1 Aleluya!

Kuzagi Nyamuzinda buly’ali mwinjà, Yimbiri Nyamuzinda wîrhu bulya irenge alikwânîne.

2 Nyamwagirwa, mûbasi wa Yeruzalemu, ashûbûza olubaga lw’Israheli.

3 Anabuke abagogomîrwe omu murhima, anabuke ebibande byâbo.

4 Ayishi omuganjo gw’enyenyêzi, ntâyo ahabire izîno lyâyo.

5 Nyamuzinda wîrhu ali mukulu, obuhashe bwâge burhagerwa, obukengêre bwâge burhahimwa.

6 Nyamuzinda ye rhabâla abazamba, abanya-byâha anatuntumire okw’idaho.

7 Yimbiri Nyamuzinda olwimbo lw’okuvuga omunkwa, zihi omu lulanga obukuze bwa Nyamuzinda.

8 Amalunga anagabwîkire n’ebitù, arheganyize idaho enkuba, ameze obwâsi oku ntondo

9 Ye hà enkafu obwâsi zikera, n’ebyâna bya hungwe bimuyêrekezize omulomo.

10 Arhali misî ya citerusi emushagalusa, nîsi erhi magulu ga muntu.

11 Nnâmahanga ashagaluka erhi abamurhînya barhumire erhi abacìkuhagira obwinjà bwâge bàrhuma.

12 Yeruzalemu, gashâniza Nnâmahanga, Siyoni, kuza Nyamubâho.

13 Bulya ahamikirîze enyumvi zâwe, abâna bâwe abagishìre aha mwâwe.

14 Amaziko gâwe agalanzire, akugaza n’emburho y’emyâka yâwe.

15 Akanwa kâge kanazunguluk’igulu lyoshi akanwa kâge kwo kalibirha nka mpûsi.

16 Ananiese olubula lwêru nka bôya bwa cibuzi, alumîze ecimè c’emboho nka luvù.

17 Kwo aniesa enkuba nk’ahungumula mugati, emboho yâge enakayûze ciru n’amîshi ganage.

18 Akarhuma akanwa binajonge, akarhuma empûsi yâge amîshi ganashubihulula.

19 Yêne wamanyîsa Yakôbo akanwa kâge, n’Israheli amumanyîsa amarhegeko gâge.

20 Ntà lindi ishanja Nnâmahanga ajirîre okungan’aho, ntà lindi ishanja lyamanyire ecimubà emurhima.