5
Ecitabu cizirike
1 Okuhandi, omu kulyo kw’olya otamîre oku ntebe, nanacibona ecitabu ciyandike omu ndalâlà n’emugongo; erhi ciri cizirike na biziriko nda. 2 Nabona malahika muzibu adwîrhe ayâkûza n’izù linene, erhi: «Ndi okwânîne okubungûla ecitabu, anashanûle ebiziriko bicizirisire?» 3 Oli emalunga, oli en’igulu, oli omu kuzimu, ntâye wankahash’ibungûla eco citabu, nîsi erhi okucilolakwo. 4 Nâni nanacilaka omulenge obwo, kulya kubà ntâye babwîne okwânîne okubungûla eco citabu n’okucilolakwo. 5 Okubundi muguma muli balya Bagula anacimbwîra, erhi: «Orhalake: alà oku Entale y’omu mulala gwa Yûda, Mwene-Daudi, yahimire; ye wabungûla ecitabu, n’orhuhamikizo rhwâco oku rhunali nda arhuhamûle».
6 Okuhandi, aha karhî k’entebe n’aka zirya Nsimba ini na balya Bagula, nanacibona Omwâna-buzi ayîmanzire, ali nka munige. Ali agwêrhe mahembe nda*5, 6 Amahembe nda gali cimanyîso c’obuhashe bwa Kristu; n’amasù nda gayêrekana obumanye bwâge burhajira lugero. na masù nda; yo erya Myûka nda ya Nyamuzinda akarhuma omu igulu lyoshi. 7 Anaciyisha, ayanka ecitabu càli omu kuboko kulyo kw’olya otamîre oku ntebe. 8 Erhi abà amâyanka ecitabu, zirya Nsimba ini na balya Bagula makumi abiri na bâni bacîkwêba oku idaho embere z’Omwâna-buzi, erhi bafumbasire ngasi muguma olulanga n’orhubêhè rhw’amasholo rhuyunjwîre mavurha ga mugavu; ezo zo nsengero z’abatagatîfu. 9 Erhi banadwîrhe bayimba olwimbo luhyâhya, mpu:
«Nêci, okwânîne oyanke eci citabu
onahamûle orhuhamikizo rhwâco,
bulya wanizirwe, warhucungwîre n’omukò gwâwe,
warhuhà Nyamuzinda, rhwe b’omu ngasi mulala,
n’omu ngasi lulimi luderhwa, n’omu ngasi ishanja,
n’omu ngasi cihugo,
10 wanarhujira bwâmi bwa Nyamuzinda wîrhu na badâhwa bâge,
n’igulu rhwe rhwaliyîmemwo».
11 Nashub’ibona nanayumva izù lya Bamalahika mwandu mwandu bâli bazungulusire entebe, n’erya zirya Nsimba na balya Bagula; bâli rhulorho n’orhulorho na bihumbi n’ebihumbi, 12 banakâg’iderha n’izù linene, mpu:
«Omwâna-buzi wanigagwa
akawânine ahâbwe obuhashe,
n’obuhirhi, n’obushinganyanya,
n’obuzibu, n’obukenge,
n’irenge, n’obukuze!»
13 Na ngasi biremwa binabà omu malunga, n’en’igulu, n’omu kuzimu, n’omu nyanja, n’ebibâho byoshi byoshi, nayumva byaderha, mpu:
«Otamîre oku ntebe n’Omwâna-buzi bahâbwe obukuze,
n’obukenge, n’irenge, n’obuhashe omu myâka n’emyâka!»
14 Na zirya Nsimba ini zakâderha, mpu:
«Amen!»
N’Abagula bakâcikweba oku idaho mpu baharâmye.
*5:6 5, 6 Amahembe nda gali cimanyîso c’obuhashe bwa Kristu; n’amasù nda gayêrekana obumanye bwâge burhajira lugero.