2 Yâgirwa mâshi, ondîkûze nâni oku muntu mubî, ncinga oku muntu w’ecikalarhu.

3 Oncinge kuli balya bagerêreza okubî omu murhima, abakazitula entambala bwaca bwayira.

4 Endimi zâbo banakaz’izirhyaza nka njoka, omu kanwa kâbo mîno ga mpiri gamuli.

5 Nciza mâshi, Yâgirwa, nkûla omu nfune z’omubisha, ncinga oku muntu w’ecikalarhu: abalâlire mpu bankube,

6 Abaminya bakazintega emirhego banayifulike, banakanûle emigozi nka kasirha.

7 We mbwîzire, Yâgirwa: we Nyamuzinda wâni, mâshi, Waliha, oyumvîrhize izù ly’omusengero gwâni.

8 Yâgirwa Nyamuzinda wâni, we burhabâle we na misî yâni, we cingikiza irhwe lyâni olusiku lw’entambala.

9 Yâgirwa mâshi, orhayêmêraga enyifinjo z’omubî, mâshi mâshi orhazigaga emihigo yâge yayunjula.

10 Abandi eburhambi balengezize irhwe, mâshi mâshi obubî bw’ebinwa byâbo burhankarhang’ibafundêza mâshi.

11 Enkuba y’ebisêsè ebarhogere, abo bakakûmba elushâyo babule cazûsa.

12 Omuntu w’olulimi lubî arhâshinge kasanzi hano igulu, omuntu w’ecikalarhu buhanya bwamushamula.

13 Mmanyire, Yâgirwa, oku orhalenganya oli bûmu-bûmu, naye omukenyi orhamuzimba lubanja.

14 Nêci abashinganyanya bo bakaz’ikuza izîno lyâwe abarhalyâlyanya bo babêra omu masù gâwe.