Aleluya!

1 Muvuge Nyakasane omunkwa bulya ali mwinjà, bulya obwonjo bwâge buli bw’ensiku n’amango.

2 Ab’omu Israheli bakuderhe, mpu: «Obwonjo bwâge buli bw’ensiku n’amango.»

3 Ab’omu mwa Aroni bakuderhe, mpu: «Obwonjo bwâge buli bw’ensiku n’amango.»

4 Abarhînya Nyakasane bakuderhe, mpu: «Obwonjo bwâge buli bw’ensiku n’amango.»

5 Erhi omutula gungwêrhe nayâkûza Nyakasane, arhega izù lyâni okurhwiri anandîkûza.

6 Nêci Nyakasane ali haguma nâni: ntà bwôba bungwêrhe; kurhi abantu banjira?

7 Nyakasane ali haguma nâni: ye burhabâle bwâni, abanshomba nâbona oku enshonyi zâbabumba.

8 Aha wankacîkubagira abantu wakayâkira hali Nyakasane.

9 Aha wakacîkubagira abagale, wakayâkira hali Nyakasane.

10 Amashanja goshi nabona gangorha, oku izîno lya Nyakasane nagagezamwo engôrho.

11 Gànyisha ekulyo n’ekulembe, oku izîno lya Nyakasane nagahinaga.

12 Ganyishakwo nka njuci, gayâkiriza nka ngulumira omu mishûgi: oku izîno lya Nyakasane nagalabarhanya.

13 Gàntunika, gàntunika nalonzihirima, ci Nyakasane àngalukira.

14 Nyakasane ye busêre na buzibu bwâni, ye wambêrîre Mugaruka.

15 Izù ly’okucîshingira okulobôka, liyumvîkane omu bihando by’abashinganyanya, mpu: «Okulyo kwa Nyakasane kwakozire akirumè.»

16 Kulyo kwa Nyakasane kwanzûsize, mpu: «Okulyo kwa Nyakasane kirumè kwakozire.»

17 Ntâcife, kulama nkola nalama, nkaziyimba emikolo ya Nyakasane.

18 Buhane Nyakasane àbâga nk’ampà, ci kurhàli kundîkira walufù.

19 Mumpamûlire olumvi lw’obushinganyanya, mpikemwo mvuge Nyakasane omunkwa.

20 Muhango gwa Nyakasane ogu, bashinganyanya bagugeramwo.

21 Nakuvuga omunkwa kulya kubà wanyumvîrhîze, wanambêrîre Mugaruka.

22 Ibuye abûbasi bagayaguzagya, lyàyishiriba kaboko ka nyumpa.

23 Okwôla Nyakasane wakujiraga, kurhangâzize amasù gîrhu.

24 Lulya lusiku Nyakasane àjirag’olu, rhucîshinge rhunasîme muli lwo.

25 Yâgirwa mâshi, orhucize, Yâgirwa mâshi orhulwîrekwo.

26 Ayâgirwe Oyishire okw’izîno lya Nyakasane, rhukugishîre omu nyumpa ya Nyakasane.

27 Mushâna Nyamwagirwa yêne Nyakasane, rhwabwîne arhumolekera. Mucîgwâse haguma, munafumbarhe amashami gagazire oku byâsi; mujè mwahinda muhike ah’irhwêrhwê ly’oluhêro.

28 Ôbà Nyamuzinda wâni, nkuvuzire omunkwa, Nyamuzinda wâni nkukuzize.

29 Muvuge Nyakasane omunkwa bulyâla ali mwinjà, bulyâla obwonjo bwâge buli bw’ensiku n’amango.