Mukuze izîno lya Nyakasane, kuzi ye mwe bambali ba Nyakasane.

2 Mwe muli omu ka-Nyamuzinda, omu bululi bw’enyumpa ya Nnawîrhu Nnâmahanga.

3 Mukuze Nyakasane bulya arhahimwa bwinjà Nyakasane, muzihire izîno lyâge bulya ali wa kusîmwa.

4 Na bulyâla Nyakasane àcîshozire Yakôbo, Israheli gwo gwâge mwanya acîshozire.

5 Niehe mmanyire oku Nyamubâho ali mukulu, Nnawîrhu Nnâmahanga alushire banyamuzinda boshi.

6 Ebi alonzize byoshi binabè, en’igulu n’emalunga, omu nyanja n’omu ngasi muhengere.

7 Ye rhenza ebitù kurhenga enyuma z’ebihugo, ahindule emilazô eshube nkuba, n’empûsi ayishâze aha yali ecifulisire.

8 Ajà aho, abanda enfula z’e Mîsiri, ez’abantu n’ez’ebintu.

9 Arhuma ebisômerîne n’ebimanyîso emund’oli bulya wa Mîsiri, abirhumira Faraoni mwâmi w’e Mîsiri n’abambali boshi.

10 Abanda amashanja garhali manyi, ahungumula abâmi b’entwâli:

11 Sihoni mwâmi w’Abamoriti, na Ogu mwâmi w’e Bashani, n’amâmi goshi g’e Kanâni.

12 Amashwa gâbo agagabira Israheli, olubaga lwâge Israheli lwagayimamwo.

13 Mushâna Nyakasane izîno lyâwe ho liyôrha libà ensiku n’amango, mushâna Nyakasane oyôrhe okengwa emyâka n’emyâka.

14 Bulyâla Nyakasane ye lungere w’olubaga lwâge, yêne ye nalufa lukogo.

15 Abapagani nabo mpu bajira ba nyamuzinda, bala b’amabuye n’ebyûma! bala babinjwa n’enfune z’abantu!

16 Irumbi mpu bagwêrhe akanwa barhanaderha, mpu bagwêrhe amasù barhanabona!

17 Mpu bagwêrhe amarhwîri barhanayumva, ciru lêrhaga ehyûka omu kanwa kâbo!

18 Ababatula bamôbashusha, abacîkubagira bo nabo.

19 Nyumpa y’Israheli, kuza Nyakasane, bûko bwa Aroni, kuza Nyamubâho,

20 Nyumpa ya Levi, nâwe kuza Nyakasane mwe muharâmya Nyamubâho mweshi, mukuze Nyakasane.

21 Nyakasane aj’irenge omu Siyoni, ye yûbaka omu Yeruzalemu!