57
Okucîkubagira Nyakasane omu karhî k’ababisha
1 Gwârhi omukulu w’abimbiza. N’izù lisungunu. Ya Daudi. Kwo eyimbwa aka «Shukira orhashâbe». Ayizihaga amango àyâkiraga Saulu omu lwâla.
2 Ombè lukogo, mâshi Nyamuzinda, ombè nâni lukogo, bulya w’ono omurhima gwâni guyâkîreho. omu cihôho c’ebyûbi byâwe munôla nyâkîre, nti obu buhanya burhang’ihuba.
3 Ye nyâkûzize Nnâmahanga ôbà enyanya bwenêne, Ye nyâkûzize Nyamuzinda oyôrha onkûla omu kubî,
4 nti arhumize kurheng’empingu, andîkûze, n’aba banshimbulwîre arhag’ibabonêsa nshonyi. Nyamuzinda arhume enshôkano zâge n’oburhabêsha bwâge mâshi!
5 Omu karhî k’entale muno ntamîre omu karhî ka zirya zishanshanyula abahanya, Amîno gâzo nderhage obwoji bw’itumu n’obw’empiru! olulimi lwâzo ngôrho nnûbule.
6 Nyamuzinda mâshi, orhang’ibà nka wacîyerekanira oku nyanya z’amalunga irenge lyâwe balibone omw’igulu lyoshi.
7 Bayansire bàntega omulabarha: omûka gwâni baguhorhaza; bampumbira enyenga balya bakayigwamwo.
8 Càba omurhima gwâni guli muzibu, Nyamwagirwa, omurhima gwâni gurhahombagana; nkola nakuyimbira nnankuzihire.
9 Tulûka murhima gwâni; tulûka lulanga lwâni, tulûka nzenze yâni, nkola natula obuce buzûke.
10 Nakukuza omu karhî k’amashanja, Nyamwagirwa, nakuzihira olulanga omu karhî k’ab’ekulî.
11 Bulyâla olukogo lwâwe lunji lunji luhisire emalunga oburhabêsha bwâwe nabo buhisire oku nkuba.
12 Nyamuzinda mâshi, orhang’ibà nka wacîyerekanira oku nyanya z’amalunga irenge lyâwe balibone omu igulu lyoshi.