashandabanya mâshi Nyamwagirwa, orhang’iberûla endimi zâbo: mbwîne obu oku entambala n’ennongwè byarhurhanzir’ekà.

11 Mûshi na budufu erhi kukeya byakeya oku lugo, obuhanya nabwo haguma n’amalibuko, byagwîsiremwo ecirâlo omu karhî k’olugo;

12 nayo emirhego yagwisirwe omu karhî kâlwo, murhâkala buhagwe murhâkala na bulyâlya.

13 Acibâga mwanzi wanjâciraga, nankanahulisire kwône, Acibâga muntu onshomba wanyishagakwo, nankanayâsire nj’icîfulikaye.

14 Ci wêhe wâni: Kàli rhwembi rhwàkulaga, rhwayinjibana rhwanakômerana wâni!

15 Omuntu nabonaga rhwanunirwa n’ecinyabuguma, rhwacûka kuguma omu ka-Nyamuzinda omu kafurhè k’olukulu wâni!

16 Baborhogerwa na wa-lufù wâni, babocôcôber’ekuzimu banazîne, obûla bahandisize obulyâlya omu mwa bâbwè, babutamaza omu karhî kâbo!

17 Niehe Nnâmahanga ye nayâkûza, Nyakasane ye wandîkûza

18 Sêzi, ebijingo n’omûshi, nkaz’ilaka nnandakûle, ayumve omulenge gwâni.

19 Omûka gwâni ye waguyôkola aguhebe omu murhûla, agulîkûze oku babisha bulya abanshombire bali banji.

20 Nnâmahanga ayumva kurhenga ensiku n’amango. kàli bôhe obu barhagokôla. 21 Bôhe banakaz’irìkira oyu babà boshi okuboko, ngasi muguma muli bo kushube kuciyandûlira ecihango.

22 Obusù bwâge bunabè bulushire amakafè kuyengûla, erhi n’omurhima gwâge bya ntambala gulimwo. Ebimwa byâge binabè bilushire amavurha bulembu, erhi zinali ngôrho bugôrho.

23 Emmanja zâwe ozihengulire Nyakasane, wâbona oku akurhamûla: ntà mango akaleka omushinganyanya alwâla enzungulira.

24 Nnâmahanga obabulindike omu nyenga y’olufù; ebishumûsi n’endyâlya birhahikè ciru omu karhî k’ensiku zâbyo, ci niehe we ncîkubagîre.