2 Nnâmahanga nciza mâshi, niono amîshi gahika omw’igosi.

3 Nashâyire omu cijondo c’emuhengere lêrhaga aha nankadêkereza okugulu. Yo muhêngere eno mushâna! Amîshi gangezire aha ntondo y’irhwe.

4 Nayamire narhama, omumiro gwoshi gwahehîre.

5 Abanshombera busha, bo banji aha mvîri zindi okw’irhwe Abanshimbire obumâma, bo bazibu aha kavuha kandi omu kuboko: mpu ngalulage, ka ngalulage ebi ntazimbaga?

6 Obuhwinja bwâni obuyishi, Yâgirwa Nnâmahanga, n’obubî bwâni orhabuhabiri.

7 Mâshi Nyakasane, murhambo w’engabo, abakulangâlira orhazigaga enshonyi zababumba erhi nie ntuma. Abakulonza, Nyamuzinda w’Israheli, orhazigaga nababonêsa nshonyi.

8 Ebijâci nabirembera we rhuma, enshonyi zànyûbika là!

9 Nahugalala omu mwîrhu, nashuba w’ekulî omu bâna nyâmà aburha.

10 Nayumva obushiru bw’enyumpa yâwe bwandyagâsà, n’ebijâci bakujacira byanduma.

11 Nti nâshalisa omurhima gwâni, nafuduka kukola kushekerwa nashekerwa.

12 Nacîbwîka sunzu nti gubè gwo mwambalo kwashuba kukwâmwa nâkwamwa.

13 Ogwâni gwayimbwa aha ngombe, ogwâni gwaderhwa aha ganyôbwa.

14 Niehe we nsengîre Nyakasane oku ncirhona erhi kusengera nnansengera. Oyumve guno musengero gwâni, we Mwinjà-orhajîbwa omw’irhwe, ontabâle nâni we jir’oburhabâle bw’enkwîra.

15 Onshâyûle nankazika, ondîkûze kuli abâla banshombire, onanzikûle mw’ogu muhengere.

16 Nankanahêkwa n’olwîshi, erhi nyûbire burhayûlubuka, nîsi erhi nzike omu nyanja.

17 Yumva guno mulenge gwâni Yâgirwa, bulyâla oyu orhonyize, lukogo omubêra. Ndolakwo we Nn’olukogo lwoshi.

18 Orhanafulikaga mwambali wâwe obusù bwâwe, bulyâla Waliha mâshi, amagala gandire: obiduhe oyumvîrhize.

19 Ondirâne oncize, onandîkûze oku babisha.

20 Orhahabiri ebijâci banjâcira, orhahabiri n’omutula n’enshonyi zingwêrhe, bulyâla abadwîrhe banjâcira boshi omu masù gâwe bali.

21 Ebijâci n’akagayo kâbo byanvunzize omurhima, enjingo zirhaciri zâni; nalinzirage ôwakambà lukogo namubula, nalola nti nabona owakantûliriza, namubula.

22 Ebiryo byâni babiyansire babulagiramwo endulwè, nti nahûna amîshi bampà enkalishi.

23 Amêza balîrakwo gahinduke murhego mâshi? Gubagwâse gugwâse n’abîra bâbo?

24 Badundaguze mâshi, barhacifaga babwîne n’agâbo masù, balwâle akambadwe, bakaz’igenda bakûnagira.

25 Obarhulirekwo omutula, batwîke birhûbano erhi bwôba bwa kulahirwa nâwe burhuma.

26 Aha mwabâbwè hanyagwe, n’enyumpa zâbo zije ecigôhwa aha lusò.

27 Obwôla bashimbulwîre omuntu wêne wahanaga banarheneka omuntu wêne wabandaga.

28 Obubî bwâbo bujekw’obundi mâshi! n’irhondo barhafàga bâyagîze aha ngombe yâwe.

29 Bashandûlwe omu citabu c’abazîne, n’irhondo barhafàga bâyandikîrwe omu bashinganyanya.

30 Niehe omu buhanya muno ncîbêrîre n’omu mulenge, oburhabâle bwâwe buncinge, Yâgirwa.

31 Hano nkola nâcîtakîra izîno lyâwe Nnâmahanga, kuyimba nayimba: nnanderhe ebivugo by’okuvuga omunkwa.

32 Kwo kusîmîsa Nnâmahanga okwo, kulusha empanzi etwîre bwinjà erya y’obukoro n’eyâkunda.

33 Mwe banyinyi mukanye mubone, mwasîma munayumve oku omurhima gwinyu gwashagaluka, mwe mulonza Nnâmahanga.

34 Bulya Nnâmahanga arhahimwa kuyumva abakenyi n’abashwêke bâge arhababôla.

35 Amalunga n’igulu bicîzigirize, enyanja nazo, haguma n’eby’omu nyanja, bicîshinge.

36 Bulya Nnâmahanga yêne ye Mufungizi omu Siyoni, ye wânayûbakira bene Yûda, bajè omu nyûbake banaziyôrhane.

37 Obûko bwa bambali bâge bwo bywâyime mw’ebyo, n’abazigira izîno lyâge bo babiyôrhana